ءالى كۇنگە قازاقستاننىڭ كەيبىر ەلدى مەكەندەرىنىڭ تۇرعىندارى ۋاقىتىلى ساپالى ءارى تەگىن مەديتسينالىق كومەككە قول جەتكىزە الماي كەلەدى. وسى ولقىلىقتىڭ ورنىن تولتىرۋ ءۇشىن «سامۇرىق-قازىنا» ۇاق» اق كومەگىمەن «Samruk-Kazyna Trust» الەۋمەتتىك جوبالاردى دامىتۋ قورى, دەنساۋلىق ساقتاۋ مينيسترلىگى جانە «قازاقستان تەمىر جولى» جانىنداعى «الەۋمەتتىك جوبالار قورى» بىرلەسىپ «مەديتسينالىق پويىزدار» جوباسىن جۇزەگە اسىرىپ كەلەدى. 2010 جىلدان بەرى جالعاسىپ كەلە جاتقان جوباعا «دەنساۋلىق» جانە «سالاماتتى قازاقستان» سىندى ەكى دەنساۋلىق پويىزى تارتىلعان.
پويىز تۇرعىندارعا ساپالى ءارى جەدەل دياگنوستيكا جاساۋعا مۇمكىندىك بەرەتىن زاماناۋي مەديتسينالىق قۇرالدارمەن جابدىقتالعان. دارىگەرلەر جالپى جانە بيوحيميالىق اناليزدەر, رەنتگەنوگرافيا مەن فليۋروگرافيانى, ىشكى اعزالار مەن تامىرلاردى ۋدز-زەرتتەۋلەرىن, ەلەكتروكارديوگراممانى, گاستروفيبروسكوپيانى جانە دياگنوستيكالىق زەرتتەۋلەردىڭ باسقا دا تۇرلەرىن جاسايدى. جۇمىس توبىنىڭ قۇرامىندا وفتالمولوگ, وتولارينگولوگ, نەۆروپاتولوگ, حيرۋرگ, اكۋشەر-گينەكولوگ, كارديولوگ, ستوماتولوگ, جالپى تاجىريبە دارىگەرى, كەۋدە مامانى, پەدياتر جانە ت.ب. سياقتى بەيىندى مامانداردىڭ بارلىعى بار. ولار دياگنوستيكالىق ەمشارادان بولەك شاعىن حيرۋرگيالىق وپەراتسيالار دا جاسايدى.
– دەنساۋلىق ساقتاۋ مينيسترلىگى شالعايداعى ەلدى مەكەندەردىڭ تۇرعىندارىنا مەديتسينالىق كومەك كورسەتۋ ءۇشىن جىلجىمالى مەديتسينالىق كەشەندەرمەن جانە مەديتسينالىق پويىزدارمەن قامتاماسىز ەتىپ كەلەدى. بىلتىر ماماندارىمىز 127 ەلدى مەكەندى ارالاپ, 40 مىڭعا جۋىق ادامعا كومەك كورسەتكەن بولاتىن. ەمدەلۋشىلەردىڭ اراسىنان قان اينالىمى جۇيەسى, ونكولوگيالىق جانە باسقا دا سوزىلمالى اۋرۋلار ەرتە كەزەڭدەردە انىقتالدى. بيىل ماماندار قۇرامىنا س.ج.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ پروفەسسورلارى قوسىلىپ وتىر, – دەدى دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى اسقار حوروشاش.
ۇيىمداستىرۋشىلار بيىل 60 مىڭعا جۋىق ادامعا مەديتسينالىق كومەك كورسەتۋدى جوسپارلاپ وتىر. پويىزدىڭ جۇرەتىن جولىنىڭ كەستەسى medpoezd.kz جانە sk-trust.kz سايتتارىنا جاريالانعان.
– بيىل ءبىز باراتىن وبلىستاردىڭ سانىن كوبەيتتىك. پويىز 14 وبلىستى ارالاۋ ءۇشىن 21 جەلتوقسانعا دەيىن جولدا بولادى. كەستە بويىنشا ءبىرىنشى الماتى وبلىسىنىڭ تۇرعىندارىنا تەگىن مەديتسينالىق كومەك كورسەتىلەدى. وسى وڭىردەن سوڭ پويىز شىعىس قازاقستان, سولتۇستىك قازاقستان جانە اقمولا وبلىستارىنا باعىت الادى. ودان ءارى «دەنساۋلىق» پويىزىنىڭ باتىس وڭىرلەرگە العان باعىتى وڭتۇستىككە جالعاسادى دا, جامبىل وبلىسىندا ءوز باعدارىن اياقتايدى. جالپى العاندا پويىز 195 بەكەتكە توقتاپ, 19 مىڭ شاقىرىمدى ءجۇرىپ وتۋگە ءتيىس, – دەيدى «Samruk-Kazyna Trust» قورىنىڭ باس ديرەكتورى.
مايگۇل سۇلتان,
«Egemen Qazaqstan»
