2017 جىلى ارالدىڭ تۇزى ءازىربايجان مەن گرۋزياعا ەكسپورتتالا باستادى. سونىمەن قاتار, 2018 جىلى «ارالتۇز» اق العاش رەت ۋكراين نارىعىنا 462 توننا تۇز جونەلتتى. ال 2019 جىلى تاۋار كولەمىن ۋكرايناعا 3 ەسەگە, ال رەسەيلىك نارىققا جونەلتىلەتىن ءونىم كولەمىن 20% ارتتىرۋ جوسپارلانىپ وتىر.
«قازىرگى تاڭدا «ارالتۇز» اق ءوز ءونىمىنىڭ 65% شەتەلگە شىعارادى, سوڭعى 3 جىلدا رەسەي نارىعىنىڭ 13% جاۋلاپ السا, قىرعىزستانداعى ۇلەسى 50% قۇرايدى. 2017 جىلى ارالدىڭ تۇزى ءازىربايجان مەن گرۋزياعا ەكسپورتتالا باستادى. الداعى ۋاقىتتا تاۋار وتكىزۋ نارىعىن كەڭەيتۋدى, ال 2019 جىلدان باستاپ قىتاي نارىعىنا شىعۋدى جوسپارلاپ وتىرمىز», دەپ مالىمدەدى «ارالتۇز» اق ديرەكتورلار كەڭەسىنىڭ توراعاسى داۋرەن مۇقاشەۆ.
يندۋستريالاندىرۋ كارتاسى اياسىندا كاسىپورىندا تۇز شىعاراتىن يسپاندىق 2 تسەح ىسكە قوسىلدى. زاۋىتتىڭ قايتا جاڭعىرتىلۋى ەڭبەك ونىمدىلىگىن ەكى ەسەگە ارتتىرىپ, 1200-دەن استام ادامدى جۇمىسپەن قامتۋعا, قىزمەتكەرلەردىڭ جالاقىسىن 60 پايىزعا دەيىن ارتتىرىپ, ءونىمنىڭ وزىندىك قۇنىن 40 پايىزعا تومەندەتۋگە مۇمكىندىك بەردى. ۇستىمىزدەگى جىلدىڭ قاڭتار ايىنان باستاپ قازاقستان رەسپۋبليكاسى تۇڭعىش پرەزيدەنتى – ەلباسىنىڭ تاپسىرمالارىن ورىنداۋ ماقساتىندا جۇمىسشىلاردىڭ باسىم بولىگىنىڭ جالاقىسى 26% ارتتى.
