«بۇل - ەلىمىزدىڭ بەدەلى جوعارى محكف كونكۋرسىنىڭ تاريحىندا العان تۇڭعىش ماراپاتى! كارتينا قر مادەنيەت جانە سپورت مينيسترلىگى تاپسىرىسىمەن «قازاقفيلم» ستۋدياسىندا تۇسىرىلگەن. فيلم ستسەناريى دانيار سۇگىرالينوۆتىڭ «كيرپيچي 2.0» شىعارماسىنىڭ نەگىزىندە جازىلعان. «ۇزدىك فيلم» نوميناتسياسىنداعى «التىن اۋليە گەورگيدى» شارىپوۆكە قازىلار القاسىنىڭ توراعاسى, اتاقتى رەجيسسيور كيم كي دۋك تاپسىردى», دەپ جازدى مينيستر.
ارىستانبەك مۇحامەدي ۇلى ءوز جازباسىندا فارحات ءشارىپوۆتى قۇتتىقتادى. الەۋمەتتىك دراما قىرىق جاسقا كەلگەن, ورتا جاس كۇيزەلىسىن باستان كەشىپ جۇرگەن بانك قىزمەتكەرى قاناتتىڭ ءومىربايانىن باياندايدى. ونىڭ ەش ارمانى دا, ومىردەن كۇتەرى دە جوق. الايدا ءبىر كۇنى قانات تۇلعالىق قالىپتاسۋ, كوشباسشىلىق قاسيەتتەردى دامىتۋ ترەنينگىنە تاپ بولادى.
«ءفيلمنىڭ جارىققا شىعۋىنا ىقپال ەتكەن بارشا ادامعا العىس ايتامىن. الدىمەن وتباسىما مىڭ العىس. سول سەبەپتى بۇل جەڭىسىمدى اكەمە ارنايمىن. ال فەستيۆال ۇيىمداستىرۋشىلارى مەن كورەرمەندەرىنە كوپ راحمەت», - دەدى محكف لاۋرەاتى فارحات ءشارىپوۆ ءوز ويىمەن ءبولىستى.
«ترەنينگ ليچنوستنوگو روستا» ءفيلمىنىڭ الەمدىك تۇساۋكەسەرى 23-ءشى پۋسان حالىقارالىق كينوفەستيۆالىندە وتكەن. وتكەن جىلى فيلم 14-ءشى حالىقارالىق شاكەن ايمانوۆ كينوفەستيۆالىندە قازىلار القاسىنىڭ ارنايى جۇلدەسى مەن نەتپاك جۇلدەسىن يەلەنگەن بولاتىن.
حالىقارالىق ماسكەۋ كينوفەستيۆالى - الەمدەگى ەڭ تاريحي فەستيۆالدەردىڭ ءبىرى. ونىڭ نەگىزى 1935 جىلى قالانىپ, سول جىلى سەرگەي ەيزەنشتەين قازىلار القاسىن باسقارعان. سوڭعى 20 جىل ىشىندە فەستيۆالدىڭ قازىلار القاسىن الەمنىڭ ەڭ بەلدى كينوگەرلەرى باسقاردى, ولاردىڭ قاتارىندا: ريچارد گير, تەو انگەلوپۋلوس, الان پاركەر, گلەب پانفيلوۆ, جان-جاك اننو, ليۋك بەسسون, موحسەن ماحمالباف بار. محكف-ءنىڭ باعدارلاما ديرەكتورى - مادەنيەتتانۋشى كيريلل رازلوگوۆ, ىرىكتەۋ كوميسسياسىن رەسەيلىك كينوسىنشى اندرەي پلاحوۆ باسقارادى. محكف پرەزيدەنتى قىزمەتىن ءبىراز جىلدان بەرى رەسەيلىك رەجيسسەر, اكتەر, رەسەي فەدەراتسياسىنىڭ حالىق ءارتىسى نيكيتا ميحالكوۆ اتقارىپ كەلەدى. بيىل فەستيۆالدىڭ قازىلار القاسىنا تانىمال وڭتۇستىك كورەيا رەجيسسەرى كيم كي دۋك توراعالىق ەتتى.
