ايماقتار • 26 ءساۋىر، 2019

پاۆلودار وبلىسىندا دالا ورتتەرى باسىلماي تۇر

ءورت سوندىرۋشىلەردىڭ حابارلاۋىنشا،وڭىردە ءساۋىر ايىنىڭ ورتاسىنا قاراي بىرنەشە كۇن ورتەنگەن دالا اۋماعىنىڭ كولەمى انىقتالۋدا.

فاريدا بىقاي

وسى كەزدە دالا ورتتەرىنە قاتىستى 100-دەن استام شاقىرتۋ تۇسكەن. دالا ورتتەرى وبلىس ورتالىعى اۋماعىنان بولەك، اقتوعاي، شارباقتى اۋداندارى جانە ەكىباستۇز، اقسۋ قالالارى ماڭىندا انىقتالعان. قازىرگى ۋاقىتتا ءورت ءسوندىرۋ بەكەتتەرى، ەرىكتىلەر دالا ءورتىنىڭ الدىن الۋ ءۇشىن ءتۇرلى قاۋىپسىزدىك، ساقتاندىرۋ جۇمىستارىن اتقارۋدا.

دالالىق جانە ورماندىق جەرلەر عارىشتان دا باقىلانادى. جالپى، بىلتىرعى جىلدىڭ وسى كەزەڭىندە 117 ءورت بولىپ، 115 گەكتار جەر جانىپ كەتىپتى. بۇگىندە قالا اۋماعىنداعى ساياجايلار باقىلاۋعا الىپ، رەيد جۇرگىزىلۋدە. ال، وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ مالىمەتىنشە، ورمان ورتەندى دەگەن مالىمەتكە كەلسەك، بۇل جاڭساق مالىمەت ەكەن، ورمان ورتەنبەگەن. بۇعان سەبەپ، «تايلاق» شارۋا قوجالىعىنىڭ ورمانشىلارى 30 گەكتار اۋماقتاعى شوپكە جوسپارلى تۇردە جاعۋ جۇمىستارىن جۇرگىزگەن.

بىراق، جەل باعىتىنىڭ كەنەتتەن وزگەرۋىنە بايلانىستى جالىن شارباقتى اۋدانى اۋماعىنداعى مەملەكەتتىك ورمان قورىنىڭ اۋماعىنا جەتكەن. جالىننان قۇرعاق ءشوپ پەن اعاشتىڭ تۇقىمدارى زارداپ شەككەن. ال،وڭىردەگى «ەرتىس ورمانى» رەزەرۆاتىنداعى ورمان امان.

- قاراعايلاردىڭ جاس وسكىندەرىن شارپىعانى بولماسا، قۇرعاق ءشوپ لاۋلاپ جانعان. ارادا التى ساعات وتكەن سوڭ ءورت ءوشىرىلدى،- دەيدى ينسپەكتسيا باسشىسىنىڭ م.ا. قايرات ابىلباەۆ. زارداپ شەككەندەر مەن قۇربان بولعاندار جوق. وڭىرلىك تج دەپارتامەنتىنىڭ مالىمەتىنشە، ءورت سوندىرۋگە 112 ادام جانە 34 تەحنيكا قاتىستى.

قازىر ورمان القابىن تۇراقتى كۇزەتۋ،توسىن ورتتەن ساقتاۋ جۇمىستارى جۇرگىزىلۋدە.

پاۆلودار

سۋرەت توتەنشە جاعدايلار دەپارتامەنتىنەن الىندى