كامبەكتىڭ درامالىق حيكاياسى

جالپى چەمپيوندار ليگاسىنىڭ بيىلعى ماۋسىمىندا فۋتبول جان­كۇيەر­لەرى التى كامبەككە كۋا بولدى. بۇل كام­بەكتەردىڭ ىشىندەگى ەڭ ۇزدىگى «اياكس» پەن «توتتەنحەم» اراسىندا وتكەنىنە ەش­كىم كۇمان كەلتىرمەيتىن شىعار. ءتىپتى، «ليۆەرپۋلدىڭ» «بارسەلوناعا» قارسى جاساعان كامبەگى دە بۇل كەزدەسۋدەن كەيىن ماڭىزسىز بولىپ قالدى. سەبەبى «اياكس» قارىمتا كەزدەسۋدىڭ ءبىرىنشى بولىگىنەن كەيىن 2:0 ەسەبىمەن الدا كەلە جاتقان ەدى. ءوز الاڭىندا ءبىر گول، سىرت الاڭدا ەكى گول وتكىزىپ العان اعىلشىن كو­مانداسىندا كەلەسى كەزەڭگە شىعۋعا مۇلدە مۇمكىندىك قالماعان-دى. بىراق پوچەتتينو ەكىنشى تايمدا ويىن ورنەگىن 180 گرادۋسقا وزگەرتىپ، «توتتەنحەم» ەكىنشى 45 مينۋتتىڭ ىشىندە كامبەك جاساپ كەتتى. 

ال يسپانيادا وتكەن العاشقى ويىندا 3:0 ەسەبىمەن جەڭىلگەن اعىلشىن كومانداسى ءوز الاڭىندا «بارسەلونا» قاقپاسىنا جاۋاپسىز 4 گول سوعىپ، تاماشا كامبەك جاسادى.

جالپى، فۋتبولدا كامبەك وقيعاسى ءجيى كەزدەسەدى. ال سوڭعى 15 جىلدا كامبەك-«بارسەلونا» جانە كامبەك-«ليۆەرپۋل» ءسوزى بىتە قايناسىپ، ەكەۋى ەگىز ۇعىم بولىپ كەتكەندەي كورىنەدى. «ليۆەرپۋل» كلۋبىنىڭ 2005 جىلعى چەمپيوندار ليگاسىنىڭ فينالىنداعى ماتچىن فۋتبول جانكۇيەرلەرى ەشقاشان ۇمىتپايتىن شىعار. ىستامبۇلدا وتكەن «ليۆەرپۋل» مەن «ميلان» (يتاليا) كلۋبتارىنىڭ اراسىنداعى كەزدەسۋدىڭ ءبىرىنشى تايمى 3:0 ەسەبىمەن «ميلاننىڭ» پايداسىنا اياقتالدى. ەكىنشى تايمدا «ميلان» فۋتبولشىلارىنىڭ ەركىنسىگەنىن بايقاعان «ليۆەرپۋل» ويىنشىلارى نەبارى 15 مينۋتتىڭ ىشىندە ەسەپتى 3:3-كە جەتكىزدى. فينالداعى ۇلى كامبەكتى كوماندا كاپيتانى ستيۆەن دجەرراردتىڭ ءوزى باستاپ بەرگەنى كۇنى كەشە بولعانداي ءالى جادىمىزدا...

ال «بارسەلونا» كلۋبى چەمپيوندار ليگاسىنىڭ سوڭعى ەكى ماۋسىمىندا كام­بەك­تەردىڭ قۇربانى بولىپ كەلەدى. راس، «بار­سەلونانىڭ» دا كامبەك جاساعان كەزدەرى كوپ بولعان. بىراق قۇرامىندا الەمنىڭ ەڭ ۇزدىك فۋتبولشىلارى بار كوماندا قاتارىنان ەكى ماۋسىم كامبەكپەن جەڭىلۋى اقىلعا قونىمسىز وقيعا بولىپ تۇر. 

جالپى، ءاربىر كامبەكتىڭ وزىنە ساي تاريحى بولادى. بىراق ولاردى بايلانىستىرىپ تۇراتىن ءبىر نارسەنىڭ بولۋى زاڭدىلىق قوي. ءبىز سول زاڭدىلىقتىڭ كىلتىن تاپقانداي بولدىق. كەز كەلگەن كامبەكتە ەكى كوماندا دا جان بەرىپ، جان الىسىپ وينامايدى ەكەن. مىندەتتى تۇردە ءبىر كوماندا ويىندى ءوز قولىنا السا، ەكىنشى كوماندا جەڭىلىستى ءوز قولىمەن بەرىپ قوياتىن سياقتى. 

مۇنداي مىسالدار تاريحتا كوپتەپ كەزدەسەدى. 1999 جىلعى چەمپيوندار ليگاسى فينالىنىڭ سوڭعى مينۋتتارىندا «باۆاريا» ويىن تاعدىرى شەشىلىپ قويدى دەپ ويلاپ، دوپتى وڭدى-سولدى تەبە بەرۋى «ميۋ-ءدى» كۇشەيتىپ جىبەرگەن.

2016 جىلعى فينال. «رەال» فۋتبولشىلارى ويىننىڭ سوڭعى مينۋتىندا «اتلەتيكو» فۋتبولشىلارىنىڭ كوزىندە جەڭىسكە دەگەن ۇمىتىلىستىڭ جوق ەكەنىن بايقاپ قويدى. ءارى قاراي ماتچ «رەال» ويىنشىلارىنىڭ بەنەفيسىنە اينالدى.  

بيىلعى ماۋسىمداعى پسج-«ميۋ» ويى­نى دا وسى جاعدايعا ۇقساس. پاريجدىكتەر ماتچ سوڭىنا دەيىن وتە اۋىتقىمالى ەسەپتە ەكەندىكتەرىن ويلاماي، بارىن سالماي وينايدى. ناتيجەسىندە، «مانچەستەر» ءبىر شابۋىلىنىڭ ارقاسىندا «جۇلدىزدار فابريكاسىنىڭ» جازاسىن بەردى. 

«رەالدىڭ» ءوز الاڭىندا «اياكستان» جەڭىل­گەن ماتچى دا ءبىز ايتقان جاۋاپ­سىزدىقتان. «قارسىلاستى ءوز الاڭىندا جەڭىپ كەلدىڭ بە، وندا ءوز الاڭىڭدا ەش الاڭسىز ويناي بەر»، دەگەن قاعيدا مادريدتىكتەردىڭ تەورياسىندا ءجيى كەزدەسەتىن سياقتى. سول كەزدەسۋدە «امستەردام بالالارى» فانتاستيكالىق ويىن كورسەتكەن بولار، بىراق بۇل ويىنداعى جەڭىسكە «رەالدىڭ» شابۋىلدا وتە ناشار ويناۋى سەبەپ بولدى.

قورىتا ايتقاندا، كامبەك جايدان- جاي بولمايدى. ماتچتى وتە سىلبىر، ءالسىز وتكىزگەن كوماندا عانا جەڭىلىسكە ۇشىرايدى. «مانچەستەر سيتي» «توت­تەنحەم» قويعان توقساۋىلدان نەگە وتە الماعانىن ەندى تۇسىنگەن بولارسىزدار. سول ويىندا لوندوندىقتار ءبىز ايتقان فورمۋلاعا تۇسپەي، وتە سەنىمدى تۇردە «مانچەستەر ءسيتيدىڭ» ءار گولىنا گولمەن جاۋاپ بەرگەنىنىڭ ارقاسىندا كەلەسى كەزەڭگە ءوتتى.

بيىلعى ماۋسىمنىڭ كامبەكتەرى

- «اياكس» – «توتتەنحەم» – 2:3، 1:0 (قورىتىندى ەسەپ – 3:3)

- «ليۆەرپۋل» – «بارسەلونا» – 4:0، 0:3 (قورىتىندى ەسەپ – 4:3)

- پسج – «ميۋ» – 1:3، 2:0 (قورىتىندى ەسەپ – 3:3)

- «مانچەستەر سيتي» – «توتتەنحەم» – 4:3، 0:1 (قورىتىندى ەسەپ – 4:4)

- «يۋۆەنتۋس» – «اتلەتيكو» – 3:0، 0:2 (قورىتىندى ەسەپ – 3:2)