«بۇگىن دە ءبىز تاڭقالارلىق تاريحي كۇندەردى باستان كەشىپ وتىرمىز. ويتكەنى, ءبىز پرەزيدەنت ءدال بۇگىن اۋىسادى دەپ كۇتپەگەن ەدىك. بۇل وقيعانى ەرتەڭگى كۇندەردەن كۇتەتىنبىز. الايدا ءبارى تاباناستى وزگەردى. ەلباسى پرەزيدەنتتىك بيلىگىن توقتاتتى. بۇل ءوزى ەلباسىنىڭ جەتى ولشەپ, ءبىر كەسكەن دانا شەشىمى بولىپتى. وسى ورايدا, كەشەگى ءبىر سىزدەر بەن بىزدەر باستان كەشكەن وتپەلى كەزەڭ اتالاتىن توقسانىنشى جىلدار ەسكە تۇسەدى. سول ءبىر الماعايىپ تۇستا ەل باتاسىن العان ەلباسى اللا دەپ تاۋەكەلدىڭ اتىنا ءمىندى, كوش تىزگىنىن قولعا الدى. الايدا الدا تۇرعان وتپەلى كوپىر كەزەڭى وڭاي ەمەس ەدى. ول كوپىردى كوشباسشى ءبىر قادام شالىس باسسا, شاشىلىپ قالۋ قاۋپى بولدى, اعايىن. بىراق, كوشباسشىمىز بۇل وتكەلدەن قازاقستاندى امان ەسەن-الىپ شىقتى», دەدى جازۋشى.
سماعۇل ەلۋباي قازاقستان حالقى سول تۇستا ءبىر اتانىڭ بالاسىنداي بىرىگىپ, جاڭا قازاقستاننىڭ ىرگەتاسىن قالاپ, قابىرعاسىن كوتەرىپ, ارقا توسىندە جايناتىپ جاڭا استانا سالعانىن اتاپ ءوتتى.
«ءبىز بۇگىن تاعى دا ەڭسەسى بيىك, ءتورى كەڭ قازاق شاڭىراعىنىڭ استىندا وتىرمىز. وسى وردادان تاۋەلسىزدىك جىلدارى زاماناۋي ساياسات كوگىنە ءبىر جۇلدىز كوتەرىلدى. ول - نازارباەۆ جۇلدىزى ەدى. ول جۇلدىز كۇندىز-ءتۇنى ءوز ەلىن شىرقاۋ بيىككە شاقىرۋمەن بولدى. سول ۇرانداردان كۇندەردىڭ كۇنىندە جانارتاۋداي اتقىلاپ, ۇلتتىق پاسسيونارلىق رۋح وياندى. ونى وياتقان پاسسيونار تۇلعا - ن.نازارباەۆ ەدى. بۇل ءدۇمپۋ تاۋ قوپارىپ, تاس جاردى. جاس ءارى جاڭا قازاقستان ومىرگە كەلدى», دەدى جازۋشى.
جازۋشى ءوز سوزىندە وسى جانارتاۋدىڭ ۇشقىندارىنداي الەم كوگىندە قانشاما مادەنيەت, سپورت جۇلدىزدارى جانعانىن, ءالى دە جانىپ تۇرعانىن اتاپ ءوتتى.
«قۇرمەتتى ەلباسى! وسى بيىكتە ءسىز ءتىل جۇلدىزىمىز جانسىن دەپ جازۋدى لاتىن قارپىنە بۇردىڭىز. ەڭ ءىرى رەفورما - وسى ەدى. ويتكەنى, ءتىل جۇلدىزى جانعاندا عانا - ەل جۇلدىزى جانارى حاق, ەندەشە, ەل جۇلدىزى جانسىن دەسەك, ءتىل جۇلدىزىن جاعايىق, اعايىن», دەدى ول.
سونداي-اق جازۋشى كينوجوبالاردىڭ دۇنيەگە كەلگەنىن, ادەبي جاۋھارلارىمىز الەم تىلدەرىنە اۋدارىلعانىن دا اتاپ ءوتتى.
«ءسىزدىڭ تاپسىرماڭىزدان تۇگەل تۇركى بەسىگى - تۇركىستان تۇلەي باستادى. ەندى ءبىزدى ازىرەت سۇلتان باسىندا, ءسىز كوتەرگەن تۋ استىندا تۇگەل تۇركى باس قوسار كۇنگە جەتكىزگەي. ۇلى تۇران - تۇگەل تۇرىكتىڭ ارمانى ەدى. سول ارمان اقيقاتقا اينالا باستادى. سول ءۇشىن دە سىزگە العىسىمىز - الابوتەن. نۇراعا! ۇلت تاريحىندا - ۇلى اعا! امان-ەسەن ءجۇر, اعا!», دەدى سماعۇل ەلۋباي.
