ۇلى وتان سوعىسىنىڭ وتتى جىلدارى ەل قورعاۋعا اتتانعان جاۋىنگەرلەر وشپەس ەرلىكتىڭ, قايتپاس قايسارلىقتىڭ, ناعىز قاھارماندىقتىڭ ۇلگىسىن كورسەتە ءبىلدى. جەڭىس وڭايلىقپەن كەلگەن جوق. قانشاما جاۋىنگەرلەر مايدان دالاسىندا وتان ءۇشىن وپات بولدى.
تاريح بەتتەرىندە سۋىق اتپەن تاڭبالانعان سوعىس ارداگەرلەرىن ارداقتاپ, ولاردىڭ ەرلىكتەرىن دارىپتەۋ ماقساتىنداعى سالتاناتتى ءىس-شارادا اۋدان اكىمى باستاعان اۋدان تۇرعىندارى ماڭگىلىك الاۋعا گۇل شوقتارىن قويىپ, ومىردەن وتكەن مايدانگەرلەردى ءبىر مينۋتتىق ۇنسىزدىكپەن ەسكە الىستى.
اۋدان ونەرپازدارى تاراپىنان سوعىس جىلدارىنىڭ قايعى-قاسىرەتى مەن باتىرلارىمىزدىڭ ەرەن ەڭبەكتەرى جايلى ساحنالاستىرىلعان كورىنىستەر قويىلىپ, پاتريوتتىق اندەر شىرقالدى. سونىمەن قاتار, مەرەكەلىك شارادا اسكەري شاتىر تىگىلىپ, قوناقتارعا اسكەري ءدام ۇسىنىلدى. ارداگەرلەرگە سىي-قۇرمەت كورسەتىلدى.
«بۇل مەرەكە جانقيار ەرلىكتىڭ, ەڭسەلى ەلدىكتىڭ رۋحى ورلەپ, جەڭىس جالاۋى جەلبىرەگەن كۇن. ءبىر تۋدىڭ استىنا بىرىككەن كوپتەگەن ۇلت پەن ۇلىس وكىلدەرىن قۇراعان كەڭەس وداعىنىڭ حالقى قاھارماندىق ەرلىك كورسەتىپ وتانىمىزدى جاۋدان قورعاپ قالدى. اعا ۇرپاقتىڭ ۇلى وتان سوعىسىنىڭ وت جالىندى جىلدارىنداعى ەرلىكتەرى, سوعىستان كەيىن حالىق شارۋاشىلىعىن قالپىنا كەلتىرۋ جولىندا قاجىرلى ەڭبەكتەرى ءبىز ءۇشىن وشپەس ونەگە, سارقىلماس مۇرا بولىپ قالا بەرەدى. ءبىز ارقىلى كەلەر ۇرپاقتىڭ جادىنا سىڭىرىلەتىن بولادى» دەگەن اۋدان اكىمى باقىت اسانوۆ جۇرتشىلىقتى ايتۋلى مەرەكەمەن قۇتتىقتادى.
سالتاناتتى مەرەكەلىك شارادان سوڭ اۋدان باسشىسى باستاعان زيالى قاۋىم وكىلدەرى كەڭەس وداعىنىڭ باتىرى جولدىباي نۇرلىباەۆتىڭ مىرزاكەنت كەنتىندەگى ەسكەرتكىشىنە گۇل شوقتارىن قويىپ, تاعزىم ەتتى.
ۋاقىت وتكەن سايىن كەشەگى كۇندەي كۇركىرەپ وتكەن سۇراپىل سوعىستىڭ دۇربەلەڭ وقيعالارى دا اراسىن اۋلاق سالىپ, الىستاپ بارادى. بىراق, قانشالىقتى الىستاعانىمەن ەشقاشان دا كوڭىلدەردەن كەتىپ, جۇرەكتەردەن وشپەك ەمەس.
