«بۇگىنگى ۇستازدىڭ بەدەلى مەن ابىرويىن قالاي كوتەرۋگە بولادى جانە بولاشاق مۇعالىم ماماندارى ءۇشىن ەڭ باستى قۇندىلىق نە؟» دەگەن سياقتى وزەكتى ماسەلەلەر اڭگىمە ارقاۋى بولعان جيىندى قىزدار ۋنيۆەرسيتەتىنىڭ الەۋمەتتىك دامۋ جونىندەگى پرورەكتورى جاڭاگۇل سۇلتانوۆا اشىپ, اياگۇل تورەقىزىنىڭ ۇرپاق تاربيەلەۋدەگى ەلەۋلى ۇلەسىنە كەڭىنەن توقتالدى.
– ءسىز عۇمىرىڭىزدىڭ مازمۇندى كەزەڭدەرى مەن ءومىرىڭىزدىڭ جارقىن ساتتەرىن ءبىلىم بەرۋ سالاسىنا ارناپ, بىلىكتىلىگىڭىز بەن ۇيىمداستىرۋشىلىق قابىلەتىڭىزدىڭ ارقاسىندا ەل قۇرمەتىنە بولەندىڭىز. قازاقتا «ۇستازدىق ەتۋ – ۋاقىت ۇتۋ ەمەس. وزگەنىڭ ۋاقىتىن ايالاۋ, ءوزىڭنىڭ ۋاقىتىڭدى اياماۋ» دەگەن ۇلاعاتقا اينالعان ۇعىم بار. راسىندا دا پەداگوگ – ادام تاربيەشىسى, كەز كەلگەن جاننىڭ تاعدىر تالايىنا جازىلا بەرمەيتىن ەرەكشە ماماندىق. ۇستاز جولى – عيبراتتى جول. ۇستازدىقتىڭ ۇلى جولىندا قاجىرلى قىزمەت قىلعان ادام عانا بيىك بەلەستى باعىندىرا الادى. بۇل تۇرعىدا ەڭبەگى – ەرەن, ءومىرى – ونەگە اياگۇل تورەقىزى وسكەلەڭ ۇرپاقتى ورەسى جوعارى ازامات قىلىپ تاربيەلەپ, ىزدەنىس پەن تالاپقا نەگىزدەلگەن مارتەبەلى ماماندىقتىڭ ابىرويىن ارتتىرۋعا زور ۇلەس قوسىپ كەلەدى, دەدى جاڭاگۇل سۇلتانوۆا.
سونىمەن قاتار ول پەداگوگتىڭ وتاندىق ءبىلىم بەرۋ سالاسىنا سىڭىرگەن قىزمەتىنىڭ ماڭىزىن دا اتاپ ءوتتى.
– مەكتەپ مۇعالىمدىگىنەن باستالعان ەڭبەك جولىڭىز بەن بۇگىنگى جەتكەن بيىك بەلەسىڭىز ارىپتەستەرىڭىز بەن شاكىرتتەرىڭىزگە ۇلگى-ونەگە. سىزدەن ءتالىم مەن تاربيە العان قانشاما مامان جاس بۋىندى ۇستامدىلىققا, ۇلتجاندىلىققا ۇيرەتتى. پەداگوگ – قوعامنىڭ زياتكەرلىك الەۋەتىن قالىپتاستىرادى. ءبىلىمدى ۇرپاق پەن مىقتى مەملەكەتتىڭ كەپىلى بولاتىن وسكەلەڭ جاسقا ساپالى ءبىلىم, سانالى تاربيە بەرۋدەگى ءسىزدىڭ قىزمەتىڭىزدىڭ ماڭىزى ءھام ومىرشەڭدىگى دالەلدەۋدى قاجەت ەتپەيتىن اكسيوما ەكەندىگى بەلگىلى. «الاشتىڭ اياگ ۇلى» اتانعان ءسىزدىڭ ۇلتىمىزدىڭ وقۋ-اعارتۋ سالاسىنا سىڭىرگەن ەڭبەگىڭىز بەن كەيىنگە قالدىرعان رۋحاني مۇراڭىز ءالى دە تالاي جاندار ءۇشىن, اسىرەسە, بولاشاق مۇعالىمدەر ءۇشىن شامشىراق بولاتىنىنا كامىل سەنىمدىمىن, دەيدى ج. سۇلتانوۆا.
ءوز كەزەگىندە اياگۇل ميرازوۆا وتاندىق جوعارى بىلىكتى پەداگوگ كادرلار دايارلاتىن بىردەن-ءبىر كوشباسشى وقۋ ورنى قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسشىلىعىنا وسىنداي يگىلىكتى ىسكە مۇرىندىق بولىپ وتىرعانى ءۇشىن ريزاشىلىعىن جەتكىزدى.
– بۇل قاراشاڭىراقتا ۇلتىمىزدىڭ ماڭدايىنا بىتكەن ءبىرتۋار ازاماتتار قىزمەت اتقارىپ, قازاق حالقىنىڭ ماقتانىشىنا اينالعان قانشاما ارۋلار ءبىلىم الدى. سىزدەر دە سول اعا بۋىننىڭ ءىزىن باسىپ, ۇلاعات ۇياسىنا اينالعان وقۋ ورنىندا ءبىلىم الىپ جاتىرسىزدار. تەگىندە, جاقسى ۇستازعا قىزىعىپ وسكەن, وعان ەلىكتەيتىن شاكىرتتىڭ دە جانى جاقسىلىققا قۇمار بولادى. بۇلاي دەپ وتىرعانىم بەكەر ەمەس. ءبىز دە سىزدەر سياقتى ستۋدەنت بولدىق. ەل قاتارلى ءبىلىم الدىق. تاراز مەملەكەتتىك پەداگوگيكالىق ينستيتۋتىنىڭ ماتەماتيكا فاكۋلتەتىنە وقۋعا ءتۇستىم. ينستيتۋتتا بىلىكتى ۇستازداردان ءتالىم الدىق. ساباقتى جاقسى وقيتىنمىن, وقۋ ورنىنىڭ قوعامدىق جۇمىسىنا بەلسەنە قاتىساتىنمىن. اۋىلدىق ەلدىمەكەندەرگە, مال فەرمالارىنا بارىپ, كونتسەرت قوياتىنبىز. ونەرگە جاقىن بولدىق. الماتىدان شىعاتىن بەدەلدى گازەت-جۋرنالدارعا تىرناقالدى ماقالامىزدى, ولەڭدەرىمىزدى جىبەرەتىنبىز. ادەبي كىتاپتاردى جاتا-جاستانا وقىدىق. سونىڭ دا اسەرى بولۋى كەرەك, ارمانىمىز كوپ ەدى. ارمان – ادامدى الىسقا جەتەلەيدى عوي. قارشاداي قىزعا ماقسات بىتىرگەن دە سول كوڭىل تۇكپىرىندەگى ارمان-ماقساتىمىز, – دەدى ءوز سوزىندە اياگۇل ميرازوۆا.
سونداي-اق ول ءبىلىم سالاسىنداعى وزگەرىستەر جايىن دا قاۋزادى.
– ەلىمىز ەگەمەندىك الىپ, تاۋەلسىزدىككە قول جەتكىزگەن سوڭ ءبىلىم سالاسىندا وتە ۇلكەن وزگەرىستەر بولدى. ەلەۋلى جەتىستىكتەرگە جەتتىك. تابىستارىمىز دا از ەمەس. وسى جىلدارى قازاق ەلىنىڭ تۇكپىر-تۇكپىرىندە جۇزدەگەن زاماناۋي ءبىلىم وردالارى – مەكتەپتەر, بالاباقشالار سالىنىپ جاتىر. قاراكوزدەرىمىز ەلباسىنىڭ باستاماسىمەن دۇنيەگە كەلگەن «بولاشاق» باعدارلاماسى ارقىلى الەمنىڭ بەدەلدى ۋنيۆەرسيتەتتەرىندە وقىپ, بىلىمىمەن, بىلىكتىلىگىمەن شەتەلدى مويىنداتىپ جاتىر. جوعارى مەكتەپتەردىڭ دە ماتەريالدىق-تەحنيكالىق بازاسى سوڭعى ۇلگىمەن جاراقتالدى. ءوزىمىزدىڭ ءتول وقۋلىقتارىمىز جازىلدى. قازاق تىلىندەگى مەكتەپتەر سانى ايتارلىقتاي كوبەيدى. ءوزىمىزدىڭ ۇلتتىق بولمىسىمىزدى, قۇندىلىعىمىزدى, سالت-ءداستۇرىمىزدى ۇرپاعىمىزدىڭ بويىنا قۇيۋدا قازاق مەكتەپتەرىنىڭ ماڭىزى زور. بالاباقشا جاسىنان باستاپ, ناعىز قازاق ءتىلدى ۇرپاقتى قالىپتاستىرۋ ارقىلى ءبىز مەملەكەتتىڭ ەرتەڭىن جاساپ جاتىرمىز دەپ تولىق سەنىممەن ايتا الامىن, – دەگەن ۇستاز مۇعالىم ماماندىعىنىڭ بەدەلى تۋراسىندا دا ءسوز قوزعادى.
اياگۇل ميرازوۆانىڭ ايتۋىنشا, ۇستاز باقىتى – ءوز شاكىرتىمەن بىرگە قۋانا ءبىلۋ. ونىڭ مىندەتى – تالاپتى جاستىڭ شامشىراعىن جاعا ءبىلۋ.
– وتاندى ءسۇيۋ – وتباسىدان باستالادى. ۇرپاق تاربيەسىندە تەك مۇعالىمگە عانا ەمەس, سونداي-اق اتا-اناعا دا جۇكتەلەر جاۋاپكەرشىلىك ۇلكەن. ءبىزدىڭ بۇل ومىردە تەك ءبىر وتانىمىز بار. ول – قازاقستان. كەلەشەك جاستاردىڭ قولىندا. سوندىقتان دا, تۋعان ەلىن جان-تانىمەن سۇيەتىن, اتا-اناسىن الپەشتەيتىن, ۇستازىن سىيلايتىن ازاماتتاردى تاربيەلەپ وسىرسەك, بۇل مىندەتىمىزدىڭ ورىندالعانى. ۇستازدىڭ جۇگى جەڭىل ەمەس. سىزدەر بولاشاق ۇستازسىزدار. ەلىمىزدىڭ تۇتاس ءبىر بۋىنىن تاربيەلەۋ سىزدەردىڭ ەنشىلەرىڭىزگە بۇيىرىپ تۇر. بولاتىن ادام بيىككە ۇمتىلادى. ال سول بيىك بەلەس ەسەلى ەڭبەكپەن كەلەدى. سوندىقتان دا قاشاندا ىزدەنىپ, بىلىمگە بەرىلگەن ۋاقىتتى بىلىمگە ارناڭىزدار دەگىم كەلەدى. بۇگىنگى ۋاقىت – ءبىلىمنىڭ ۋاقىتى. وركەنيەتتىڭ كوشىنە ىلەسۋ ءۇشىن تەرەڭ ءھام ساپالى ءبىلىم بولۋ قاجەت, دەيدى اياگۇل تورەقىزى.
جيىن بارىسىندا قىزدار ۋنيۆەرسيتىنىڭ ستۋدەنتتەرى التىناي جاڭگىر اسەم ءانىن اۋەلەتسە, ءمادينا ابلەز قازاقتىڭ بىرنەشە كۇيىن ناقىشىنا كەلتىرە ورىندادى. «اق قاۋىرسىن» جاس اقىندار كلۋبىنىڭ مۇشەسى تولعاناي الپىسباەۆا مەن ءمادينا داركەنباەۆا اياگۇل ميرازوۆاعا ارناعان ارناۋى دا كەش اجارىن اشا ءتۇستى.
تاعىلىمدى شارانى جاڭاگۇل سۇلتانوۆا قورىتىندىلاپ, ۇستازعا ۋنيۆەرسيتەت ۇجىمى اتىنان ريزاشىلىعىن ءبىلدىرىپ, سىي-سياپات كورسەتتى.
