قازاقستان رەسپۋبليكاسىنىڭ پرەمەر-ءمينيسترى اسقار ءماميننىڭ رەسەي فەدەراتسياسىنا ساپارى اياسىندا ونەركاسىپ سالاسىنا قاتىستى ەكى قۇجاتقا قول قويىلدى. ولار: «اگروماشحولدينگ KZ» اق-دا كيروۆەتس ماركالى تراكتورلار مەن ولاردىڭ قۇرامداس بولشەكتەرى ءوندىرىسىن ۇيىمداستىرۋ» جوباسىن ىسكە اسىرۋ بويىنشا جول كارتاسى جانە ارنايى تەحنيكا مەن كاماز اۆتوكومپونەنتتەرىن ءوندىرۋ بويىنشا بىرلەسكەن جوبالاردى ىسكە اسىرۋ ىنتىماقتاستىعى تۋرالى كەلىسىم.
قازاقستاندىق تاراپتان ارنايى تەحنيكا مەن كاماز اۆتوكومپونەنتتەرىن ءوندىرۋ بويىنشا بىرلەسكەن جوبالاردى جۇزەگە اسىرۋ جونىندەگى ىنتىماقتاستىق تۋرالى كەلىسىمگە قر يندۋستريا جانە ينفراقۇرىلىمدىق دامۋ ۆيتسە-ءمينيسترى امانياز ەرجانوۆ, قازاقستان اۆتو بيزنەسى قاۋىمداستىعىنىڭ پرەزيدەنتى اندرەي لاۆرەنتەۆ, «قدب-ليزينگ» اق باسقارما توراعاسى نۇرلان بايبازاروۆ, ال رەسەي تاراپىنان رەسەي فەدەراتسياسىنىڭ ونەركاسىپ جانە ساۋدا ۆيتسە-ءمينيسترى الەكساندر موروزوۆ پەن «كاماز» جاق باس ديرەكتورى سەرگەي كوگوگين قول قويدى.
امانياز ەرجانوۆ اتاپ وتكەندەي, كەلىسىم اياسىندا قر يدم ەلدىڭ قولدانىستاعى زاڭناماسىنا سايكەس قازاقستان رەسپۋبليكاسىنىڭ اۋماعىندا ءوندىرىستى ينۆەستيتسيالاۋ ءۇشىن قولايلى جاعدايلار جاساۋعا جانە وندىرىسكە قولداۋ كورسەتۋگە نيەتتى. اتاپ ايتقاندا, مەملەكەتتىك باعدارلامالار اياسىندا جەڭىلدىكپەن قارجىلاندىرۋ ارقىلى قازاقستاننىڭ ىشكى جانە سىرتقى نارىقتارىندا ءوندىرىس ونىمدەرىنە سۇرانىستى قولداۋ شارالارىن قابىلداۋ, ءونىمدى مەملەكەتتىك قاجەتتىلىكتەر مەن كۆازيمەملەكەتتىك سەكتوردىڭ قاجەتتىلىكتەرى ءۇشىن ساتىپ الۋعا قاتىسۋ كەزىندە مەملەكەتتىك قولداۋ شارالارىن قابىلداۋ جانە باسقا دا شارالار بار.
رەسەي فەدەراتسياسىنىڭ ونەركاسىپ جانە ساۋدا مينيسترلىگى رەسەي فەدەراتسياسىنىڭ قولدانىستاعى زاڭناماسىنا سايكەس وندىرىسكە قولداۋ كورسەتۋگە, سونىڭ ىشىندە ءوندىرىس ءۇشىن قاجەتتى قۇرامداس بولشەكتەردى رەسەيدەن ەكسپورتتاۋعا قولداۋ كورسەتۋگە نيەت ءبىلدىرىپ وتىر. «كاماز» جاق وكىلدەرى دە كاماز ماركالى جۇك اۆتوموبيلدەرىنىڭ ۇگلىلىك قاتارىن كەڭەيتۋ ماقساتىندا قاجەتتى شارالار جۇرگىزۋگە نيەتتى. اتاپ ايتقاندا, قازاقستان رەسپۋبليكاسىندا ارنايى اۆتوتەحنيكانى جانە قازاقستان رەسپۋبليكاسىنىڭ ىشكى نارىعى ءۇشىن دە, ەكسپورتتىق نارىقتارعا وتكىزۋ ءۇشىن دە جولاۋشىلار كولىگىنىڭ مودەلدەرىن ءوندىرۋ, قازاقستان رەسپۋبليكاسىنىڭ اۋماعىندا ءوندىرۋ ءۇشىن اۆتوكومپونەنتتەردى, ونىڭ ىشىندە كاماز ماركالى جۇك كولىگى ءۇشىن بىلىك رەدۋكتورلارىن شوعىرلاندىرۋ, ءوندىرۋ جانە وندىرىلەتىن ءونىم ءۇشىن اۆتوكومپونەنتتەردىڭ ەكسپورتىن دامىتۋ باعدارلاماسىن ازىرلەۋ.
«قدب-ليزينگ» اق قۇرال-جابدىقتار مەن قۇرىلىس-مونتاجداۋ جۇمىستارى قۇنىنان 30%-كە دەيىنگى مولشەردە اۆانس جاساۋدى, سونداي-اق وندىرىلەتىن ءونىمدى ساتىپ الاتىن تۇلعالاردى ليزينگتىك قارجىلاندىرۋدى قامتاماسىز ەتۋ كەزىندە Tobolkz نەگىزگى قۇرال-جابدىقتارىن ساتىپ الۋعا نەمەسە كاماز كاپيتالىنىڭ قاتىسۋىمەن قۇرىلعان وزگە دە بىرلەسكەن كاسىپورىنعا 70%-كە دەيىنگى مولشەردە ليزينگتىك قارجىلاندىرۋدى ۇسىنۋ ارقىلى ءوندىرىستى ۇيىمداستىرۋعا جانە دامىتۋعا قولداۋ كورسەتۋگە نيەتتى.
ەكىنشى قۇجات - «اگروماشحولدينگ KZ» اق-دا كيروۆەتس ماركالى تراكتورلار مەن ولاردىڭ قۇرامداس بولشەكتەرى ءوندىرىسىن ۇيىمداستىرۋ» جوباسىن ىسكە اسىرۋ بويىنشا جول كارتاسىنا قازاقستان تاراپىنان قازاقستان اۆتو بيزنەسى قاۋىمداستىعىنىڭ پرەزيدەنتى اندرەي لاۆرەنتەۆ جانە رەسەي تاراپىنان «پەتەربۋرگسكي تراكتورنىي زاۆود» اق ديرەكتورى سەرگەي سەرەبرياكوۆ قول قويدى.
قۇجاتتا زاڭنامانىڭ تۇراقتىلىعىن قامتاماسىز ەتۋ, ءوندىرىستى ىسكە اسىرۋدا ۇستەمە مىندەتتەمە الۋ كەزىندە قاجەتتى سىرتقى ينفراقۇرىلىممەن (اۆتوجول جانە ت/ج جولى) ءوندىرىستى قامتاماسىز ەتۋ ماقساتىندا ينۆەستيتسيالىق ءوندىرىستى قولداۋ ماسەلەلەرى قاراستىرىلادى.
قۇجات سالىق پرەفەرەنتسيالارىن, كاماز ءوندىرىسىنىڭ اۆتوموبيلدەرىن جانە ولاردىڭ قۇرامداس بولشەكتەرىن جاساۋعا باعىتتالعان جەڭىلدىكپەن قارجىلاندىرۋدى (ونىڭ ىشىندە ليزينگتىك قارجىلاندىرۋدى), سونداي-اق قۇرىلعان وندىرىستەردىڭ دايىن ونىمدەرىن جەڭىلدىكپەن ليزينگتىك قارجىلاندىرۋدى, ينۆەستيتسيالىق سۋبسيديا, قازاقستان رەسپۋبليكاسىندا مەملەكەتتىك قولداۋدىڭ باسقا دا فورمالارى ەسەبىنەن جابدىقتار مەن قۇرىلىس-مونتاج جۇمىستارىنا ينۆەستيتسيالاردىڭ 30%-ءتىن قايتارۋدى قاراستىرادى.
