– تۇركيا بىزگە تاۋەلسىزدىگىمىزدىڭ العاشقى كۇندەرىنەن باستاپ قولداۋ كورسەتىپ كەلەدى. ءبىزدىڭ مەملەكەتتەرىمىز بەن حالىقتارىمىز ءبىر-بىرىنە وتە جاقىن. ەكى ەل اراسىندا ۆيزاسىز رەجىم ەنگىزدىك. قازاقستان مەن تۇركيا قارىم-قاتىناستارى جىل سايىن نىعايىپ كەلەدى. وسى باعىتتىڭ جالعاسا تۇسەتىنىنە سەنىمدىمىن, – دەدى ەلباسى.
سونىمەن قاتار, نۇرسۇلتان نازارباەۆ تۇركى كەڭەسى اياسىندا مەملەكەتارالىق بايلانىستاردى دامىتۋدىڭ قاجەتتىگىن ايتتى.
– تۇركىتىلدەس مەملەكەتتەردىڭ ىنتىماقتاستىعى كەڭەسى تۇركى حالىقتارىنىڭ اراسىنداعى بايلانىستاردى دامىتۋ جانە نىعايتۋ ماقساتىمەن قۇرىلعان بولاتىن. بۇل جۇمىستاردى جالعاستىرعان ءجون. مەن جان-جاقتى قولداۋ كورسەتەمىن, – دەدى قازاقستاننىڭ تۇڭعىش پرەزيدەنتى.
م.چاۆۋشوگلۋ ەلباسىعا ريزاشىلىق ءبىلدىرىپ, جاقىن ارادا تۇركياعا كەلۋ تۋرالى رەجەپ ەردوعاننىڭ شاقىرۋىن جەتكىزدى.
– ءسىزدىڭ ەلباسى, قاۋىپسىزدىك كەڭەسىنىڭ جانە «Nur Otan» پارتياسىنىڭ توراعاسى رەتىندە قازاقستان حالقىنىڭ يگىلىگى جولىنداعى جۇمىستاردى بەلسەندى جالعاستىرىپ جاتقانىڭىزعا قۋانىشتىمىز. ءسىزدىڭ قازاقستاندى وركەندەتۋ جانە ەكى جاقتى قارىم-قاتىناستاردى دامىتۋ ىسىنە ولشەۋسىز ەڭبەك سىڭىرگەنىڭىزدى جاقسى بىلەمىز, – دەدى تۇركيا رەسپۋبليكاسىنىڭ سىرتقى ىستەر ءمينيسترى.
كەزدەسۋ بارىسىندا تاراپتار كۇن تارتىبىندەگى حالىقارالىق جانە وڭىرلىك وزەكتى ماسەلەلەردى تالقىلادى.
سوڭىندا تۇركيا رەسپۋبليكاسىنىڭ سىرتقى ىستەر ءمينيسترى تۇركى كەڭەسى مەملەكەتتەرى كوشباسشىلارىنىڭ قابىلداعان شەشىمىنە سايكەس, تۇركى الەمى ەلدەرىن دامىتۋعا زور ۇلەس قوسقانى ءۇشىن نۇرسۇلتان نازارباەۆقا تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ عۇمىر بويعى قۇرمەتتى توراعاسى مارتەبەسى بەرىلگەنىن مالىمدەدى.
