العا ادىمدا, العاداي ازامات!
جۇما, 8 اقپان 2013 7:46
زىرلاپ ءوتىپ جاتقان ۋاقىت-اي دەسەڭىزشى! كۇنى كەشە عانا ەدى. جوعارعى كەڭەسكە ءبىر توپ ادامداردان حات ءتۇستى. شەت ەلدەردەن كوشىپ كەلگەندەر ەكەن. تۋعان ەلدەرىنە ورالعاندارىنا قۋانىشتارى قوينىنا سىيمايدى. الايدا, بالالارىن وقىتۋدا ۋاقىتشا كورىپ وتىرعان قيىندىقتارىن ايتادى. ءبىلىم مينيسترلىگىنە جىبەردىك. كوپ كىدىرمەي, جاۋاپ كەلدى. مەيلىنشە, ەگجەي-تەگجەيلى جازىلىپتى.
جۇما, 8 اقپان 2013 7:46
زىرلاپ ءوتىپ جاتقان ۋاقىت-اي دەسەڭىزشى! كۇنى كەشە عانا ەدى. جوعارعى كەڭەسكە ءبىر توپ ادامداردان حات ءتۇستى. شەت ەلدەردەن كوشىپ كەلگەندەر ەكەن. تۋعان ەلدەرىنە ورالعاندارىنا قۋانىشتارى قوينىنا سىيمايدى. الايدا, بالالارىن وقىتۋدا ۋاقىتشا كورىپ وتىرعان قيىندىقتارىن ايتادى. ءبىلىم مينيسترلىگىنە جىبەردىك. كوپ كىدىرمەي, جاۋاپ كەلدى. مەيلىنشە, ەگجەي-تەگجەيلى جازىلىپتى. ماسەلەمەن شىنداپ شۇعىلدانىپ جۇرگەن ادامنىڭ قالام ساپتاسى. اياق جاعىندا ەبىن تاۋىپ ءبىزدى دە قاعىتا كەتىپتى. حات جازعانداردىڭ كوبى تۇركىمەنستان مەن قاراقالپاقستاننان ەكەن. شاماسى, ءىشى بۇرىپ وتىر دەپ ويلاسا كەرەك. الگى اعايىنداردىڭ قينالىپ جازعان جايتتارىن وزدەرىنىڭ دە تۇسىنەتىندىگىن, قولدارىنان كەلگەنشە كومەكتەسىپ جاتقاندارىن ايتىپتى. ەمەۋرىنىن تۇسىنە قويدىم. ك ۇلىپ جىبەردىم. جاۋاپتى كىم جازعانىنا قارادىم. «ءمينيستردىڭ ورىنباسارى ب.ساپارباەۆ» دەپتى.
ول كەزدە جاڭا سايلانعان پارلامەنتتىڭ بابىندا تۇرعان ۋاعى. كۇنارا ۇكىمەت مۇشەلەرىن شاقىرتادى دا جاتادى. كەزەك ءبىلىم مينيسترلىگىنە كەلدى. مينيستر باستاعان بارلىق باسشىلار الدىڭعى قاتارعا كەلىپ جايعاستى. ىشىندە بىرەۋىنىڭ ءوڭى بەيتانىستاۋ كورىندى. «شاماسى, ساپارباەۆ وسى-اۋ!» دەپ ويلادىم. تىپتەن جاس ەكەن. تىعىرشىقتاي اقسارى جىگىت. دۇرسە قويا بەرگەن دەپۋتاتتاردىڭ قارشا بوراعان قاتىگەز ساۋالدارىن ءۇنسىز تىڭداپ وتىردى. سىر بىلدىرگەن جوق. وزىنە ءوزى سەنىمدى. الدەنەلەردى قاعازىنا ءتۇرتىپ الىپ, سۇراق تۇسە قالسا, جاۋاپ بەرۋگە ءازىر وتىر.
از ۋاقىت وتە قىزىلوردا وبلىسىندا اكىم اۋىستى. ارال تەڭىزىنەن باستاپ, ءبارى قۇرعاپ, ءبارى قيراپ جاتقان وڭىرگە وزگە ادام تابىلماعانداي قارشاداي جىگىت تاعايىندالعانىن سان-ساققا جۇگىرتۋشىلەر دە تابىلدى. سول كەزدە جول-جونەكەي مەنىڭ دە قىزىلوردادا بولعانىم بار. بۇرىن دا كەم-كەتىگى كوپ قالانىڭ تىپتەن ازىپ كەتكەن تۇسى ەكەن. مەيمانحاناسى اڭعال-ساڭعال. تەرەزەسىن اشىپ قويساڭ, اۋىزدارىن ارانداي اشىپ, انتالاعان ماسا تاپ بەرەدى. جاۋىپ قويساڭ, قاپىرىقتان ءولىپ باراسىڭ. تاڭ اتقانشا كوز ىلمەي شىقتىق. جۋىناتىن سۋى دا جوق. توت باسىپ كەتكەن تەمىر تۇتىكتەردەن قويمالجىڭ بىردەڭە اعادى. «اي, بۇل قىزىلوردا بەردىبەكتىڭ شاشىن ءالى تالاي اعارتادى عوي», – دەپ ويلادىق ىشىمىزدەن. ءوزى قالادا جوق ەكەن. الدەبىر اپاتتى جاعداي شىعىپ قالىپ, اۋدانداردىڭ بىرىنە كەتىپتى.
كوشەگە شىقساڭ, قايداعى ءبىر قوقىر-سوقىردىڭ ءبارى قالىقتاپ اسپاندا ءجۇر. بۇرقىراعان جەل ءارى ۇيتقىتىپ, بەرى ۇيتقىتىپ, اقىرىندا سيقى كەتكەن سىم باعاندارعا اپارىپ قوندىرادى. ءبىر توپ بالا الدەبىر دومالاقتى دوپ قىلىپ تەۋىپ, ءوزارا شۋىلداسىپ ويناپ ءجۇر. كوڭىلگە ءۇمىت وياتاتىن تەك سول ءبىر كوڭىلسىزدەۋ كورىنىس قانا. ەسى كەتكەنشە ويناپ, ءتاتتى ۇيقىعا شومۋدى اڭسايتىن بالالىق قيال ءالى بار ەكەن. سول بار جەردە ەشتەڭە ولمەيدى. ءبارى دە وزگەرەدى, ءبارى دە تۇزەلەدى.
القىمنان قىسقان اۋىر سەزىم ازداپ جەڭىلدەگەندەي بولدى. كەلەڭسىزدىكتەرگە بەلشەسىنەن باتقان قالا قوڭىرايىپ قالىپ بارادى. شامالىدا ونى مىناۋ ويسىراعان مەشەۋ حالدەن ەشكىم اجىراتا الماستاي كورىنگەن. جوق, ونىمىز بەكەرشىلىك ەكەن. كوپ ۇزاماي, جاعداي وزگەرە باستادى. قىزىلوردانىڭ اتىنا ءباسپاسوز بەتىندە جىلى ءسوز ايتۋ جيىلەدى. «قولدا وسكەن تايلاقتىڭ بوتا اتى قالمايدى» دەگەندەي, بەردىبەك سول كەزدەگى اكىمدەردىڭ ەڭ جاسى بولعاندىقتان, جۇرتشىلىق تاراپىنان بىردەن ىقىلاس تابا الار ما ەكەن دەگەن كۇدىك سەيىلدى. جاڭاقورعاندا تۋىپ-وسكەن جاس جىگىت كۇنى-ءتۇنى ءبىر مىگىر تاپپادى. «كىندىك قانى تامعان ولكە عوي. وزىمدىكى دەگەندە وگىز قارا كۇشىم بار دەگەن وسى عوي. سىر بويىنىڭ شاڭداعىنا بەلشەسىنەن باتىپ وسكەن جىگىت قوي. جان-جاعىنان انتالاپ, جابىسىپ باققان قالىڭ شەڭگەلىنە مالتىعىپ, كومىلىپ قالماي, شىقتى عوي سۋىرىلىپ!» دەپ سۇيسىندىك.
سويتكەن بەردىبەك ايدى اسپانعا ءبىر-اق شىعاردى. كورشى وڭتۇستىك قازاقستان وبلىسىنا اكىم بولىپ اۋىستى. ءبارىمىز دە ءىشىمىزدى تارتتىق. كەشەگى توقپاعى قاتتى كەڭەس زامانىندا دا ەشكىمگە وڭاي يلىگە قويماعان ءوڭىر ەدى. اسىرەسە, توقىراۋ تۇسىنداعى ءارى يتەرىپ, بەرى جىققان كەزەڭدە اتى دۇرىلدەپ شىققان-دى. وعان نەبىر ىسىلعان شارۋاشىلىق باسشىلارى دا جۇمسالدى. كورنەكتى-كورنەكتى عالىمدار دا قويىلدى. باياعى شىعىپ قالعان اتاعى ءبارىبىر بوي بەرە قويمادى. ەڭسەرىلۋدىڭ ورنىنا بۇرىنعى جاماناتتىڭ ۇستىنە جامانات جامالا ءتۇستى. سونداي ولكەگە اققاپتال, كوپتى كورگەندەردىڭ بىرەۋى جىبەرىلمەي, بۇعاناسى ءالى قاتىپ, بۋىنى بەكي قويماعان بەردىبەك جىبەرىلىپ وتىر. الىپ كەتە السا, جارايدى… تاقىمىمىزدى قىسا تۇستىك. ايتىلا-ايتىلا سىلىكپەسى شىققان ەسكى اڭگىمەلەر قايتا گۋلەدى. بىراق, بەردىبەك سىر بەرمەدى. شىداپ باقتى.
وبلىس جەر كولەمى جاعىنان ورتاڭقول. حالىق مەيلىنشە كوپ شوعىرلانعان. ەكى ميلليوننان اسىپ, ءۇش ميلليونعا قاراي اياق باستى. ەكونوميكانىڭ قاي سالاسى دا بار. قازاقستاندا قانداي حالىق بولسا, سونىڭ ءبارىنىڭ دە وكىلدەرى تابىلادى. ءداستۇرلى مالشىلىقپەن قوسا, ديقانشىلىق باياعىدان ورىستەگەن. ساۋدا-ساتتىق تا قاتتى دامىعان. وسىنداي ولكەنىڭ ەكونوميكاسىن تۇبەگەيلى قايتا قۇرىپ شىعارۋدىڭ قانشالىقتى كۇردەلى ەكەندىگىن ايتپاساق تا تۇسىنىكتى. ءبىرىن اياعىنان ەندى تۇرعىزىپ جاتساڭ, ەكىنشىسى جالپ ەتىپ قۇلاپ جاتادى. مۇنداي جاعدايدا باستاعان ءىستى اياعىنا دەيىن الىپ بارۋعا جىگىتتىڭ جىگىتى عانا شىدايدى.
قۇدايعا شۇكىر, بەردىبەككە دە سونداي شىدام بەرىپتى. ونىڭ جاپ-جاس جىگىتتىڭ بويىنا قايدان ءبىتىپ جۇرگەنىن كوپ ۇزاماي ءوز كوزىممەن كوردىم. جامانات حابار جاتپايدى عوي, الماتى مەن تارازدىڭ اراسىندا اسا اۋىر جول اپاتى بولىپتى. جاپ-جاس جىگىت وقىستا اپاتقا ۇشىراپتى. بەردىبەكتىڭ جوعارى وقۋ ورنىندا وقىپ جۇرگەن ۇلى قازا تاۋىپتى. كوڭىل ايتۋعا ۇيىنە باردىق. ءيىن تىرەسكەن قالىڭ جۇرتتىڭ اراسىندا تىرىدەي جەرگە ءسىڭىپ بارا جاتقانداي بولىپ ابدىراعان وتاعاسى تۇر. اۋەلدەگى ءوڭىنىڭ نە اق, نە قۇبا ەكەندىگى بەلگىسىز. كۇنى-ءتۇنى تۇرەن ايداپ, جەر جىرتىپ ەگىن سالعان كۇس-كۇس قول. جازدىڭ اپتابى مەن قىستىڭ سۋىعى بىردەي قاقاپ, ابدەن جەل قاعىپ, قارا سۇرلانىپ العان. يىقتان ءزىل باتپان بولىپ باسقان اۋىر قاسىرەتتىڭ قانشالىقتى ەزە تۇسكەندىگىن سەزدىرگىسى كەلمەي, كوڭىل ايتا كەلگەندەردىڭ قاي-قايسىمەن دە ءۇنسىز امانداسىپ, ءۇنسىز تىلدەسىپ تۇرعانداي. شوقپارداي مىعىم قولدارداعى بولماشى ءدىرىل عانا جان دۇنيەسىندەگى الاي-دۇلەيدەن سەس بەرگەندەي. مەزگىلسىز مەرت بولعان قىرشىن بوزداق پەن ارتىندا اڭىراپ قالعان اتا-اناسىن قوسا اياپ, ەگىلىپ, سوگىلىپ بارا جاتقانداي. تىلەك ايتۋشى كوپتىڭ قولىنان نە كەلەدى؟! كوپ جىل ەڭبەك ەتكەن بەينەتقوردىڭ كۇس-كۇس قولىن ءۇنسىز قىسىپ قينالا قوش ايتىستىق.
استىنداعى جەر ويىلىپ بارا جاتسا دا مىڭق ەتپەيتىن اۋىر مىنەزدى, بىرتوعا ادامنىڭ جاي-جاپسارىن مىرزاشولگە بارعاندا ەستىدىم. بەردىبەك جاڭاقورعاندا وسكەنمەن, ماشەكەڭنىڭ جاستىق شاعى مىرزاشولدە ءوتىپتى. بەينەتقورلىعى سونداي, ەگىس باسىندا جۇرگەندە, ۇيگە شاقىرىپ كەلتىرە المايدى ەكەنسىڭ. كۇن-ءتۇن جۇمىس دەپ وماقاسىپ جۇرگەنى. تاۋسىلمايتىن دا, بىتپەيتىن سىلپىڭ شارۋا.
سونداي ديقاندار ورتاسىندا تۋىپ-وسكەن العىر ازامات بەردىبەكتىڭ دە جاتسا-تۇرسا ويلايتىنى – جۇمىستىڭ قامى. مەن وڭتۇستىكتە ونىمەن ءبىر اپتا بولىپ, وبلىستى ارالادىم. سوندا ونىڭ ءوزى تۋعان ولكەنىڭ ەكونوميكاسىن جاتقىزىپ-ورگىزەتىنىن ءبىلدىم. كەيىنگى اۋدارما-توڭكەرمەلەر ەجەلگى شارۋاشىلىقتاردى قالپىنان شىعارىپ, بۇرىنعى جۇيەسىنە دالمە-ءدال كەلەتىن بالامالار تاۋىپ بەرە الماي جاتىر ەكەن. ول تۋرالى ايتقاندا, ارمانداعاندا سوزگە تۇيىقتاۋ جىگىت جۇلدىزداي اعادى. ءبىر كەزدە اسپان استىن تۇگەل يەمدەنگەن ماقتا شارۋاشىلىعىنداي ءتۇسىمدى كاسىپتىڭ باسىنان باق اۋىپ بارادى. سول بەتىمەن ۇلعايتا بەرۋگە جەكە شارۋاشىلىقتار ق ۇلىقسىز. ونىڭ ۇستىنە سونشالىقتى سۋارمالى ەگىسكە سۋ تاۋىپ بەرۋ دە وڭاي شارۋا ەمەس. ءبارىن قولمەن وتاپ, قولمەن بۇتارلايتىن داۋرەن كەتىپ بارادى. ءبارىن جاپپاي مەحانيكالاندىرۋدىڭ دا ويلاناتىن ماسەلەسى كوپ. جەردى دە ابدەن توزدىرعان. تىڭايتقىشسىز ءونىم بەرمەيدى. سونشاما ماشاقاتپەن كەلگەن ءونىمدى وتكىزۋدىڭ ءوزى – قارلى قاراتاۋ.
مەن بارىپ كورگەن كەزدەگى وڭتۇستىكتىڭ كورگەن كۇنى وسىنداي ەدى. وسىنشاما قيىندىقتاردىڭ اراسىنان ىلدەلەپ جول تاۋىپ, شارۋاشىلىق ءوربىتىپ جاتقان-دى. سۋدى ۇنەمدەمەي بولمايدى. ول ءۇشىن ءبىر كەزدەگى تارتقان يرريگاتسيالىق جۇيەلەردىڭ ءبارىن ايناداي قىلىپ تازارتقان ءجون. كەيىنگى كەزدە قالاي بولسا سولاي جۇرگىزگەندىكتەن, ولاردىڭ كوبىنىڭ ءىزى جوعالىپ بارا جاتىر. ءبىز اۋىلداردا ەسكى كانالدار مەن ارىقتاردى قالپىنا كەلتىرۋدىڭ قىزىپ جاتقان تۇسىندا بولدىق. ولاردى تازالاۋىن تازالاعانمەن, بارىنە سۋ جەتكىزە الساڭ, جاقسى. جەتكىزە الماساڭ, كەزەنەسى كەۋىپ قالعان جۇلگەلەر كۇل-قوقىسقا قايتا تولادى. ونداي سۋ جەتكىزۋ دە وڭاي شارۋا ەمەس. تاۋدىڭ باس جاعىن بوگەپ, ەجەلگى ديقان كورشىلەر وتىر. ولار تامشىلاتىپ ازەر جىبەرگەن سۋدى قىستا قايدا سىيعىزارىن بىلمەي, ارناسايعا بۇرىپ, بۇرىنعى يەلەرىنە قايتا اسىرىپ جاتىرمىز. سونى ايتقاندا بەردىبەكتىڭ كوزى بۇرىشتانىپ, مولتەڭدەپ كەتەدى. كەيىننەن بۇل ماسەلەنى كوكساراي سۋ قويماسىن سالدىرتۋ ارقىلى ەلباسىمىز شەشىپ بەردى.
ءجۇرىپ جاتقان جۇمىستاردىڭ جاي-كۇيىمەن تانىسىپ, تۇركىستانداعى, كەنتاۋداعى, شولاققورعانداعى, باباتاداعى, شايانداعى, بوگەندەگى, لەڭگىردەگى, شاراپحاناداعى, سارىاعاشتاعى, كەلەستەگى, شارداراداعى, مىرزاشولدەگى اعايىنداردىڭ كارى-جاسىنىڭ قوس باسىنداعى كەزدەسۋلەردە ايتقاندارى دا جول-جونەكەي بەردىبەك ايتىپ كەلە جاتقان اڭگىمەلەرگە سايادى.
ول كەزدە وڭتۇستىكتەگى كوپ ءوندىرىس ورىندارى قاڭتارىلىپ تۇرعان. س ۇلىق تۇرعان زاۋىتتار مەن ەسىك, تەرەزەسى سىپىرىلعان ءۇي قاڭقالارىنان كوز تۇنادى. سولاردى ارالاپ كەلە جاتقان ءبىزدىڭ دە جەلپىنۋىمىزدەن اھىلاپ-ۋھىلەۋىمىز كوبىرەك. بار مەدەت ەتەرىمىز – قايدا بارساق تا تىرباڭداپ ەڭبەك ەتىپ جاتقان حالىققا كەزدەسەمىز. جۇرتشىلىق اراسىنا كەلگەندە, بەردىبەك قالىڭ توپقا ءسىڭىپ جوعالادى. قاپەلىمدە باستىعى قايسى, باسقاسى قايسى ەكەنىن بىلە المايسىڭ.
كوز الدىما تاعى ماشەكەڭ كەلدى. شاشىن تاقىرلاپ الدىرعان دومالاق باس, كۇنگە كۇيە-كۇيە اۋەلدەگى ءوڭىن جوعالتقان دوڭگەلەك ءجۇز, مىج-مىج اجىمدەر ايعىزداعان كەڭ ماڭداي, تۇنجىراڭقى جانار.
ماقتاشىلار قوسىندا دا, باقشاشىلار كۇركەسىندە دە, جول جيەگىندەگى كوپ سالەمشىلەر دە – ءبارى دە ماشەكەڭە ۇقسايدى. سولاردىڭ اراسىندا كوپتىڭ اۋزىنا قاراپ, ايتقاندارىن ءۇنسىز تىڭداپ, ءۇنسىز ۇعىپ تۇرعان بەردىبەك تە اكەسىنە ۇقسايدى. بارىنەن دە حالدەرىن سۇراساڭ «شۇكىر!» دەيدى. شارۋالارىن سۇراساڭ «جامان ەمەس!» دەيدى. بالالارىنا تيەسىلى اقشانىڭ بەرىلمەي جاتقانىن ايتقان ايەلدەرگە جۇزدەرىن سۋىتىپ جاقتىرماي قارايدى.
ول جارىقتىقتارعا نە كەرەك ەكەنىن بەردىبەك تە بىلەدى. ءبىز دە بىلەمىز. بىراق اسپانداعى ايعا قولىمىز جەتپەي جاتىر. بۇگىن بولماعانمەن, ەرتەڭ بولاتىنىنا سەندىرىپ ءارى قاراي جونەلدىك.
ول كەزدەر دە ءوتتى. وڭتۇستىككە بارىپ قايتقان مەنەن «بەردىبەك قالاي ەكەن؟» دەپ سۇراعاندارعا: «بەلى بۋلى, جەڭى سۇعۋلى. كۇنى-ءتۇنى جۇمىستا. جۇمىس ىستەپ جۇرگەن جىگىتكە ايتىلاتىن ءسوز كوپ قوي!» دەپ كۇلدىم. ولار دا كۇلدى.
ارتىنان استاناعا الدىرىلدى. كەدەننىڭ قاي كەزدە شارۋاسى وڭعان؟! ول كەزدە سىن كوپ ايتىلىپ تۇرعان كەز ەدى. بەردىبەك كەلدى دە ۇرشىقتاي ءۇيىرىپ اكەتتى. ەڭبەك پەن الەۋمەتتىك قورعاۋدىڭ دا ايتاتىنى كوپ ەدى, ۇستاتاتىنى جوق-تى. جۇمىسسىزدىق ازايماي تۇرعان. كىسىدەگىنىڭ كىلتى اسپاندا. شەتەلدىك ينۆەستورلار تىپتەن ماڭايلاتپايدى. كەلىسىم-شارتتار باياعىدا جاسالعان. ولاردى رەتتەيتىن زاڭدار قايتا قارالماعان. قوردالانىپ قالعان كوپ ماسەلەلەردى قولعا الۋعا كوبى بەتىنەن باسادى. ەڭبەك ءمينيسترى بولىپ تاعايىندالعان بەردىبەك ىسكە بەل شەشە كىرىستى. ءبىراز شارۋانى دوڭگەلەتىپ تاستاعاندا شىعىس قازاقستانعا جىبەرىلدى.
ول تاراپتا دا اتقارىلماي جاتقان ءبىراز شارۋالار بولىپ شىقتى. قايدا دا بەردىبەكتى كۇردەلى شارۋالار كۇتىپ تۇرادى. سول جىلى قىس قاتتى بولدى. اۆتوتراسسالاردى تاۋ-تاۋ قار باسىپ قالدى. اياعىنا كەرزى ەتىگىن كيىپ, يىنىنە فۋفايكاسىن ءىلىپ, كوپپەن بىرگە ءجۇرىپ, قار ارشىستى. كوكتەمدە قار ەرىپ, تاۋ وزەندەرى تۇگەل تاسىدى. كەشەگى قارعا مالتىققان قالالار مەن اۋىلداردى قالقىعان سۋ جايلادى. جۇرت جەتىسۋداعى قىزىلاعاش وقيعاسىنا قىنجىلىپ جاتقاندا, التايدا ونداعان اۋىلدار جوڭكىگەن تاسقىننىڭ جولىندا قالدى. ءتۇبى قايىر. جاز ورتالاي اپاتتىڭ بەتى بەرى كارادى.
ودان بەرى دە ءبىراز جىلدىڭ ءجۇزى اۋدى. ءدايىم, العى شەپتە قىزمەت ەتكەن قولباسشىلارداي بەردىبەك تە جاڭا وبلىسقا بوي ۇيرەتە باستادى. شىعىستىڭ اتى – شىعىس. شارۋالارى وڭتۇستىكتەگىدەن ءبىر دە كەم ەمەس. ءبىر وزىنە بۇرىنعى ەكى وبلىس توپتاسقان. سەمەي اسا ءىرى جەڭىل جانە تاماق ونەركاسىبى مەن مال شارۋاشىلىعىن وركەندەتسە, التاي – كەن قازۋ مەن مەتاللۋرگيا سىندى اۋىر ونەركاسىپتىڭ ولكەسى. دامىپ جاتقان ەنەرگەتيكاسى تاعى بار. ەگىنى مەن مالى, بالىعى مەن بالى, بۇعىسى مەن مارالى ءيىن تىرەسىپ تۇر. الەمدەگى ەڭ ءىرى ەكى مەملەكەتپەن شەكارالاس. جەدەل دامىپ جاتقان ەكى ەكونوميكانىڭ دا قارقىنىنا كۇللى الەم كوز تىگىپ وتىر. سولارمەن ىرگەلەس وتىرعان وسكەمەننىڭ ءسال كەم-كەتىگى انتەك كوزگە شالىنادى. سوندىقتان, بۇل وبلىستىڭ قاي شارۋاشىلىعى دا الەمدىك ەكونوميكامەن وزەكتەسە, قارقىندى دامۋى كەرەك. قۇدايعا شۇكىر, بەردىبەك كەلگەلى بۇل ماسەلەدە دە ىلگەرىلەۋشىلىك بار. التايدىڭ اسەم تابيعاتىنىڭ قاق تورىنە ورنالاسقان وسكەمەننىڭ قىز كوكىرەگىندەگى مەرۋەرت جامبىداي جارقىراماسقا ءجايى جوق.
جۇمىس تا جىمىسقى تۇلكى عوي. ءسال قارايعان كورىنسە, قالقالاپ, تۇبىنە تىعىلىپ جاتىپ الادى. ونى دا ىزدەگەن كورەدى. بەردىبەك تە ەل ءۇشىن ەتەر قىزمەتتى ءوزى ىزدەپ تاۋىپ الادى.
نارىق جولىمەن العا باسقان ەلىمىزدىڭ ستراتەگياسى مەن تاكتيكاسىن ەلباسى جاساقتايدى. ونىڭ جەرگىلىكتى كورىنىستەرىن كوزگە ەلەستەتۋ مەن جىلىكتەپ-جىكتەپ ىسكە اسىرۋ جەرگىلىكتى بيلىكتىڭ قولىندا. بۇكىل سانالى ءومىرىن تاۋەلسىزدىكپەن بىرگە جاساپ, بىرگە اتقارىپ كەلە جاتقاندار اراسىندا بەردىبەك ساپارباەۆتىڭ الار ورنى ايرىقشا.
الپىسقا تولىپ وتىرعان ازامات ەلىمەن بىرگە ەسەيىپ, ەلىمەن بىرگە كوسەگەسى كوگەرىپ جاتىر.
شىعىستان اتقان ءار تاڭ الدىمەن التايدى نۇرعا بولەيدى. التايدى جارقىراتقان نۇر بۇكىل قازاق دالاسىن كەۋلەيدى. بۇل ۇدەرىس ۇدەي تۇسپەك. سونداي جويقىن سەرپىلىستىڭ وڭىردەگى باس ديسپەتچەرى بەردىبەك ساپارباەۆ بۇرىنعىسىنشا جاۋاپتى ۆاحتادا. ءار كەشىڭىز تابىستى اياقتالىپ, ءار تاڭىڭىز ءساتتى باستالعاي, العاداي ازامات!
ءابىش كەكىلباي ۇلى.
