قازىرگى ۋاقىتتا جاۋاپتى ناۋقانعا جان-جاقتى دايىندىق جۇمىستارى جۇرگىزىلىپ جاتىر. مىسالى, قاراعاندىلىق وقۋشىلاردى قابىلدايتىن بۇقار جىراۋ اۋدانىنداعى دەمالىس لاگەرىنىڭ تۇرعىنجاي جانە شارۋاشىلىق كورپۋستارى تولىقتاي جوندەۋدەن وتكەن. العاشقى اۋىسىمنىڭ اشىلۋى الدىندا ول جەردە تازالاۋ جۇمىستارى اياقتالىپ, لاگەر اۋماعىنداعى اعاشتار اكتەلىپ, باننەر مەن تاياقشالار جاڭارتىلىپ جاتىر.
بيىل كەنشىلەر استاناسىنداعى بالالار مەن جاسوسپىرىمدەر سارايىنىڭ ۇيىمداستىرۋىمەن قارقارالىداعى «مەديك» دەمالىس ورنىندا 250 وقۋشى دەمالاتىن بولادى. بۇعان قوسا زياتكەرلىك جانە سپورتتىق سايىستار مەن ءپان وليمپياداسى سىندارىندا جەڭىمپاز بولعان 160 بالا قالا سىرتىنداعى لاگەردە كۇز مەزگىلىندە دەمالۋ مۇمكىندىگىنە يە بولدى.
ايتا كەتۋ كەرەك, بيىل كوپبالالى جانە الەۋمەتتىك از قامتىلعان وتباسىلاردان شىققان 10 بالا 24 ءساۋىر مەن 17 مامىر ارالىعىندا الماتىداعى «بوبەك» ساۋىقتىرۋ ورتالىعىندا دەمالىپ كەلدى.
سونداي-اق, 50 وقۋشىعا 19 مامىر مەن 11 ماۋسىم ارالىعىندا قاپشاعايداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىنا بارىپ دەمالۋعا جولداما بەرىلگەن.
بۇدان بولەك, وسى جازدا قاراعاندىدا مەكتەپ جانىنان 225 لاگەر اشىلىپ, ول جەرلەردە 17 مىڭنان استام بالا كانيكۋل كۇندەرىن وتكىزەدى دەپ جوسپارلانعان. سونىمەن قاتار, جازعى دەمالىس كەزىندە 165 جاسوسپىرىمگە «جاسىل ەل» جاستار جاساعىندا ەڭبەك ەتىپ, تابىس تابۋ مۇمكىندىگى بەرىلەدى.
