كەزدەسۋدە ەكىجاقتى ىنتىماقتاستىقتىڭ وزەكتى ماسەلەلەرى تالقىلاندى. اتاپ ايتقاندا, ساۋدا-ەكونوميكالىق سالاداعى, ينۆەستيتسيالىق ىنتىماقتاستىقتاعى, ونەركاسىپتىك كووپەراتسياداعى, كولىك-ترانزيت سالاسىنداعى, عارىش قىزمەتىندەگى ءوزارا ءىس-قيمىلدى ودان ءارى نىعايتۋ ءجانە ارتتىرۋ, شەكارا ماڭى ىنتىماقتاستىعىن جانە ايماقارالىق بايلانىستاردى دامىتۋ ماسەلەلەرى قارالدى.
«ەكى ەل اراسىنداعى اشىق سەنىمدى قاتىناستار قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن رەسەي پرەزيدەنتى ۆلاديمير پۋتيننىڭ ستراتەگيالىق باعدارىنا سۇيەنە وتىرىپ, بارلىق سالادا قارقىندى دامىپ كەلەدى», دەدى قازاقستان پرەمەر-ءمينيسترى.
ا.مامين «قازاقستان پرەزيدەنتى ق.توقاەۆتىڭ ءماسكەۋگە جۋىرداعى رەسمي ساپارى جانە جوعارى دەڭگەيدە وتكەن كەلىسسوزدەر ەكى ەلدىڭ ستراتەگيالىق ءوزارا ءىس-قيمىلىنىڭ ودان ءارى دامۋىنا قوسىمشا سەرپىن بەرگەنىن» ايتىپ, «بىرلەسكەن بەلسەندى جۇمىسقا باعىتتالعان, قول جەتكىزىلگەن ۋاعدالاستىقتاردىڭ ماڭىزىن, بۇگىنگى كەزدەسۋدىڭ اتالعان ۋاعدالاستىقتاردى ىسكە اسىرۋدىڭ تاجىريبەلىك قادامدارىن تالقىلاۋدىڭ جاقسى مۇمكىندىگى» ەكەنىن جەتكىزدى.
رەسەي ۇكىمەتىنىڭ توراعاسى د.مەدۆەدەۆ قازاقستان پرەمەر-مينيسترىنىڭ ماسكەۋگە ساپارىنىڭ ءبىرقاتار ستراتەگيالىق مىندەتتى تالقىلاپ, شەشۋدەگى, تەك ەكىجاقتى فورماتتا ەمەس, سونداي-اق ەاەو اياسىندا كۇن تارتىبىندە تۇرعان اۋقىمدى باعدارلامالاردى ىسكە اسىرۋداعى ماڭىزىن اتاپ ءوتتى.
قازاقستان ۇكىمەتىنىڭ ينۆەستيتسيالار تارتۋ بويىنشا قابىلداعان جاڭا شارالارى تۇرعىسىنان ەكى ەل اراسىنداعى ينۆەستيتسيالىق ىنتىماقتاستىقتى ودان ءارى ۇلعايتۋ جونىندە پىكىر الماسىلدى.
«جاڭا تاسىلدەر ينۆەستورلار ءۇشىن, سونىڭ ىشىندە رەسەيلىك سەرىكتەستەر ءۇشىن بارىنشا قولايلى جاعدايلار جاسايدى», دەگەن ا.مامين, «استانا» حالىقارالىق قارجى ورتالىعىنىڭ ەاەو اياسىندا قارجىلىق ءبىرلەسۋ ءۇشىن, شەتەلدىك ينۆەستيتسيالاردى تارتىپ, ەۋرازيا ايماعىنىڭ كاپيتال نارىقتارىن دامىتىپ, ىلگەرىلەتۋگە ءۇلكەن پەرسپەكتيۆالارى بار ەكەنىن جەتكىزدى.
تاراپتار ساۋدا-ەكونوميكا سالاسىنداعى ءوزارا ءىس-قيمىلدى كەڭەيتۋدەگى ىنتىماقتاستىق جونىندەگى ۇكىمەتارالىق كوميسسيانىڭ ءرولىن اتاپ ءوتتى. ۇاك كەزەكتى وتىرىسى بيىل ماۋسىم ايىندا قازاقستاندا وتەدى دەپ جوسپارلانعان.
ا.ءمامينننىڭ رەسەيگە جۇمىس ساپارى اياسىندا قازاقستان ۇكىمەتىنىڭ باسشىسى مەن رەسەي ۇكىمەتى باسشىسىنىڭ قاتىسۋىمەن «كاماز» كولىك جابدىقتارى ماركاسى ءۇشىن تەحنيكا جانە ونىڭ قۇرامداستارىن ءوندىرۋ جوباسىن ىسكە اسىرۋ بويىنشا ىنتىماقتاستىق تۋرالى كەلىسىمگە قول قويىلدى. كەلىسىمگە رەسەي ونەركاسىپ جانە ساۋدا ءمينيسترىنىڭ ورىنباسارى ا.موروزوۆ, قازاقستان يندۋستريا جانە ينفراقۇرىلىمدىق دامۋ ۆيتسە-ءمينيسترى ا.ەرجانوۆ, «كاماز» ااق باس ديرەكتورى س.كوگوگين, قازاقستان اۆتوبيزنەس قاۋىمداستىعىنىڭ پرەزيدەنتى ا.لاۆرەنتەۆ, «برك-ليزينگ» اق باسقارما توراعاسى ن.بايبازاروۆ, «Tobol kz» جشس باسقارۋشى ديرەكتورى د.شۇكىجانوۆا قول قويدى.
