كورمە باعدارلاماسىنىڭ اياسىندا قاتىسۋشىلار ساراپشىلاردىڭ كەڭەسىن تىڭدادى, قوستانايدا تۋريستىك بيزنەسىن دامىتقىسى كەلەتىن شەتەلدىك ارىپتەستەرمەن كەلىسىمدەر جۇرگىزدى, وتاندىق ىسكەر ارىپتەستەرمەن پىكىر الماستى.
«QOSTANAI. TÝRIZM 2019» كورمەسىنە قاتىسۋشىلار مەن كەلۋشىلەر وبلىستاعى تۋريستىك باعىتتاعى «سوسنوۆىي بور», «جايلاۋ», «ەۆرازيا» ەمدەۋ-ساۋىقتىرۋ ورتالىقتارىنىڭ, «گلوريا», «مەدەۋ», «تۋريست», «تسەليننايا», «سپەتسناز», «زولوتوي فازان» سياقتى قوناق ءۇي-مەيرامحانا كەشەندەرىنىڭ وكىلدەرىمەن پىكىرلەستى, تۋريستىك وپەراتورلاردان كەڭەستەر الدى.
قوستانايدا تۋريزم سالاسى ەندى دامىپ كەلەدى. ازىرگە ونىڭ تابىسى ايتارلىقتاي ەمەس, ارينە. وتكەن جىلى 1 ميلليارد 700 ميلليون تەڭگەنىڭ قىزمەتى كورسەتىلگەن. بۇل نەگىزىنەن ەمدىك-ساۋىقتىرۋ ساناتوريلەرى مەن قوناق ءۇي-مەيرامحانا كەشەندەرىنىڭ قىزمەتىنەن تۇرادى.
«ءبىزدىڭ وبلىستا ءتۋريزمنىڭ ەمدەۋ-ساۋىقتىرۋ جانە اڭشىلىق-بالىقشىلىق تۇرلەرىنە باسىمدىق بەرىلەدى. ول ءۇشىن نەگىزىنەن التىنسارين اۋدانىنىڭ كۋرورتتىق ايماقتارىندا جانە امانگەلدى, تورعاي, ارقالىق وڭىرىندە جۇمىستار جۇرگىزىلەدى. قازىر التىنسارين اۋدانىنداعى ساناتوريلەرگە جىلىنا 20 مىڭ ادام كەلىپ دەمالىپ, دەنساۋلىقتارىن تۇزەيدى. تورعاي-ارقالىق وڭىرىنە جىلدىڭ بار ماۋسىمىندا اڭشىلىق جاساپ, بالىق اۋلاۋعا قازاقستاننىڭ وڭىرلەرىمەن قاتار, شەتەلدىك تۋريستەر دە كەلە باستادى. ءتۋريزمنىڭ بۇل ءتۇرىن دامىتۋ ءۇشىن جولداردى جوندەپ, ولار توقتايتىن اڭشىلىق ۇيلەرىن سالۋ جۇمىستارى اتقارىلاتىن بولادى» دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ تۋريزم جانە ليتسەنزيالاۋ ءبولىمىنىڭ باسشىسى تالعات كوتەمباەۆ.
كورمە سوڭىندا وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باتىس قازاقستان, سولتۇستىك قازاقستان وبلىستارىنداعى ارىپتەستەرمەن جانە باسقا دا تۋريستىك كومپانيالارمەن تۋريستىك باعىتتار جاساۋ جانە اقپاراتتار الماسۋ, بارلىق ايماقتا ىشكى ءتۋريزمدى دامىتۋداعى ىنتىماقتاستىق تۋرالى مەموراندۋمعا قول قويدى.
