ءبىلىم جانە عىلىم ءمينيسترى ك. ءشامشيدينوۆا ەلباسىنىڭ 75 مىڭ ورىندىق جاتاقحانا سالۋ تۋرالى ءۇشىنشى باستاماسىن ورىنداۋ ماقساتىندا جوسپارلى جۇمىستار جۇرگىزىلىپ جاتقانىن ايتتى. وتكەن جىلدىڭ وزىندە وقۋ ورىندارى مەن جەرگىلىكتى بيۋدجەت ەسەبىنەن 3 مىڭنان استام ورىن ەنگىزىلدى. وسى جوباعا ينۆەستورلاردى كەڭىنەن تارتۋ ماقساتىندا «اتامەكەن» ۇلتتىق كاسىپكەرلەر پالاتاسىمەن بىرگە مەملەكەتتىك-جەكەمەنشىك ارىپتەستىك قاعيدالارىنا نەگىزدەلگەن ارنايى تەتىك جۇزەگە اسىرىلۋدا, قاجەتتى نورماتيۆتىك-قۇقىقتىق بازا قالىپتاستىرىلىپ, قارجى كولەمى بەكىتىلدى. جاتاقحانالار قۇرىلىسىمەن اينالىساتىن كاسىپكەرلەرگە ينجەنەرلىك كوممۋنيكاتسيالارى دايىن جەر تەلىمدەرى بەرىلىپ جاتىر.
«مەملەكەت بانكتىك نەسيەنىڭ 7%-ىن سۋبسيديالايدى, جاتاقحانالار قۇرىلىسىنا قويىلاتىن تالاپتار جەڭىلدەتىلدى. بۇل شارالار ينۆەستورلار شىعىندارىن قىسقارتىپ, جوبالاردىڭ جالپى قۇنىن تومەندەتۋگە مۇمكىندىك بەرەدى», دەپ ءبىلىم جانە عىلىم ءمينيسترى, جاتاقحانا قولدانىسقا بەرىلگەننەن كەيىن 8 جىل قاتارىنان مەملەكەتتىك تاپسىرىس ورنالاستىرىلاتىنىن ايتتى.
نۇر-سۇلتان قالاسىندا جاتاقحانا اقىسىن اكىمدىك تاراپىنان سۋبسيديالاۋ تەتىگى ەنگىزىلگەن. بۇگىنگى تاڭدا 19 مىڭنان استام ورىننىڭ ەنگىزىلۋىن قامتاماسىز ەتەتىن 43 جوبا ىسكە اسىرىلىپ جاتىر. ولاردىڭ 20-سى كاسىپكەرلەردىڭ, 24-ءى وقۋ ورىندارىنىڭ, ونىڭ ىشىندە 13-ءى جەكە مەنشىك وقۋ ورىندارىنىڭ باستاماسىمەن جۇزەگە اسادى.
«اتالعان جوبالار اياسىندا وسى جىلدىڭ وزىندە جوسپارلانعان 5 مىڭنىڭ ورنىنا 9 196 ورىن ەنگىزىلەدى. ياعني, جوسپار 184%-عا ورىندالادى», دەدى ك. ءشامشيدينوۆا.
وڭىرلەردىڭ اراسىندا الدىڭعى قاتاردا — نۇر-سۇلتان, شىمكەنت قالالارى مەن جامبىل وبلىسى.
ونىڭ ايتۋىنشا, مەملەكەتتىك جوعارعى ءبىلىم وردالارىمەن سالىستىرعاندا, جەكەمەنشىك وقۋ ورىندارىنىڭ بەلسەندىلىگى اناعۇرلىم جوعارى. مىسالى, بيىل جەكەمەنشىك وقۋ ورىندارى 8 جاتاقحانانى ەنگىزەتىن بولسا, مەملەكەتتىك وقۋ ورنىدارى نەبارى 2 جاتاقحانانى ەنگىزبەك.
«وڭىرلەردە جاتاقحانالار قۇرىلىسىن كەڭىنەن تاراتۋ ماقساتىندا ينۆەستورلارمەن كەزدەسۋلەر وتكىزىلەدى, جوبانىڭ ارنايى سايتى ىسكە قوسىلدى. بيىلعى مامىر–قىركۇيەك ايلارىندا ينۆەستورلاردى كەڭىنەن تارتۋ ءۇشىن ۇزدىك جوبالار اكتسياسى وتكىزىلەتىن بولادى», دەدى ءبىلىم جانە عىلىم ءمينيسترى.
وڭىرلەردە اتقارىلىپ جاتقان جۇمىستار تۋرالى جامبىل وبلىسىنىڭ اكىمى ا. مىرزاحمەتوۆ پەن شىمكەنت قالاسىنىڭ اكىمى ع. ءابدىراحىموۆ باياندادى.
ءوز كەزەگىندە, پرەمەر-ءمينيستردىڭ ورىنباسارى گ. ابدىقالىقوۆا جاتاقحانالاردى ۋاقىتىلى ەنگىزۋ جانە ستۋدەنتتەر ءۇشىن قولايلى تۇرۋ جاعدايىن قامتاماسىز ەتۋ ۇزاقمەرزىمدى مىندەت ەكەنىن اتاپ ءوتتى.
