«ەلباسى نۇرسۇلتان نازارباەۆ 2018 جىلدىڭ ناۋرىز ايىندا 75 مىڭ ورىندىق ستۋدەنت جاتاقحانالارىن سالۋدى تاپسىردى. وتكەن جىلدىڭ وزىندە وقۋ ورىندارى مەن جەرگىلىكتى بيۋدجەت ەسەبىنەن 3 مىڭنان استام ورىن ەنگىزىلدى. وسى جوباعا جەكە ينۆەستورلاردى كەڭىنەن تارتۋ ماقساتىندا ۇلتتىق كاسىپكەرلەر پالاتاسىمەن بىرگە مەملەكەتتىك-جەكەشەلىك ارىپتەستىككە نەگىزدەلگەن ارنايى مەحانيزم جۇزەگە اسىرىلۋدا. نورماتيۆتىك-قۇقىقتىق بازا قالىپتاستىرىلىپ, قارجى كولەمى بەكىتىلدى. جاتاقحانا قۇرىلىسىمەن اينالىساتىن كاسىپكەرلەرگە ينجەنەرلىك-كوممۋنيكاتسيالارى دايىن جەر تەلىمدەرى بەرىلىپ, بانكتىك نەسيەنىڭ 7 پايىزى مەملەكەت ەسەبىنەن سۋبسيديالانادى», دەدى كۇلاش ءشامشيدينوۆا.
ونىڭ ايتۋىنشا, جاتاقحانا قۇرىلىسىنا قويىلاتىن تالاپتار جەڭىلدەتىلگەن. «بۇل شارالار ينۆەستورلاردىڭ شىعىندارىن قىسقارتىپ, قۇرىلىستىڭ جالپى قۇنىن تومەندەتۋگە مۇمكىندىك بەرەدى. جاتاقحانا قولدانىسقا بەرىلگەننەن كەيىن ونىڭ يەسىنە 8 جىل قاتارىنان مەملەكەتتىك تاپسىرىس ورنالاستىرىلاتىن بولادى. سونىمەن بىرگە, ينۆەستوردىڭ وسى عيماراتتا اسحانا, جاتتىعۋ زالى جانە وزگە دە تۇرمىستىق قىزمەتتەردى ورنالاستىرۋ ارقىلى قوسىمشا كىرىس تابۋىنا مۇمكىندىك بەرىلگەن», دەدى ول.
مينيسترلىكتىڭ مالىمەتىنە سۇيەنسەك, نۇر-سۇلتان قالاسىندا جاتاقحانا قۇرىلىسى بويىنشا اكىمدىك تاراپىنان سۋبسيديالاۋ ەنگىزىلگەن.
«بۇگىنگى تاڭدا 19 مىڭنان استام ورىننىڭ ەنگىزىلۋىن قامتاماسىز ەتەتىن 43 جوبا ىسكە اسىرىلۋدا. اتالعان جوبالار اياسىندا اعىمداعى جىلدىڭ وزىندە جوسپارلانعان 5 مىڭنىڭ ورنىنا 9196 ورىن ەنگىزىلىپ, جوسپار 184 پايىزعا ورىندالادى دەپ كۇتىلۋدە», دەدى ول.
جاتاقحانا قۇرىلىسى بويىنشا الدىڭعى قاتاردا نۇر-سۇلتان, الماتى, شىمكەنت قالالارى مەن جامبىل وبلىسى تۇرسا, ال سقو, اقتوبە, تۇركىستان وبلىستارىندا جۇمىس قارقىنى تومەن بولىپ وتىر.
«اعىمداعى جىلدىڭ كورسەتكىشىنە قول جەتكىزۋ ءۇشىن بىرقاتار جۇمىس اتقارىلدى. دەگەنمەن كەلەسى جىلدىڭ جوسپارىنىڭ ورىندالۋى الاڭداتىپ وتىر. وسىعان وراي كەلەسى شارالاردى جۇزەگە اسىرۋعا قولداۋ كورسەتۋدى سۇرايمىز. ءبىرىنشى - وڭىرلەردە بارلىق وقۋ ورىندارى كورسەتىلگەن جاتاقحانا سالۋدىڭ تولىق كەستەسىن بەكىتۋ. ەكىنشى - قىمبات تۇراتىن جوبالىق-سمەتالىق قۇجاتتاردى ازىرلەۋدى توقتاتۋ. ءۇشىنشى - جەر ماسەلەسىن وڭتايلى شەشۋ ماقساتىندا مەملەكەتتىك جوعارى وقۋ ورىندارىن كوممەرتسيالىق ەمەس اكتسيونەرلىك قوعام ەتىپ قايتا ۇيىمداستىرۋ جۇمىسىن جەدەلدەتۋ. تورتىنشىدەن, وسى جوبانى ىسكە اسىرۋ بارىسىندا سەيسميكاعا قاتىستى ماسەلەلەر كوتەرىلدى. وسىعان بايلانىستى نورماتيۆكە سەيسميكانى ەسكەرەتىن كوەفيتسيەنتتى قاراستىرۋ», دەدى ك. ءشامشيدينوۆا.
