وتىرىسقا سەنات دەپۋتاتتارى – «ءوڭىر» دەپۋتاتتىق توبىنىڭ مۇشەلەرى, ەلىمىزدىڭ دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا, «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ, «ۇلتتىق تاۋەلسىز ەمتيحان ورتالىعى» رەسۋپبليكالىق قوعامدىق بىرلەستىگىنىڭ, اقمولا, جامبىل جانە قىزىلوردا وبلىستارىنىڭ دەنساۋلىق ساقتاۋ باسقارمالارىنىڭ باسشىلارى قاتىستى.
«ءوڭىر» دەپۋتاتتىق توبىنىڭ جەتەكشىسى, سەنات دەپۋتاتى ميحايل بورتنيك شارانى اشا كەلىپ, ەلىمىزدىڭ تۇڭعىش پرەزيدەنتى – ەلباسىنىڭ قازاقستان حالقىنا جولداۋلارىندا كورسەتىلەتىن دارىگەرلىك قىزمەتتەردىڭ, اسىرەسە اۋىلدىق جەرلەردەگى ساپاسى مەن قولجەتىمدىلىگىن ارتتىرۋ جونىندە شارالار قابىلداۋدى تاپسىرعانىن اتاپ ءوتتى.
«بۇگىندە مەديتسينادا, اسىرەسە اۋىلدىق جەرلەردە شەشىلۋگە ءتيىس بىرقاتار ماسەلەلەر بار. ماسەلەن, كادرلار تاپشىلىعى مەن دايارلاۋ ماسەلەلەرى وتكىر سەزىلىپ وتىر. ءتيىستى مامانداردىڭ بولماۋىنا بايلانىستى قىمبات جابدىقتاردىڭ تۇرىپ قالعان مىسالدارى بار. كوپتەگەن دەنساۋلىق ساقتاۋ وبەكتىلەرى كۇردەلى جوندەۋدى قاجەت ەتەدى. مەديتسينالىق اۆتوموبيل كولىكتەرىن جاڭارتۋ بويىنشا دا شەشىلمەگەن ماسەلەلەر بار. وسىنداي وزەكتى ماسەلەلەردىڭ ءبارى حالىققا كورسەتىلەتىن مەديتسينالىق قىزمەتتەردىڭ قولجەتىمدىلىگى مەن ساپاسىنا اسەر ەتەدى. بۇل پروبلەمالاردى كەشەندى تۇردە شەشەتىن قادامدار كەرەك بولادى. سەنات دەپۋتاتتارىنىڭ ەل وڭىرلەرىنە جۇمىس ساپارى بارىسىندا وسى ماسەلە جۇرتشىلىق تاراپىنان بىرنەشە رەت كوتەرىلگەن بولاتىن», - دەدى م. بورتنيك.
ءسوز العاندار مەملەكەتتىك ورگاندار قابىلدايتىن شارالار دەنساۋلىق ساقتاۋ سالاسىنداعى جاعدايدى ەداۋىر جاقسارتۋعا جانە قويىلعان ماقساتتارعا قول جەتكىزۋگە مۇمكىندىك بەرەتىنىن اتاپ ءوتتى. الداعى كەزەڭدە اۋىلدىق جەردەگى اۋداندىق اۋرۋحانالار مەن ەمحانالاردى جابدىقتاۋدا ەڭ تومەنگى ستاندارتقا جەتكىزۋ جانە ايماق تۇرعىندارىنىڭ مەديتسينالىق كومەككە قولجەتىمدىلىگىن قامتاماسىز ەتۋ جوسپارلانىپ وتىر. مەملەكەتتىك-جەكەشەلىك ارىپتەستىك تەتىگىن كەڭىنەن پايدالانۋ, اۋىلدا ءموبيلدى دارىگەرلەر تاجىريبەسىن ەنگىزۋ, قاشىقتان كورسەتىلەتىن مەديتسينالىق قىزمەتتەردى دامىتۋ جانە اۋىلدىق جەردەگى دەنساۋلىق ساقتاۋ مەكەمەلەرىنىڭ ينتەرنەت جەلىسىنە قول جەتكىزۋىن قامتاماسىز قولعا الىناتىن بولادى.
تالقىلاۋ بارىسىندا سەناتورلار ءالي بەكتاەۆ پەن بەكمىرزا ەلامانوۆ اۋىلدىق جەرلەردەگى اۋرۋحانالاردىڭ جابىلۋىنا الاڭداۋشىلىق ءبىلدىردى.
سەناتور سەرىك بەكتۇرعانوۆ ءوز سوزىندە قازاقستان رەسپۋبليكاسىنداعى دەنساۋلىق ساقتاۋ جاعدايىنا جان-جاقتى تالداۋ جاسادى.
سەنات دەپۋتاتى ميحايل بورتنيك كەزدەسۋدى قورىتىندىلاي كەلىپ «ءوڭىر» دەپۋتاتتىق توبىنىڭ مۇشەلەرى – سەناتورلار كورسەتىلەتىن مەديتسينالىق قىزمەتتەردىڭ, اسىرەسە اۋىلدىق جەردەگى دارىگەرلىك كومەكتىڭ دەڭگەيىن ودان ءارى ارتتىرۋعا باعىتتالعان زاڭ جوبالارى ارقىلى زاڭنامالىق دەڭگەيدە قولداۋعا دايىن ەكەنىن اتاپ ءوتتى.
«ازىرلەنگەن ۇسىنىستار پىسىقتالىپ, ەلىمىزدىڭ ۇكىمەتىنە جىبەرىلەدى», - دەدى سەناتور.
