بايقاۋعا جالپى سانى 48 مەكتەپتەن 1000-نان اسا وقۋشى قاتىستى. ونىڭ ىشىندە 44-ءى قالا مەكتەپتەرى بولىپ سانالادى. ءتىزىم بويىنشا بەرىلگەن ءجۇز كىتاپتى تولىق وقىپ, ەمتيحان سۇراقتارىنا جاۋاپ بەرگەن وقۋشىعا ءبىر ميلليون تەڭگە جۇلدە ۋادە ەتىلگەن ەدى. بايقاۋدى ۇيىمداستىرۋعا تاراز قالالىق ءبىلىم ءبولىمى جانە د.قوناەۆ اتىنداعى بالالار مەن جاسوسپىرىمدەر كىتاپحاناسى اتسالىستى. ميلليونەر وقۋشىنى انىقتاۋ ماقساتىندا تاراز قالالىق مادەنيەت ۇيىندە بايقاۋ قورىتىندىسى ءوتتى.
جيىندا العاش بولىپ ءسوز العان تاراز قالاسىنىڭ اكىمى قايرات دوساەۆ كىتاپتىڭ جاس ۇرپاقتىڭ قالىپتاسۋىنا قاجەتتى دۇنيە ەكەنىن ايتىپ, بايقاۋعا قاتىسۋشى وقىرماندارعا ساتتىلىك تىلەدى. سودان كەيىن اتالعان بايقاۋعا باس دەمەۋشى بولىپ, 3 ميلليون تەڭگە قاراجات اۋدارعان «قازفوسفات» جشس باس ديرەكتورى, قازاقستاننىڭ ەڭبەك ەرى مۇقاش ەسكەندىروۆ, جازۋشى, قازاقستاننىڭ ەڭبەك سىڭىرگەن قايراتكەرى نەسىپبەك ءداۋتاي ۇلى ءسوز الىپ, بولاشاق ۇرپاقتىڭ ءبىلىمدى ءارى پاراساتتى بولۋى ءۇشىن كىتاپتىڭ اسەرى مول ەكەنىن جەتكىزدى.
بايقاۋ ناتيجەسىندە 8-11 سىنىپتار ارالىعى بويىنشا ب.مومىش ۇلى اتىنداعى №45 قازاق كلاسسيكالىق گيمنازياسىنىڭ 9-سىنىپ وقۋشىسى كازىنا ابدىسەيىت ءى ورىندى جەڭىپ الىپ, 1 ميلليون تەڭگە جۇلدەنى يەلەندى. ال, كەرىمباي اتىنداعى №12 مەكتەپ گيمنازياسىنىڭ 10-سىنىپ وقۋشىسى ايگەرىم مەيىرحانوۆا ءىى ورىندى (500 مىڭ تەڭگە), №7 مەكتەپ گيمنازياسىنىڭ 11-سىنىپ وقۋشىسى گالينا بۋركينا ءىىى ورىندى (250 مىڭ تەڭگە) يەلەندى. ال, 5-7 سىنىپ ارالىعىنداعى قاتىسۋشىلار اراسىنان ي.پانفيلوۆ اتىنداعى №39 مەكتەپ-گيمنازياسىنىڭ 7-سىنىپ وقۋشىسى ايزەرە ەرەن جەڭىمپاز اتانىپ, 500 مىڭ تەڭگەگە قول جەتكىزدى. سونداي-اق, №10 ورتا مەكتەبىنىڭ 7-سىنىپ وقۋشىسى دانيار بەكجان مەن №54 ورتا مەكتەبىنىڭ 6-سىنىپ وقۋشىسى توعجان اللابەرگەن ءىى ورىندى (150 مىڭ تەڭگەدەن) ءوزارا بولىسسە, №30 مەكتەپ گيمنازياسىنىڭ 7-سىنىپ وقۋشىسى سابينا سۋلەيمەن مەن №31 ورتا مەكتەبىنىڭ 5-سىنىپ وقۋشىسى گيۋزال وسمانوۆا ءىىى ورىنعا (75 مىڭ تەڭگەدەن) لايىق دەپ تابىلدى. ال, بايقاۋدىڭ قالالىق دەڭگەيدە وتكەنىنە قاراماستان ءوز قالاۋىمەن 61 كىتاپ وقىعان رەسپۋبليكالىق نازارباەۆ زياتكەرلىك مەكتەبىنىڭ 8-سىنىپ وقۋشىسى فاتيما بايماحانعا جامبىل وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا كوكشەتاۋ قالاسىنداعى «بالداۋرەن» بالالار لاگەرىنە 20 كۇندىك جولداما تابىس ەتتى. سونىمەن قاتار, وبلىستىق د.قوناەۆ اتىنداعى بالالار مەن جاسوسپىرىمدەر كىتاپحاناسىنىڭ ديرەكتورى گۇلفايرۋز قاپارقىزى جاس زياتكەرگە نوۋتبۋك سىيلادى. ال, وقىعان كىتابىنان اسەرلەنىپ قايىرىمدىلىق قورىن اشقان جامبىل اتىنداعى №5 مەكتەپ-گيمنازيانىڭ وقۋشىسى ارۋجان ايعابىلعا جامبىل وبلىسى ىسكەر ايەلدەر قاۋىمداستىعىنىڭ اتىنان سمارتفون بەرىلدى.
اتالعان بايقاۋدى ۇيىمداستىرۋشىلار الداعى ۋاقىتتاردا بايقاۋدىڭ اۋماعىن كەڭەيتىپ, ءداستۇرلى تۇردە وتكىزۋدى جوسپارلاپ وتىرعانىن ايتادى. ال, وقۋشىلار اراسىندا ەڭ كوپ وقىلعان ادەبيەتتەر قاتارىندا م.اۋەزوۆتىڭ «كوكسەرەك», ب.سوقپاقباەۆتىڭ «مەنىڭ اتىم قوجا», ش.مۇرتازانىڭ «اي مەن ايشا», م.ماعاۋيننىڭ «تازىنىڭ ءولىمى», ا.ەكزيۋپەريدىڭ «كىشكەنتاي حانزادا» كىتاپتارى بار.
جامبىل وبلىسى
