كەزدەسۋ بارىسىندا ينۆەستيتسيالىق ىنتىماقتاستىقتى جانە قر ۇكىمەتىنىڭ ينۆەستورلاردى قولداۋ ەكوجۇيەسىن دامىتۋ جونىندەگى جاڭا تاسىلدەرى اياسىندا ءوزارا ءىس-قيمىلدى ودان ءارى ارتتىرۋ ماسەلەلەرى تالقىلاندى.
قر پرەمەر-ءمينيسترى ا. مامين ەكونوميكا دامۋىنىڭ, ساۋدا جانە ينۆەستيتسيالار ءوسىمىنىڭ وڭ قارقىنىن اتاپ ءوتتى. 2018 جىلى قازاقستانعا تىكەلەي شەتەلدىك ينۆەستيتسيالاردىڭ ءتۇسىمى 15,8% ءوسىپ, $24 ملرد قۇرادى. وتكەن جىلى قازاقستاننىڭ سىرتقى ساۋدا كولەمى 20% ءوستى.
«قازاقستان ۇكىمەتىنىڭ ينۆەستيتسيالاردى تارتۋعا اسا قولايلى جاعدايلار جاساۋعا ءارى ينۆەستورلاردىڭ قۇقىقتارىن قورعاۋدى كۇشەيتۋگە ەرەكشە كوڭىل ءبولۋى جانە قر پرەمەر-ءمينيسترىنىڭ وعان تىكەلەي قاتىسۋى – ينۆەستورلار ءۇشىن وتە جاقسى بەلگى», — دەدى امەريكا ساۋدا پالاتاسىنىڭ اتقارۋشى ديرەكتورى د. برەدبيۋري.
ينۆەستيتسيالىق ىنتىماقتاستىق الەۋەتىن اتاپ وتە وتىرىپ, ديپلوماتيالىق ميسسيالاردىڭ باسشىلارى قازاقستاندا جۇرگىزىلىپ جاتقان ينۆەستيتسيالىق احۋالدى جاقسارتۋ جونىندەگى جۇمىستاردى قولدايتىندارىن جانە تىعىز ىنتىماقتاستىقتى ودان ءارى جالعاستىرۋعا مۇددەلى ەكەندەرىن ءبىلدىردى. ولاردىڭ پىكىرىنشە, ينۆەستيتسيالىق جوبالاردى ىسكە اسىرۋمەن بايلانىستى بارلىق ماسەلەلەردى قر پرەمەر-ءمينيسترىنىڭ توراعالىعىمەن ۇيلەستىرۋ كەڭەسى دەڭگەيىندە تىكەلەي ءارى ەركىن تالقىلاۋ مۇمكىندىگى — ينۆەستورلار تاراپىنان سەنىمنىڭ ارتۋىنىڭ ماڭىزدى فاكتورى.
ءوز كەزەگىندە قر پرەمەر-ءمينيسترىنىڭ ءبىرىنشى ورىنباسارى – قارجى ءمينيسترى ءا. سمايىلوۆ, «استانا» حالىقارالىق قارجى ورتالىعىنىڭ باسقارۋشىسى ق. كەلىمبەتوۆ شەتەلدىك ينۆەستيتسيالاردى بەلسەندى تۇردە تارتۋدىڭ جاڭا تاسىلدەرىنە توقتالىپ ءوتتى. ينۆەستورلارمەن بەلسەندى جۇمىس جۇرگىزۋدىڭ ايماقتىق حابىنا اينالاتىن احقو ءساتتى جۇمىس ىستەپ تۇر. ونىڭ اۋماعىندا قولايلى جۇمىس ىستەۋگە جانە ينۆەستيتسيالىق جوبالاردى ىسكە اسىرۋعا بارلىق قاجەتتى جاعدايلار جاسالعان. بۇل اعىلشىن قۇقىعى قاعيدالارىنا نەگىزدەلگەن تمد كەڭىستىگىندەگى العاشقى, بىرەگەي قۇقىقتىق رەجيم, تاۋەلسىز سوت جانە اربيتراج ورتالىعى.
كەزدەسۋدى قورىتىندىلاي كەلە, قر پرەمەر-ءمينيسترى ا. مامين ينۆەستيتسيالىق احۋالدى ودان ءارى جاقسارتىپ, شەتەلدىك ينۆەستورلارعا جانە قازاقستاندا بيزنەس جۇرگىزۋگە قولايلى جاعدايلار جاساۋعا بارلىق كۇش-جىگەردىڭ جۇمىلدىرىلاتىنىن ايتتى.
«ءبىز ءوزارا ءىس-قيمىلىمىزدى جانداندىرۋعا مۇددەلىمىز. ينۆەستيتسيالار تارتۋ جونىندەگى جاڭا كۇشەيتىلگەن شارالار ينۆەستيتسيالىق ىنتىماقتاستىققا ەلەۋلى قارقىن بەرەرىنە سەنەمىز», — دەدى ا. مامين.
