قاسىم-جومارت توقاەۆ قازاقستان حالقىنىڭ بىرلىگى كۇنىنە ارنالعان سالتاناتتى ءىس-شاراعا قاتىستى

مەملەكەت باسشىسى جيىنعا قاتىسۋشىلار الدىندا سويلەگەن سوزىندە بۇگىنگى مەرەكەنىڭ ەلىمىزدەگى بارلىق حالىق پەن ۇلت وكىلدەرىن بىرىكتىرەتىنىن ايتتى.

– ەلباسى قازاقستان حالقى اسسامبلەياسىندا سويلەگەن سوزىندە قازاقستانداعى ۇلتارالىق كەلىسىمنىڭ ماڭىزى زور ەكەنىن اتاپ ءوتتى. نۇرسۇلتان نازارباەۆتىڭ قاجىرلى ەڭبەگىنىڭ ارقاسىندا قازاقستان بۇگىندە كوپتەگەن ۇلت وكىلدەرىنىڭ كيەلى شاڭىراعىنا اينالدى، – دەدى قاسىم-جومارت توقاەۆ.

قازاقستان پرەزيدەنتى كوپ ەتنوستى، كوپ كونفەسسيالى ەلىمىزدىڭ كەلەشەگى تۋرالى ءتۇرلى تەرىس بولجامدار ايتىلعانىنا قاراماستان، ەلباسىنىڭ ورتاق وتانىمىزدا بەيبىتشىلىك پەن كەلىسىمدى ساقتاي بىلگەنىن ايتتى.

مەملەكەت باسشىسى الماتىنىڭ قازاقستان تاريحىنداعى ماڭىزدى رولىنە نازار اۋدارىپ، وسى قالادا مەملەكەتىمىزدىڭ تاۋەلسىزدىگى جاريالانعانىنا توقتالدى.

– الماتى ارقاشان ءوزىنىڭ اسەمدىگىمەن ەرەكشەلەنەدى. الماتىلىق – قايتالانباس برەند ءارى شىنايى ينتەرناتسيوناليزمنىڭ جارقىن ۇلگىسى. بۇگىندە قالا ەلىمىزدىڭ ىسكەرلىك، قارجى، مادەني، وقۋ-اعارتۋ جانە تۋريستىك ورتالىعى. سونداي-اق، الماتى – جاڭا جۇمىس ورىندارىن اشىپ، قالا بيۋدجەتىنىڭ كىرىسىن ارتتىرۋعا ۇلەس قوسىپ وتىرعان شاعىن جانە ورتا بيزنەستىڭ تارتىلىس ورتالىعى، – دەدى قازاقستان پرەزيدەنتى.

قاسىم-جومارت توقاەۆ حالىقتىڭ ءومىر ءسۇرۋ ساپاسى مەن ءال-اۋقاتىن ارتتىرۋ ماسەلەسىنە جانە الماتى قالاسىنىڭ الەۋمەتتىك-ەكونوميكالىق دامۋ پەرسپەكتيۆالارىنا توقتالدى.

– ءبىز ەكولوگيا مەن اۋا ساپاسى، ينفراقۇرىلىم جانە قوعامدىق قاۋىپسىزدىك ماسەلەلەرىن بىرلەسە شەشۋىمىز قاجەت. قالامىز تۇرعىندار مەن شەتەلدىك قوناقتار ءۇشىن جايلىعى تۇرعىسىنان ۇلگى بولۋى كەرەك. اۆتوكولىكتەر مەن ەنەرگيامەن قامتاماسىز ەتۋ سالالارىندا ەكولوگيالىق تازا تەحنولوگيالارعا وتەتىن ۋاقىت جەتتى، – دەدى مەملەكەت باسشىسى. 

قازاقستان پرەزيدەنتى ءارتۇرلى ەتنيكالىق توپ وكىلدەرىڭنىڭ ءوزارا سىيلاستىعىنىڭ، اۋىزبىرشىلىگى مەن جاسامپاز ەڭبەگىنىڭ ارقاسىندا تاۋەلسىزدىگىمىزدى نىعايتىپ، ەكونوميكادا تابىستارعا جەتكەنىمىزدى اتاپ ءوتتى.

– بۇگىندە ءاربىر قازاقستاندىق قاي ەتنيكالىق توپقا جاتاتىنا قاراماستان وزدەرىن ءبىرتۇتاس ۇلكەن وتباسىنىڭ مۇشەسى سەزىنەدى. بىرلىك پەن كەلىسىم – حالقىمىزدىڭ قيىن-قىستاۋ جىلداردا دا ساقتاي بىلگەن قۇندىلىقتارى. «ارالۋاندىقتان بىرلىككە» – ءبىزدىڭ ساياساتىمىزدىڭ ءمانى. ءبارىمىز بىرگە ءوزىمىزدىڭ ەڭبەكسۇيگىشتىگىمىزبەن، تاباندىلىعىمىزبەن عانا قۋاتتى ءارى دامىعان مەملەكەت قۇرا الامىز، – دەدى قاسىم-جومارت توقاەۆ.

مەملەكەت باسشىسى جيىنعا قاتىسۋشىلاردىڭ ءبارىن قازاقستان حالقىنىڭ بىرلىگى كۇنىمەن قۇتتىقتاپ، باقىت، اماندىق جانە جاڭا تابىستار تىلەدى.

سالتاناتتى شارا الماتى قالاسىنىڭ ەتنومادەني ورتالىقتارىنىڭ بەلدى انسامبلدەرى مەن قازاقستاندىق ەسترادا ارتىستەرى قاتىسقان مەرەكەلىك كونتسەرتپەن اياقتالدى.