قازىرگى تاڭدا رەسپۋبليكا بويىنشا 37 150 سالىق تولەۋشى سالىق بەرەشەگىن وتەدى. ولارعا 1,9 ميلليارد تەڭگە سوماسىنداعى ءوسىمپۇل جانە 98,7 ملن تەڭگە سوماسىنداعى ايىپپۇلعا جەڭىلدىك قاراستىرىلعان.
2018 جىلعى 1 قازانداعى جاعداي بويىنشا, ەلىمىزدە 90 077 شاعىن جانە ورتا بيزنەس سۋبەكتىلەرىنىڭ وتەلمەگەن سالىقتىق بەرەشەگى بولعان. ولاردىڭ قارىز سوماسى – 210,4 ميلليارد تەڭگە, ءوسىمپۇلدار – 122,9 ميلليارد تەڭگە, ايىپپۇلدار – 7,4 ميلليارد تەڭگەنى قۇراعانىن اتاپ وتكەن ءجون.
سالىقتىق راقىمشىلىق جىل اياعىنا دەيىن جالعاسادى. ياعني, شاعىن جانە ورتا بيزنەس سۋبەكتىلەرى قارىزداردان قۇتىلۋىنا جانە مەملەكەتتىك كىرىستەر ورگاندارى قويعان شەكتەۋلەردىڭ كۇشىن جويۋ مۇمكىندىگى بار.
سونىمەن قاتار جەكە تۇلعالاردىڭ 2019 جىلعى 1 قاڭتارعا دەيىنگى سالىقتىق مىندەتتەمەلەرى بويىنشا دا جەڭىلدىكتەر جاساۋ ماسەلە قازىرگى تاڭدا پارلامەنت ماجىلىسىندە قاراستىرىلىپ جاتىر. اتالعان وزگەرىستەر قابىلداعان جاعدايدا راقىمشىلىققا 1,390 ميلليون ادام ىلىگەدى. ولار تولەۋى ءتيىس 13,9 ميلليارد تەڭگە سوماسىندا قارجىنى وتكىزگەندە 7 ميلليارد تەڭگە ءوسىمپۇل ەسەپتەن شىعارىلادى.
ايتا كەتەرلىگى, 31 مامىردا مەملەكەتتىك كىرىستەر كوميتەتىنىڭ توراعاسى مارات سۇلتانعازيەۆتىڭ قاتىسۋىمەن سەمينار وتكىزىلمەك. سەمينار بارىسىندا سالىقتىق راقىمشىلىقتىڭ كوكەيتەستى سۇراقتارى, كامەرالىق باقىلاۋدىڭ كەيبىر وزەكتى ماسەلەلەرى كوتەرىلەدى.
