ءىس-شارا بارىسىندا شىۇ ەلدەرى سىرتقى ساياسي ۆەدومستۆولارىنىڭ باسشىلارى حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا سىندارلى پىكىر الماسىپ, شىۇ-نىڭ ساياسي, ەكونوميكالىق جانە گۋمانيتارلىق سالالارداعى قىزمەتىن ودان ءارى دامىتۋدىڭ ءبىرىنشى كەزەكتەگى مىندەتتەرىن, سونداي-اق شىۇ-نىڭ حالىقارالىق جانە وڭىرلىك بىرلەستىكتەرمەن بايلانىسىن دامىتۋ ماسەلەلەرىن تالقىلادى.
قازاقستان, ءۇندىستان, قىتاي, قىرعىزستان, پاكىستان, رەسەي, تاجىكستان جانە وزبەكستان سىرتقى ىستەر مينيسترلەرى 2019 جىلعى 14 ماۋسىمدا بىشكەكتە شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنا دايىندىق بارىسىن, بىشكەك دەكلاراتسياسى مەن سامميت قورىتىندىسى بويىنشا اقپاراتتىق حابارلاما جوبالارىن, سونداي-اق, ۇيىمنىڭ اعىمداعى قىزمەتى بويىنشا باسقا دا بىرقاتار شەشىمدى قاراپ, ماقۇلدادى.
وتىرىسقا قاتىسۋشىلار ۇيىمعا مۇشە مەملەكەتتەر اراسىنداعى ءوزارا تۇسىنىستىكتى, سەنىمدى ديالوگتى جانە تەڭ قۇقىقتى ارىپتەستىكتى نىعايتۋدىڭ بەرىك پلاتفورماسى رەتىندە شىۇ-نىڭ ۇدەمەلى دامۋىن اتاپ ءوتتى. شىۇ ايماعىنىڭ تۇراقتى دامۋىن قامتاماسىز ەتۋ, تۇراقتىلىق پەن قاۋىپسىزدىك قاتەرلەرىنىڭ الدىن الۋدا مۇشە مەملەكەتتەردىڭ ءوزارا ءىس-قيمىلىن كەڭەيتۋ جانە تەرەڭدەتۋ ۇمتىلىسى اتاپ ءوتىلدى.
وتىرىس بارىسىندا قاتىسۋشىلار تەرروريزمنىڭ بارلىق نىساندارى مەن كورىنىستەرىن باتىل ايىپتاپ, بۇۇ-نىڭ ورتالىق ۇيلەستىرۋشى رولىندە بىرىڭعاي جاھاندىق لاڭكەستىككە قارسى مايدان قۇرۋعا شاقىردى. بۇل تۇرعىدا تەرروريزمنەن ەركىن بەيبىتشىلىككە قول جەتكىزۋ ءۇشىن 2018 جىلعى قىركۇيەكتە قازاقستاننىڭ باستاماسى بويىنشا بۇۇ-دا قابىلدانعان مىنەز-ق ۇلىق كودەكسىنىڭ ەرەجەلەرىن دايەكتى ىسكە اسىرۋدىڭ ماڭىزدىلىعى اتاپ ءوتىلدى.
سونىمەن قاتار جاھاندىق ەكونوميكالىق باسقارۋ ارحيتەكتۋراسىن جەتىلدىرۋ, ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋ ماقساتىندا كۇش-جىگەردى ارتتىرۋ قاجەتتىگى راستالدى.
قر سىرتقى ىستەر ءمينيسترى ءوز سوزىندە حالىقارالىق تەرروريزمگە, ەسىرتكىنىڭ زاڭسىز اينالىمىنا قارسى كۇرەس, وڭىرلىك جانجالداردى رەتتەۋ, سونىڭ ىشىندە سيريا مەن تاياۋ شىعىستاعى نەگىزگى وزەكتى ماسەلەلەر بويىنشا ەلىمىزدىڭ ۇستانىمىن اتاپ ءوتتى.
قر ءسىم باسشىسى ءىس-شاراعا قاتىسۋشىلاردى قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ حالىقارالىق باستامالارىمەن, سونىڭ ىشىندە ءىرى وڭىرلىك قۇرىلىمدار - ەاەو, ەۋروپا وداعى, شىۇ جانە اسەان اراسىنداعى جۇيەلى ەكونوميكالىق ديالوگتى جولعا قويۋ قاجەتتىلىگى تۋرالى تانىستىردى.
شىۇ شەڭبەرىندە ەكونوميكالىق ىنتىماقتاستىقتى ودان ءارى دامىتۋ جونىندە پىكىر الماسۋ تۇرعىسىندا تاراپتار قازاقستاندىق باستامالاردى ىسكە اسىرۋ تۋرالى – مۇشە مەملەكەتتەردىڭ ءوزارا ەسەپتەرىندەگى ۇلتتىق ۆاليۋتالاردىڭ ۇلەسىن ارتتىرۋ, «استانا» حالىقارالىق قارجى ورتالىعىنىڭ الەۋەتىن پايدالانۋ جانە ۇيىمنىڭ ساندىق الاڭىن قۇرۋ تۋرالى اقپارات ۇسىنىلدى.
قازاقستان حالىقتارىمىزدىڭ بەيبىتشىلىگىن, تۇراقتىلىعى مەن ءال-اۋقاتىن نىعايتۋ جولىنداعى ىنتىماقتاستىقتىڭ بارلىق باعىتتارى بويىنشا بەلسەندى جۇمىستى جالعاستىرۋ نيەتىن راستادى.
وتىرىستىڭ قاتىسۋشىلارى قىرعىز رەسپۋبليكاسىنىڭ شىۇ سىمك وتىرىسىن دايىنداۋ بويىنشا اتقارعان جۇمىسىنا جوعارى باعا بەردى.
وتىرىس قورىتىندىسى بويىنشا شىۇ سىرتقى ىستەر مينيسترلەرىنىڭ اقپاراتتىق حابارلاماسى قابىلداندى.
