العاشقى قويىلىمىمەن-اق كوكشەتاۋلىق جاس قاۋىمدى جالت قاراتقان اتالمىش تەاتردىڭ الدەن-اق نىق باسقان اياق الىسى كوڭىل قۋانتارلىق. تاياۋدا اقتوبە قالاسىندا ءوتكەن ءتورتىنشى «بالاۋسا» ەكسپەريمەنتالدى قويىلىمدار فەستيۆالىنە قاتىسىپ, ولجالى ورالدى. بۇل ونەر دوداسىندا وزبەكستان, ارمەنيا, قىرعىزستان, تاتارستاننىڭ كاسىبي تەاترلارىنىڭ ۇجىمدارى باق سىناسقان. كوكشەتاۋلىق جاس تەاتر ۇجىمى ايگيز بايمۇحامبەتوۆتىڭ, انگيزا يشبۋلدينانىڭ «ارماندار كەمەسى» سپەكتاكلىن دايىنداپ اپارعان بولاتىن. باستى ءرولدى سومداعانداردى دا اتاي كەتكەن ءلازىم. ءىلياس بەينەسىندە جانىبەك ماحامبەتيار, ارۋجان بەگىمدى بەينەلەگەن ماۋليدا نۇرعاليەۆا, فاريد ءرولىن سومداعان قۋان امانجول, دايان ءرولىن قۋانىش جالعاس ويناعان. كوركەمدىك جەتەكشىسى ءارى رەجيسسەرى – فارحادبەك قانافين.
– ونەر بايقاۋى وتە تارتىستى ءوتتى. قاتىسۋشىلاردىڭ ءبارى دەرلىك ساحنا مادەنيەتىن جەتىك مەڭگەرگەن, كاسىبي تۇرعىدا ابدەن تولىسقان اكتەرلەر. ال ءبىزدىڭ جاستار تەاترىنىڭ اكتەرلەرى اقان سەرى اتىنداعى جوعارى ءمادەنيەت كوللەدجىنىڭ ءبىلىم الۋشىلارى, – دەيدى فارحادبەك قانافين, – كوللەدج ديرەكتورى قۇرالاي ىدىرىسوۆا ءبىزدىڭ تالابىمىزدى قولداپ, كومەگىن كوپ تيگىزىپ وتىر. بۇل فەستيۆال جاستار جىلى مەن اقتوبە قالاسىنىڭ 150 جىلدىعىنا وراي ۇيىمداستىرىلدى. ءبىز ءۇشىن ءتاجىريبە الماسقان, شىن شەبەرلىكتىڭ شىڭىن نۇسقاعان ساباق بولدى. قازىلار القاسىنىڭ شەشىمىمەن «وزەكتى ساحنا ءتىلىن ىزدەگەنى ءۇشىن» اتالىمى بويىنشا سىيلىققا يە بولدىق.
