نۇر-سۇلتان قالاسى توتەنشە جاعدايلار دەپارتامەنتى (تجد) اۋدان اكىمدىكتەرىمەن بىرلەسىپ, ماتەريالدىق قيىندىقتارعا تاپ بولعان قالا تۇرعىندارىنىڭ ۇيلەرىندە 1 مىڭنان استام تۇنشىقتىرعىش گازدىڭ ەنۋ قاۋپىن الدىن الاتىن قۇرىلعىنى تەگىن ورناتتى. ەلوردالىق تجد باسشىسىنىڭ مىندەتىن اتقارۋشى مارعۇلان امانباەۆتىڭ حابارلاۋىنشا, قالانىڭ جەكە سەكتورىنا تاعى 2,8 مىڭ وسىنداي داتچيكتەر ورناتۋ قاجەت.
«ءبىز كوپبالالى وتباسىلار مەن زەينەتكەرلەر تۇراتىن ۇيلەرگە 1 062 (583 ۋلى گاز جانە 479 ءتۇتىن) قۇرىلعىلار ورناتتىق. اقمولا كوشەسى, 30 تۇرعىن ۇيىندە ورناتىلعان تۇنشىقتىرعىش گاز داتچيگىنىڭ دابىلىنىڭ ارقاسىندا ءۇش بالاسى بار ايەل ۋلانۋدان امان قالدى», دەپ حابارلادى م.امانباەۆ دۇيسەنبىدە وتكەن اكىمدىكتىڭ وتىرىسىندا.
سونىمەن قاتار, تجد قىزمەتكەرلەرى مامىرلىق مەرەكەلەر ۋاقىتىندا ەۆاكۋاتسيالىق جولداردىڭ جاي-كۇيىن انىقتاۋ ءۇشىن ەلوردانىڭ ويىن-ساۋىق ورتالىقتارى مەن ساۋدا ۇيلەرىن ارالاپ شىققاندىعىن جەتكىزدى. .
نۇر-سۇلتان اكىمى باقىت سۇلتانوۆ ساۋدا نىساندارى مەن ويىن-ساۋىق كەشەندەرىن تەكسەرۋ جۇمىستارىن جالعاستىرۋدى جانە ولاردىڭ 100% قاۋىپسىزدىگىن قامتاماسىز ەتۋدى تاپسىردى. ال استانالىق اۋدانداردىڭ اكىمدەرى حالىقتىڭ الەۋمەتتىك وسال توپتارى تۇراتىن جەكە سەكتورداعى ۇيلەردە تۇنشىقتىرعىش گاز داتچيكتەرىن ورناتۋ بارىسى تۋرالى ەسەپ بەرىپ, سارىارقا اۋدانى بويىنشا وسى ساناتتاعى ازاماتتار گاز تالداعىشپەن تولىق قامتاماسىز ەتىلگەنىن ايتتى. قالعان اۋدانداردا كەستەدەن قالىس قالۋ بايقالادى. مىسالى, ەسىل اۋدانىندا مۇنداي داتچيكتەر ورناتىلۋى ءتيىس 225 ءۇيدىڭ (100-دەن قالىس قالۋ) تەك 50-دە گاز داتچيكتەرى بار.
الماتى اۋدانىندا 500 ۇيدە, بايقوڭىر اۋدانىندا 1 مىڭ ۇيدە گاز داتچيكتەرى ءالى دە ورناتىلماعان. وسىعان بايلانىستى باقىت سۇلتانوۆ اۋدان اكىمدەرىنە جىلۋ بەرۋ ماۋسىمى باستالعانعا دەيىن كومەككە مۇقتاج ۇيلەردە گاز تالداعىشتار ورناتۋدى تاپسىردى.
