ايماقتار • 02 مامىر، 2019

جاس ءانشى ەرجان ماكسيمگە جەرلەستەرى قۇرمەت كورسەتتى

751 رەت كورسەتىلدى

رەسەيدە وتكەن «گولوس. دەتي» بالالار مۋزىكالىق شوۋىنا قاتىسىپ، كورەرمەندەردىڭ ىستىق ىقىلاسىنا يە بولعان ورالدىق جاس ءانشى ەرجان ماكسيمدى جەرلەستەرى اۋەجايدان سالتاناتپەن كۇتىپ الىپ، باتىس قازاقستان وبلىسىنىڭ اكىمى التاي كولگىنوۆ ارنايى قابىلدادى.

جاستىعىنا قاراماي تالاي حالىقارالىق ءان بايقاۋىنا قاتىسىپ ۇلگەرگەن ەرجان ماكسيم 2016 جىلى گرۋزيا مەن لاتۆيادا وتكەن «دەلفين فەست» فەستيۆالدەرىنىڭ باس جۇلدەسى مەن بىرنەشە مەدالىن، 2017 جىلى حالىقارالىق «سلاۆيان بازارى» ءان بايقاۋىنىڭ 2 ورىن جۇلدەسىن جەڭىپ الىپ، يتاليادا وتكەن «San-Remo junior» بايقاۋىنىڭ فينالىندا ءان شىرقاعان تالانت. رەسەيلىك №1 تەلەارناسى بايقاۋىندا دا قازاقستاندىق جاس ءانشى بىردەن مامانداردىڭ دا، كورەرمەن قاۋىمنىڭ دا كوڭىلىنەن شىعىپ، فينالدىق باسەكەگە قيىندىقسىز جەتتى. بايقاۋدىڭ باس جۇلدەسىن رەسمي الماسا دا ەرجان ماكسيمدى جەڭىمپاز تانىپ، قۇتتىقتاۋشىلار كوپ. ماسكەۋدەن ابىرويمەن ورالعان جاس ءانشىنى قازاقستاندىقتار ەرەكشە قولداپ، قۇرمەت بىلدىرۋدە. تۋعان جەرى – ورال قالاسىنا ورالعان جەڭىمپازدى اۋەجايدان ورال قالاسى اكىمىنىڭ ورىنباسارى باقىتجان نارىمبەتوۆ، باتىس قازاقستان وبلىستىق مادەنيەت باسقارماسى باسشىسىنىڭ ورىنباسارى سايران دۇيسەنتەگى باستاعان ۇلكەن توپ قۇرمەتپەن كۇتىپ السا، ءوڭىر باسشىسى التاي كولگىنوۆ ارنايى قابىلداپ، سىيلىققا دومبىرا ۇسىندى.

- ەرجاننىڭ تالانتىنا بەلگىلى ءانشى الىبەك دىنىشەۆتىڭ ءوزى ريزا بولىپ، جوعارى باعا بەردى. وسى جەتىستىكپەن توقتاپ قالماي، ونەرىن ودان ءارى دامىتۋ ءۇشىن كاسىبي ماماندارمەن جۇمىس ىستەۋ كەرەك. ءبىز بۇل باعىتتا بارىنشا كومەك كورسەتۋگە ءازىرمىز، - دەدى التاي كولگىنوۆ. باتىس قازاقستان وبلىسىنىڭ اكىمى ەرجانعا بايقاۋ كەزىندە تەلەفون ارقىلى حابارلاسىپ، قولداۋ ءبىلدىرىپ وتىرعان ەكەن.

ماسكەۋدەگى بايقاۋدان ابىرويمەن ورالعان جاس ءانشىنى اۋەلى استانادا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى قابىلداپ، ەرجانعا «شابىت» قازاق ۇلتتىق ونەر ۋنيۆەرسيتەتىندە تەگىن وقۋدى ۇسىنعانىن ايتا كەتەيىك. قازىر الەمگە تانىمال ءانشى ديماش قۇدايبەرگەن دە مەكتەپ-كوللەدج-جوو دەڭگەيىندە ءۇزىلىسسىز مامانداندىرىلعان ءبىلىم بەرەتىن بىرەگەي وقۋ ورنىندا وقىعان ەدى.


باتىس قازاقستان

سوڭعى جاڭالىقتار

جارىس پەن تابىس

ەكونوميكا • بۇگىن، 00:00

اقىلدىڭ ازابى

تاريح • كەشە

مەيرامحانالار جانە پاندەميا

كوروناۆيرۋس • كەشە

جۇرت جاعاجاي ىزدەپ ءجۇر

ايماقتار • كەشە

ۇقساس جاڭالىقتار