تايىنشا اۋدانىنداعى ءبىلىم وشاعىنا وسىدان التى جىل بۇرىن كۇردەلى جوندەۋ جۇرگىزىلگەنىمەن, ابدەن توزعانى سونشالىق, قالپىنا كەلتىرۋ مۇمكىن بولماعان سەكىلدى. ويتكەنى قابىرعالاردا قايتادان سىزات پايدا بولىپ, مەكتەپ باسشىلىعى دابىل قاققان. توتەنشە جاعدايلار قىزمەتى دە اپاتتىق جاعدايدا دەپ تانىعان. سولاي بولا تۇرا جەرگىلىكتى بيلىك شۇعىل تۇردە شەشىم قابىلداۋدىڭ ورنىنا ماسەلەنى كەيىنگە ىسىرىپ, جاعدايعا كوز جۇما قاراعانعا ۇقسايدى.
– عيماراتتىڭ ادام جىلارلىق جايىن ايتىپ, قانشاما دابىل قاققانىمىزبەن, قۇلاق اسار ادام تابىلمادى. اتا-انالاردان جينالعان قاراجاتقا جاماپ-جاسقاعانمەن ەسكى دۇنيە قايتىپ جاڭارادى؟ اپاتتىڭ ورىن الاتىنىن بىلە تۇرا, قۇلاعانشا كۇتكەندەرى قالاي؟ كۇندىز وپىرىلىپ تۇسسە نە بولار ەدى؟ – دەيدى تۇرعىندار باسشىلىقتىڭ جايباراقاتتىعىنا نارازى ۇنمەن نالي سويلەپ.
اكىمدىكتەگىلەر بولسا, نىساننىڭ ولار ويلاعاننان ەرتەرەك قۇلاپ, مۇنداي وقىس جاعدايدى كۇتپەگەنىن ايتادى. وقۋ جىلى اياقتالعان سوڭ قالپىنا كەلتىرۋ جوسپارلانىپ قويىلىپتى. بىراق كوكتەمگى قار ەرىگەن كەزدە قاۋىپ كۇشەيىپ, سۇرۋگە جەكە سەرىكتەستى جالداعانمەن, ءىستى سوڭىنا دەيىن جەتكىزۋگە ۇلگەرمەگەن كورىنەدى.
قىرىق سىلتاۋى تاۋسىلمايتىن شەنەۋنىكتەر ءبارىن رەتكە كەلتىرەمىز, الاڭداۋعا ەش نەگىز جوق دەگەن جۇباتۋىنان جاڭىلار ەمەس.
سولتۇستىك قازاقستان وبلىسى
