ساكەن سەيفۋللين مۋزەيىنىڭ ديرەكتورى, اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلىنىڭ مودەراتورلىعىمەن بولعان دوڭگەلەك ۇستەل جۇمىسىنا مەملەكەت تاريحى ينستيتۋتىنىڭ عىلىمي قىزمەتكەرلەرى سەيىتقالي دۇيسەن, قۇندىزاي ەرىمبەتوۆا, جاباي قاليەۆ, قانات ەڭسەنوۆ, باۋىرجان ىدىرىسوۆ جانە وزگە دە قوعام بەلسەندىلەرى, ساكەنتانۋشى عالىمدار مەن جاستار قاتىستى.
– قايماعى بۇزىلماعان قاسيەتتى ورتادا وسكەن, بەسىگىنەن ونەگە كورگەن, ونەردىڭ ۋىزىن ەمگەن سۇلۋ ساكەن, سىرلى ءساكەن, سىرباز ساكەن, سۇڭقار ساكەن, اقىن ءارى كومپوزيتور ساكەن قانقۇيلى زاماندا سان قيلى تاعدىر كەشە ءجۇرىپ, تۋعان حالقىنا, ءوز قولىمەن قۇرىسقان كەڭەس وكىمەتىنە جان-تانىمەن ادال قىزمەت ەتتى. ساكەننىڭ دۇنيە ەسىگىن اشقانىنا بيىل – 125 جىل. وسى ورايدا ارداقتى تۇلعانىڭ ەل ءۇشىن ىستەگەن ەلەۋلى ەڭبەكتەرىن قايتا جاڭعىرتىپ, اۋقىمدى ءىس-شارالار ۇيىمداستىرىلىپ جاتىر. ادەبيەت پەن ونەردە ءولشەۋسىز ءىس تىندىرعان تاۋ تۇلعانىڭ تاعىلىمى بۇگىنگى جاستارعا ونەگە بولۋى ءتيىس, – دەدى نەسىپبەك ايت ۇلى.
حح عاسىر باسىنداعى قازاقستانداعى ۇلت-ازاتتىق يدەياسىنىڭ كورنەكتى وكىلى جونىندە بايانداما جاساعان مەملەكەت تاريحى ينستيتۋتى دەرەكتانۋ, تاريحناما جانە وتان تاريحى ءبولىمىنىڭ باسشىسى, تاريح عىلىمدارىنىڭ دوكتورى عاني قاراساەۆ «الاشوردا» قايراتكەرلەرى مەن بولشەۆيكتەر جاعىندا مەملەكەت ىسىنە ارالاسقان ازاماتتاردىڭ ءىس-ارەكەتىنە قاتىستى سىني وي-پىكىرلەردىڭ بىرجاقتى بولماۋى ءتيىس ەكەنىن ايتتى.
– ساكەن زامانىندا قۇداي بەرگەن تالانتىمەن جارقىراي كورىنىپ, ءوزى ارمانداعان قازاقتى قالاي بيىككە شىعارامىن دەگەن ماقساتتى جالاۋ ەتتى. مادەني رەۆوليۋتسياعا بەلسەنە ارالاستى, ساۋاتسىزدىق مەكتەبىندە ءدارىس بەردى. اقىن شىعارمالارىنىڭ يدەيالىق نىساناسى جاڭا ءداۋىردىڭ, كەڭەستىك زاماننىڭ كوكەيكەستى ماسەلەلەرىمەن تىعىز ۇشتاسىپ جاتادى. ول – بۇگىنگى جاڭا ءومىردىڭ جالىندى جارشىسى بولعان تاريحي ماڭگى قۇبىلىس, – دەدى عالىم.
سونداي-اق قازاق-كەڭەس ادەبيەتىنىڭ نەگىزىن سالعان, يدەيالىق جاعىنان بەرىك قالىپتاسۋىنا ەڭبەك سىڭىرگەن قايراتكەر, اقىن ساكەننىڭ ءومىر جولى, قوعامدىق قىزمەتتەرى تۋراسىندا تەرەڭ اڭگىمە قوزعالدى. قازاق حالقىنىڭ كەلەشەگى جولىنداعى كۇرەسكە تولى كۇردەلى كەزەڭدە كۇش-ءجىگەرىن, بار ءومىرىن ارناعان قايراتكەرلەردىڭ ءبىرى – ساكەن سەيفۋلليننىڭ ەسىمى قايتا جاڭعىرىپ, عىلىمي زەرتتەۋلەردىڭ نىسانىنا اينالدى. تۇلعانىڭ مەملەكەتتىك-ساياسي قىزمەتى مەن ءوزى ءومىر سۇرگەن قوعامنىڭ تالابى ءبىرتۇتاس قاراستىرىلىپ, قايراتكەردىڭ ءومىر جولىنداعى تاريحي قۇبىلىستارعا باعا بەرىلدى. ارداقتى اقىننىڭ ءدۇبىرلى مەرەيتويى اياسىندا ساكەن, ءىلياس, بەيىمبەت سىندى الىپتارعا ارنالعان «ءۇش ارىس» بۇرىشى اشىلىپ, اياۋلى تۇلعالاردىڭ فارفوردان جاسالعان مۇسىندەرى قويىلدى. ودان بولەك, مۋزەي قىزمەتكەرلەرىنىڭ سالتاناتتى مەرەيتويعا ارنايى دايىنداعان «ءۇش بايتەرەك» كىتابى قالىڭ كوپشىلىك نازارىنا ۇسىنىلىپ وتىر.
