ساياسات • 29 ءساۋىر، 2019

ۇكىمەتتە «اۋىل – ەل بەسىگى» جوباسىن ىسكە اسىرۋدىڭ تاسىلدەرى ماقۇلداندى

783 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا «اۋىل – ەل بەسىگى» جوباسىن ىسكە اسىرۋدىڭ تاسىلدەرى ماقۇلداندى. بۇل تۋرالى ۇكىمەتتىڭ ءباسپاسوز قىزمەتى حابارلادى.

ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا «اۋىل – ەل بەسىگى» جوباسىن جۇزەگە اسىرۋ ارقىلى اۋىلداردىڭ الەۋمەتتىك ينفراقۇرىلىمىن جاڭعىرتۋ مىندەتىن قويدى.

پەرسپەكتيۆالىق اۋىلداردى انىقتاۋ بويىنشا اتقارىلىپ جاتقان جۇمىستار تۋرالى قر پرەمەر-ءمينيسترىنىڭ ورىنباسارى ج. قاسىمبەك باياندادى. جوبا اۋىلداعى تۇرمىس جاعدايىن جاقسارتۋعا، اۋىل اۋماقتارىنىڭ الەۋمەتتىك ورتاسىن جاڭعىرتۋعا، ولاردى وڭىرلىك ستاندارتتارعا دەيىن جەتكىزۋگە باعىتتالعان.

2019 جىلى وبلىستاردىڭ اكىمدىكتەرى 454 ءىس-شارا وتكىزۋ جوسپارلانعان اۋدان ورتالىقتارى قاتارىنان 52 اۋىلدىق ەلدى مەكەندى ىرىكتەپ الدى. تاڭداپ الىنعان اۋىلداردىڭ پەرسپەكتيۆالارى، جوبالاردى ىسكە اسىرۋ بەلگىلەرى مەن جوسپارلارى تۋرالى الماتى وبلىسىنىڭ اكىمى ا. باتالوۆ، قوستاناي وبلىسىنىڭ اكىمى ا. مۇحامبەتوۆ باياندادى، بۇل وڭىرلەردە جوبالاردى جەرگىلىكتى بيۋدجەتتەن بىرلەسىپ قارجىلاندىرۋدىڭ جوعارى كورسەتكىشتەرى بەلگىلەنگەن. جوبانى ودان ءارى ىسكە اسىرۋ ماسەلەلەرى بويىنشا «Nur Otan» پارتياسىنىڭ حاتشىسى ف. قۋانعانوۆ، قر ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ ۇسىنىستارىن جەتكىزدى.  

قر ۇكىمەتىنىڭ باسشىسى باياندامالاردى تىڭداعاننان كەيىن، 2025 جىلعا دەيىن «اۋىل – ەل بەسىگى» جوباسىمەن 6،1 ملن تۇرعىنى بار 2 مىڭعا جۋىق ەلدى مەكەن نەمەسە بارلىق اۋىل تۇرعىندارىنىڭ 80% قامتىلاتىنىن اتاپ ءوتتى. اۋىلدىق ەلدى مەكەندەردى جاڭعىرتۋ ماقساتىندا الەۋمەتتىك جانە ينجەنەرلىك ينفراقۇرىلىممەن قامتاماسىز ەتۋدى كوزدەيتىن وڭىرلىك ستاندارتتار ازىرلەنگەن.

«كىشى ۋربانيزاتسيا – اۋىلداردى جاڭعىرتۋعا جانە تۇرعىنداردىڭ تۇرمىس ساپاسىن ارتتىرۋعا مۇمكىندىك جاسايدى»، — دەپ اسقار مامين، جوبانى ىسكە اسىرۋدىڭ ماقۇلدانعان تاسىلدەرىن ءتيىمدى ورىنداۋدى، جوبانى ۋاقىتىلى قارجىلاندىرۋ ءۇشىن ءتيىستى نورماتيۆتىك اكتىلەردى پىسىقتاۋدى تاپسىردى.  

اكىمدىكتەر «اۋىل – ەل بەسىگى» جوباسىن جەرگىلىكتى بيۋدجەتتەن بىرلەسىپ قارجىلاندىرۋدى 20% دەيىن ارتتىرۋ مۇمكىندىگىن قاراۋى ءتىيس، سونىمەن قاتار، بيزنەستىڭ الەۋمەتتىك جاۋاپكەرشىلىگى اياسىندا اۋىل ينفراقۇرىلىمىن جاڭعىرتۋعا قاراجات تارتۋ ماسەلەسىن ءىرى كاسىپورىندارمەن بىرلەسىپ پىسىقتاپ، تۋعان اۋىلدارىن كوركەيتۋ بويىنشا مەتسەناتتارمەن جۇمىس جۇرگىزۋ قاجەت.

بۇدان وزگە، ءاربىر وڭىرگە «جول كارتاسىن» جاساۋ تاپسىرىلدى، وندا ىسكە اسىرۋ مەرزىمدەرى مەن جاۋاپتى ادامدار ناقتى كورسەتىلۋى كەرەك.

«الەۋمەتتىك ينفراقۇرىلىم وبەكتىلەرىن – مەكتەپتەر، بالاباقشالار، دەنساۋلىق ساقتاۋ ورىندارىن جوندەۋ، ەلدى مەكەندەردىڭ ىشىندەگى جولداردى جوندەۋ جۇمىستارىن وسى جىلدىڭ قىركۇيەگىنە دەيىن اياقتاۋ قاجەت»، — دەدى قر پرەمەر-ءمينيسترى اسقار مامين.

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار