رۋحانيات • 03 مامىر، 2019

قاراعاندىدا قوعام قايراتكەرى شايمەردەن ورازالينوۆپەن قوشتاستى

885 رەت كورسەتىلدى

كەنشىلەر استاناسىنداعى ك.ستانيسلاۆسكي اتىنداعى ورىس دراما تەاترىندا 1987-1997 جىلدار ارالىعىندا قاراعاندى قالاسىنىڭ اكىمى بولعان شايمەردەن ءورازالينوۆتى اقتىق ساپارعا شىعارىپ سالۋ ءراسىمى ءوتتى.

پەتروپاۆل قالاسىندا دۇنيەگە كەلگەن مارقۇممەن قوشتاسۋ ءۇشىن سولتۇستىك قازاقستان وڭىرىنەن وبلىستىق ءماسليحات حاتشىسى ۆلاديمير بۋبەنكو باستاعان دەلەگاتسيا كەلدى. سونىمەن قاتار، قارالى جيىنعا پارلامەنت ءماجىلىسىنىڭ دەپۋتاتتارى، ەنەرگەتيكا ۆيتسە-ءمينيسترى سۇڭعات ەسىمحانوۆ، وبلىس باسشىلىعى جانە مارقۇمنىڭ تۋعان-تۋىستارى، جاقىندارى مەن دوستارى قاتىستى.

قوشتاسۋ راسىمىنە قاتىسقان قاۋىم شايمەردەن ءورازالينوۆتىڭ قاراعاندىنى قيىن-قىستاۋ جىلدارى ابىرويمەن باسقارعانىن،  داعدارىستارعا تويتارىس بەرىپ، قالا مەن ونىڭ تۇرعىندارىن كوممۋنالدىق قيىندىقتاردان الىپ شىعۋدا جانە باسقا دا تولىپ جاتقان پروبلەمالاردى شەشۋدە ەرەن ەڭبەك سىڭىرگەنىن تەبىرەنىسپەن ەسكە الدى.

شايمەردەن ءورازالينوۆ 1942 جىلدىڭ 11 قاراشاسىندا پەتروپاۆل قالاسىندا دۇنيەگە كەلگەن. 1965 جىلى قاراعاندى پوليتەحنيكالىق ينستيتۋتىن «تاۋ-كەن ينجەنەرى» ماماندىعى بويىنشا ءتامامدادى. تاۋ-كەن سالاسىندا قاتارداعى شەبەردەن باستاپ كەن-بايىتۋ فابريكاسىنىڭ ديرەكتورى لاۋازىمىنا دەيىن كوتەرىلگەن. 1984 جىلى قاراعاندى قالاسىنىڭ وكتيابر اۋدانى اتقارۋشى كوميتەتىنىڭ توراعاسى قىزمەتىنە تاعايىندالدى. ودان كەيىن 1987 جىلدان 1997 جىلعا دەيىن ون جىل قاتارىنان قاراعاندى قالاسىنىڭ اكىمى قىزمەتىن اتقاردى. قاراعاندى وبلىسى اكىمى جانىنداعى تارتىپتىك كەڭەستىڭ توراعاسى بولدى.

شايمەردەن ءورازالينوۆ ەكى رەت پارلامەنت ءماجىلىسىنىڭ دەپۋتاتى بولىپ سايلانعان. 2009 جىلدان باستاپ قايتىس بولعانعا دەيىن قازاقستان ەلەكتر ەنەرگەتيكالىق قاۋىمداستىعىنىڭ توراعاسى قىزمەتىن اتقاردى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار