«قازاقستان رەسپۋبليكاسى جوعارعى سوتىنىڭ باستاماسىمەن رەسپۋبليكامىزدىڭ 4 وبلىسىندا وتباسىلىق قۇقىقتاردى قورعاۋعا باعىتتالعان «وتباسىلىق سوت» پيلوتتىق جوباسى ىسكە قوسىلدى. بۇل جوبانىڭ مىندەتى: وتباسىلىق جانجالداردىڭ سەبەپتەرىن انىقتاپ, سوت پروتسەسىنىڭ بارلىق ساتىسىندا داۋلاسۋشى تاراپتارمەن تاتۋلاستىرۋ شارالارىن جۇرگىزۋ, وتباسى قۇقىقتارى مەن مۇددەلەرىن, ونىڭ ىشىندە كامەلەتكە تولماعانداردىڭ قۇقىقتارىن قورعاۋدى قامتاماسىز ەتۋ. شىمكەنت قالالىق سوتىنىڭ توراعاسى ەربول راحىمبەكوۆتىڭ 2018 جىلعى 4 جەلتوقسانداعى وكىمىمەن ەڭبەكشى اۋداندىق سوتىنىڭ بازاسىندا «وتباسىلىق سوت» پيلوتتىق جوباسىن جۇزەگە اسىرۋعا كىرىسكەن ەدىك. جارتى جىلدان بەرى جۇزەگە اسىرىلىپ كەلە جاتقان وسى جوبا قازىرگى ۋاقىتتا تيىمدىلىگىن كورسەتە باستادى. وزدەرىڭىزبەن وتباسىن ساقتاپ قالۋ, بالالاردىڭ قۇقىقتارىن قورعاۋ ماسەلەلەرى بويىنشا كەڭەسە وتىرىپ جانە سۇقبات جۇرگىزىپ, سۇراقتارىڭىزعا جاۋاپ بەرىپ, وي-پىكىرلەرىڭىزدى تىڭداساق», دەدى القا توراعاسى.
القالى جيىندا وتباسىلىق جانجالداردىڭ سەبەپتەرىن انىقتاۋ, سوت پروتسەسىنىڭ بارلىق ساتىسىندا تاراپتاردى تاتۋلاستىرۋ شارالارى, ونىڭ ىشىندە ازاماتتاردىڭ سوتتا نەمەسە سوتتان تىس تاتۋلاسۋىنا مۇمكىندىك بەرۋ, وتباسى قۇقىقتارى مەن مۇددەلەرىن قورعاۋعا ارنالعان ماسەلە قوزعالدى. ءارى, وتباسى قۇندىلىعىن ساقتاۋدا اسىرەسە كامەلەتكە تولماعانداردىڭ قۇقىقتارىن قورعاۋدى قامتاماسىز ەتۋ جايى كەڭىنەن تالقىلاندى.
«بۇگىنگى تاڭدا ەڭبەكشى اۋداندىق سوتىمەن وتباسىن ساقتاپ قالۋ, جانجالداردىڭ الدىن الۋ ماقساتىندا باستاپقى تەگىن پسيحولوگيالىق كومەك كورسەتىلىپ, وتباسىلىق قۇندىلىقتاردى ناسيحاتتاۋ بويىنشا ءىس-شارالار جۇرگىزىلۋدە», دەدى ەڭبەكشى اۋداندىق سوتىنىڭ توراعاسى ايدوس سۇلتانوۆ.
كەزدەسۋدە ءسوز العان قوعام قايراتكەرى, قر پارلامەنتى ءماجىلىسىنىڭ V شاقىرىلىمداعى دەپۋتاتى ورازكۇل اسانعازىقىزى وتباسى جانە نەكە قاتىناستارىنىڭ بۇزىلۋىنا ماحابباتتىڭ جوقتىعى سەبەپ بولىپ وتىر دەيدى. قوعام قايراتكەرىنىڭ پىكىرىنشە, ءبىر-ءبىرىن شىن جاقسى كورىپ, ماحابباتپەن قوسىلسا, ەكى تاراپتى ەشكىم دە اجىراتا المايدى. ءتىپتى, وتباسى اتتى ۇستاحانانىڭ تاجىريبەلى ۇستاسىنا اينالادى. ول ۇستاحانادان نامىستى ۇل, قىلىقتى قىز تاربيەلەنىپ شىعارماق.
سپيكەرلەردى ۇيىپ تىڭداعان جاستار كەزدەسۋگە بەلسەنە قاتىسىپ, «توقتامسىز كەرىسە بەرەتىن اتا-اناسىنا بالا قالاي كومەكتەسپەك؟ تەلەديدارداعى «قالاۋلىم», «كەل, كەلىنىم!» سياقتى باعدارلامالار تۋرالى نە ويلايسىز؟» دەگەن سۇراقتارىن قويىپ, وعان تۇشىمدى جاۋاپ الدى. ءارى, وتباسىن قۇرۋعا نيەتتەنىپ جۇرگەن جاستارعا ۇلتتىق قۇندىلىقتارعا نەگىزدەلگەن شاڭىراق كوتەرۋ تۋرالى كۋرستار اشىلسا دەگەن ۇسىنىستارىن جەتكىزدى.
سونىمەن قاتار, شارا بارىسىندا «وتباسىلىق سوت» پيلوتتىق جوباسىنىڭ ماقسات-مىندەتتەرى, ەرەكشەلىكتەرى كورسەتىلگەن بۋكلەتتەر تاراتىلدى.
ايتا كەتەرلىگى, وسى جىلدىڭ 4 ايىندا نەكە جانە وتباسى قاتىناستارىنا قاتىستى 251 تالاپ-ارىز ءتۇسىپ, ونىڭ 73 ءىسى بويىنشا نەكەنى بۇزۋ تۋرالى شەشىم قابىلدانعان, 37 تالاپ ارىزى بويىنشا تاراپتاردىڭ تاتۋلاسۋىنا بايلانىستى ءىس-جۇرگىزۋ توقتاتىلعان.9 تالاپ ارىز قاراۋسىز قالدىرىلعان. 146 تالاپ ارىز (قالدىق ىستەر بويىنشا) بويىنشا سۋديا جانە پسيحولوگپەن الدىن الا اڭگىمەلەسۋ ساتىسى جۇرگىزىلۋدە.
