مەديتسينالىق پويىزدار نەگىزىندە كورسەتىلەتىن قىزمەتتەر «الەۋمەتتىك مەديتسينالىق ساقتاندىرۋ قورى» كەاق تاراپىنان قارجىلاندىرىلادى. ءداستۇرلى جوبانى «قازاقستان تەمىر جولى» ۇك» اق مەن «Samruk-Kazyna Trust» الەۋمەتتىك جوبالاردى دامىتۋ قورى بىرلەسىپ جۇزەگە اسىرادى.
«دەنساۋلىق» پويىزى اتىراۋ, ماڭعىستاۋ, قىزىلوردا, تۇركىستان, الماتى, باتىس قازاقستان, قاراعاندى, سولتۇستىك قازاقستان وبلىستارى اۋماعىنداعى 195 ستانتسياعا ايالدايدى. ساپار بارىسىندا بارلىعى 40 مىڭعا جۋىق ادامعا مەديتسينالىق كومەك كورسەتۋ جوسپارلانىپ وتىر.
سوڭعى ۇلگىدەگى قوندىرعىلارمەن جابدىقتالعان پويىزداردا كورسەتىلەتىن مەديتسينالىق كومەك تىزىمىندە: سالالىق مامانداردىڭ كەڭەسى (تەراپەۆت, پەدياتر, نەۆروپاتولوگ, وكۋليست, لور, گينەكولوگ, حيرۋرگ, ۋرولوگ, ماممولوگ, ونكولوگ ت.ب.), ءتۇرلى زەرتتەۋلەر مەن دياگنوستيكا تۇرلەرى (ۋدز, قان تالداۋلارى, فليۋوروگرافيا ت.ب.), كىشىگىرىم حيرۋرگيالىق وپەراتسيالار مەن ستوماتولوگيالىق قىزمەتتەر ت.ب. بار.
بيىل دەنساۋلىق سالاسى قىزمەتكەرلەرىمەن بىرگە مەديتسينالىق ساقتاندىرۋ قورى قىزمەتكەرلەرى دە جولعا شىقپاق. ونداعى ماقسات – ستانتسيالاردىڭ تۇرعىندارىنا مىندەتتى الەۋمەتتىك مەديتسينالىق ساقتاندىرۋ جۇيەسى جايلى جان-جاقتى مالىمەت بەرۋ. سەبەبى, بۇل قازاقستانداعى ءاربىر تۇرعىنعا قاتىسى بار, ماڭىزدى رەفورما. سوندىقتان دا قور ازاماتتاردىڭ ساقتاندىرۋعا قاتىستى سۇراقتارىنا جاۋاپ بەرەتىن نۇكتەلەر سانىن ارتتىرىپ, كونسۋلتاتسيالاردى جەتىلدىرە تۇسۋگە دەن قويىپ وتىر.
كونسۋلتاتسيالار بارىسىندا شالعاي ەلدى مەكەندەردىڭ تۇرعىندارى ءمامس جۇيەسىنىڭ ارتىقشىلىقتارى, كەپىلدەندىرىلگەن تەگىن مەديتسينالىق كومەك جانە مىندەتتى الەۋمەتتىك منەديتسينالىق ساقاندىرۋ پاكەتتەرى شەڭبەرىندە كورسەتىلەتىن قىزمەتتەر, ساقتاندىرۋ جارناسىنىڭ مولشەرى, بىرىڭعاي جيىنتىق تولەمدى تولەۋ ءتارتىبى, مەملەكەت تاراپىنان ساقتاندىرىلاتىن ساناتتار جايلى تولىق مالىمەت الا الادى.
ەستەرىڭىزگە سالا كەتسەك, مەديتسينالىق ساقتاندىرۋ قورى مەملەكەتتىك تاپسىرىس بويىنشا كورسەتىلەتىن كەپىلدەندىرىلگەن تەگىن مەديتسينالىق كومەك (تمككك) پاكەتىنىڭ جانە جۇمىس بەرۋشىلەر, ازاماتتار مەن مەملەكەت جارناسى ەسەبىنەن قارجىلاندىرىلاتىن ءمامس پاكەتىنىڭ وپەراتورى بولىپ تابىلادى. تەگىن مەديتسينالىق كومەك پاكەتىن قارجىلاندىرۋ مىندەتى 2018 جىلدان باستاپ قورعا جۇكتەلگەن بولاتىن. ال, مىندەتتى ساقتاندىرۋ شەڭبەرىندە قىزمەت كورسەتۋ 2020 جىلدان باستالادى.
پويىزدىڭ كەستەسى fms.kz سايتىندا جاريالانعان.
