القالى باس قوسۋدى جۇرگىزگەن مودەراتور, «Urpag» قازاق مادەني-اعارتۋ ورتالىعىنىڭ ءتورايىمى گۇلباقشا مۇساباەۆا جينالعانداردىڭ نازارىن ەلىمىزدەگى ەڭ ىقپالدى ساياسي ۇيىمنىڭ تاياۋدا وتكەن كەزەكتەن تىس ءحىح سەزى قابىلداعان وتە ماڭىزدى ساياسي شەشىمىنە اۋدارىپ, وڭىردەن قاتىسقان دەلەگاتتاردىڭ پارتيا توراعاسى نۇرسۇلتان نازارباەۆتىڭ ۇسىنىسىن ءبىراۋىزدان قولداعانىن جەتكىزدى.
« ەلباسى تاڭداپ العان ساياسي جانە ەكونوميكالىق باعدار ساباقتاستىعىنىڭ وزگەرمەيتىنىنە, ودان ءارى جالعاساتىنىنا كەپىلدىك بەردى. قاسىم-جومارت توقاەۆتى ەلىمىزدەگى جوعارى لاۋازىمعا لايىقتى ۇمىتكەر رەتىندە تاپسىرىلعان مەملەكەتتىك جوعارى قىزمەتتەردى ابىرويمەن اتقارعانىن اتاپ كورسەتتى. «قاسىم-جومارت توقاەۆتىڭ بۇۇ باس حاتشىسىنىڭ ورىنباسارى بولعانىن جانە تاجىريبەلى مەملەكەت ساياساتكەرى ەكەنىن جاقسى بىلەسىزدەر» دەپ ازاماتتىق تۇلعاسىنا جوعارى باعا بەردى. سونىمەن قاتار سايلاۋدى تالاپقا ساي وتكىزۋ جونىندە بىرقاتار تاپسىرمالار جۇكتەدى. سولتۇستىكقازاقستاردىقتار دا ەل تۇتاستىعىن ايقىندايتىن, اۋىزبىرلىگىمىزدى ايعاقتايتىن سايلاۋ ۋچاسكەلەرىنە ءبىر كىسىدەي بارىپ, ۇيىمشىلدىقپەن قاتىسارى انىق», دەدى گۇلباقشا نۇرمۇقانقىزى.
وبلىستىق حالىقتار اسسامبلەياسى جانىنداعى اقساقالدار كەڭەسىنىڭ توراعاسى, «دۋسلىك» تاتار-باشقۇرت قوعامىنىڭ مۇشەسى فانيس ليتفۋللين كەزەكتەن تىس سەزد شەشىمدەرىنە قاتىستى وي ساباقتادى.
«تاۋەلسىزدىكتىڭ ەلەڭ-شاعىنداعى وتكەل, اسۋ بەرمەس ءتارىزدى كورىنەتىن ەكونوميكالىق قيىندىقتار ءالى كۇنگە دەيىن كوز الدىمىزدا, اعا ۇرپاق ونى ەشقاشان ۇمىتپايدى. وسىنداي «تار جول, تايعاز كەشۋ» كەزەڭىندە ەل تىزگىنىن نۇرسۇلتان ءابىش ۇلى سياقتى كەمەل تۇلعاعا, ساياساتكەرگە سەنىپ تاپسىردىق. قازاقستان حالقى تاڭداۋدان قاتەلەسپەگەنىنە بۇگىنگى ءومىر شىندىعى دالەل. وتانىمىزدى وركەندەتۋ, وركەنيەتتى مەملەكەتتەر قاتارىنا قوسۋ جولىنداعى ەڭبەگى ۇشان-تەڭىز. ونى ەشكىم جوققا شىعارا المايدى. پرەزيدەنتتىك وكىلەتتىگىن ءوز ەركىمەن توقتاتىپ, ەگەمەندىك العاننان بەرى قاسىندا جۇرگەن, بىرگە قىزمەت ەتكەن سىرالعى كوماندالاسى, ۇلكەن قايراتكەر قاسىم-جومارت توقاەۆقا تاپسىرۋى بىردەن-ءبىر ءادىل شەشىم دەر ەدىم. ونىڭ قازاقستاندىقتاردى سارا جولدان اداستىرماي, بيىكتەرگە باستاي بەرەتىنىنە بەك سەنىمدىمىن», دەگەن ول ەلباسى ۇسىنعان ۇمىتكەردى ءبىراۋىزدان قولداۋعا شاقىردى.
جيىندا «سومونيون» تاجىك ەتنومادەي ۇيىمىنىڭ جەتەكشىسى انۆارشوح اميرشاەۆ, «اششى بەلدەۋ» رەسپۋبليكالىق بىرلەستىگىنىڭ جەرگىلىكتى فيليالىنىڭ توراعاسى ولەگ كۋزنەتسوۆ, «ءرادزىما» بەلورۋس مادەني ۇيىمىنىڭ ءتورايىمى, «جاڭعىرۋ جولى» قوزعالىسىنىڭ مۇشەسى ماريا تاتارەنكو ءسوز الىپ, الدىمىزدا ۇلكەن ساياسي ناۋقان تۇرعانىن, وعان تىڭعىلىقتى ازىرلىكتەر جاساۋ باستى تالاپ ەكەنىن, سايلاۋدى اشىق, ءادىل وتكىزۋدىڭ بارلىق العى شارتتارى قالىپتاسقانىن جەتكىزدى.
فورۋمعا قاتىسۋشىلاردىڭ وي-پىكىرلەرى ۇلتارالىق, كونفەسسياارالىق جاراسىمدىلىقتىڭ نەگىزى ءوزارا تۇسىنىستىك, ساباقتاستىق دەگەن ارنادا توعىستى.
