وبلىس اتتاس اۋداننىڭ زارەچنىي پوسەلكەسىندە تۇراتىن گۇلسارا الماعامبەتوۆانىڭ ءتورت بالاسى بار. ول كوپ جىل بۇرىن جۇمىس ىستەپ جۇرگەن بالا باقشادان كەتتى دە, ۇيدە وتىرىپ, ۋاقىتىن بالالارىنىڭ تاربيەسىنە ارنادى. قازىر بالالارى ءوستى. ول جاقىندا «باستاۋ» كۋرسىن وقىپ, سەرتيفيكات العان بولاتىن.
«العاشىندا مەن ءىسىمىزدى باستاۋعا قورىقتىم. ويتكەنى بيزنەسپەن ەشقاشان اينالىسپاعان سوڭ, تۇسىنبەگەنىم راس ەدى. بىراق ەشقانداي قيىندىعى جوق ەكەن. اقمارال بەكمۇرزاەۆانىڭ بيزنەس-جاتتىعۋىنىڭ ارقاسىندا ءبارىن دە ءتۇسىندىم, ىقىلاسىم وياندى» دەيدى گۇلسارا.
كوپ بالالى انا العان 3 ميلليون تەڭگە نەسيەگە 10 سيىر ساتىپ الدى. وتباسى بۇرىن تەك قۇس وسىرگەن بولاتىن, سوندىقتان العاشىندا سيىردى كۇتۋ ولارعا جەڭىل بولمادى. گۇلسارانىڭ جولداسى, بالالارى جۇمىلعاندا ءىس وڭعارىلىپ جۇرە بەردى.
«ازىرگە ءسۇت مول ەمەس, بىراق الداعى ۋاقىتتا ونى كوبەيتەمىز دەگەن ويىمىز بار. سالىق ەسەبىن جاساۋ قيىن سەكىلدى كورىنەتىن, وعان كاسىپكەرلەر پالاتاسىنان ماماندار كومەكتەسەدى. جالعىز عانا قيىندىق بار, ول – جايىلىمنىڭ تارلىعى» دەيدى گۇلسارا.
الماعامبەتوۆتەر وتباسى ازىرگە كاسىبىن ورنىقتىرۋ ءۇشىن كوپ جۇمىس اتقارۋدا. ولار الداعى ۋاقىتتا مال شارۋاشىلىعىنان تەك ءسۇت وندىرمەي, ونى كەڭەيتۋدى ماقسات تۇتىپ وتىر.
