كەلىسسوزدەر بارىسىندا مەملەكەت باسشىسى قازاقستان مەن كورەيا رەسپۋبليكاسىنىڭ سەنىمدى ءارى ستراتەگيالىق ارىپتەس ەكەنىن اتاپ ءوتتى.
– ەكى حالىقتىڭ مادەني جانە ساۋدا بايلانىستارى ۇلى جىبەك جولى زامانىندا وركەندەپ, عاسىرلار بويى جالعاسىپ كەلەدى. قازاق جانە كورەي تىلدەرىنىڭ ورال-التاي توبىندا بولۋى حالىقتارىمىزدىڭ تاريحىنىڭ دا جاقىندىعىن ەكەنىن كورسەتەدى, – دەدى قازاقستان پرەزيدەنتى.
قاسىم-جومارت توقاەۆ قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قازاقستان مەن وڭتۇستىك كورەيا قارىم-قاتىناستارىنىڭ قالىپتاسىپ, نىعايۋىنا زور ۇلەس قوسقانىن ەرەكشە اتاپ ءوتتى.
– ەكىجاقتى سەرىكتەستىكتىڭ باستاۋىندا ەلباسى تۇرادى. ول ەلدەرىمىز بەن حالىقتارىمىزدىڭ اراسىنداعى دوستىق پەن ىنتىماقتاستىقتىڭ بەرىك ىرگەتاسىن قالادى, – دەدى مەملەكەت باسشىسى.
قاسىم-جومارت توقاەۆ قازاقستاننىڭ تاۋەلسىزدىك جىلدارىندا ەكى ەلدىڭ قارىم-قاتىناستارى ءىس جۇزىندە بارلىق باعىت بويىنشا ىقپالداستىقتىڭ ساپالى ءارى جاڭا دەڭگەيىنە كوتەرىلگەنىن ايتتى. سونداي-اق, ۇكىمەتارالىق كوميسسيا مەن قازاقستان-وڭتۇستىك كورەيا ىسكەرلىك كەڭەسىنىڭ جۇمىسىن جوعارى باعالادى.
– وڭتۇستىك كورەيا قازاقستان ءۇشىن ساۋدا-ينۆەستيتسيالىق جانە تەحنولوگيالىق ىنتىماقتاستىقتى دامىتۋ تۇرعىسىنان ماڭىزدى ون ەلدىڭ ءبىرى بولىپ تابىلادى. ءوزارا تاۋار اينالىمى كولەمىنىڭ قارقىندى ءوسۋىن ەرەكشە اتاپ وتەمىن. بىلتىرعى جىلدىڭ قورىتىندىسى بويىنشا ونىڭ كورسەتكىشى رەكوردتىق دەڭگەيگە, ياعني 4 ميلليارد دوللارعا جەتىپ, 2017 جىلعا قاراعاندا ەكى ەسەدەن استام ءوستى. ينۆەستيتسيا سالاسىنداعى ىنتىماقتاستىعىمىز جوسپارلى تۇردە دامىپ كەلەدى. كورەيادان قازاقستانعا تارتىلعان تىكەلەي ينۆەستيتسيا كولەمى 7 ميلليارد دوللارعا جەتتى. وڭتۇستىك كورەيالىق بيزنەس تاماق ونەركاسىبى, كەن بايىتۋ, اۆتوموبيل جانە ەكونوميكامىزدىڭ باسقا دا سالالارىندا تابىستى ەڭبەك ەتۋدە, – دەدى قازاقستان پرەزيدەنتى.
مەملەكەت باسشىسى ەكى ەلدىڭ مادەني-گۋمانيتارلىق بايلانىستارىن نىعايتۋعا كورەي دياسپوراسى زور ۇلەس قوسقانىن اتاپ ءوتىپ, كارىستەردىڭ قازاقستانداعى ءىرى ەتنيكالىق توپتاردىڭ قاتارىنا كىرەتىنىن ايتتى. قاسىم-جومارت توقاەۆ ەلىمىزدە تۇراتىن كارىستەردىڭ ەتنومادەني ەرەكشەلىگىن ساقتاۋ ءۇشىن قازاقستان ۇكىمەتى بۇدان بىلاي دا بارلىق جاعداي جاسايتىنىن ايتتى.
كورەيا رەسپۋبليكاسىنىڭ پرەزيدەنتى «قازاقستان – 2050» دامۋ ستراتەگياسىنا وڭ باعا بەرىپ, ورتالىق ازيا ەلدەرىنىڭ اراسىندا قازاقستاننىڭ جوعارى قارقىنمەن وركەندەپ كەلە جاتقانىن اتاپ ءوتتى.
– قازاقستان كورەي تۇبەگىندەگى بەيبىت ۇدەرىستى قولدايدى. وسى ءساتتى پايدالانىپ, قولداۋ كورسەتكەندەرىڭىز ءۇشىن ريزاشىلىعىمدى بىلدىرەمىن. قازاقستان يادرولىق قارۋدان ءوز ەركىمەن باس تارتقاننان كەيىن ەكونوميكالىق دامۋعا قول جەتكىزدى. بۇل كورەي تۇبەگى ءۇشىن وتە ماڭىزدى ۇلگى بولىپ تابىلادى, – دەدى مۋن چجە ين.
كەزدەسۋ سوڭىندا قاسىم-جومارت توقاەۆ ەكى ەل اراسىنداعى ىنتىماقتاستىقتى ودان ءارى وركەندەتۋ تۇرعىسىنان بۇگىنگى ساپاردىڭ ءمانى زور ەكەنىن, مەملەكەت باسشىسى رەتىندە قازاقستان مەن وڭتۇستىك كورەيانىڭ دوستىعىن ودان ءارى نىعايتۋعا ىقپال ەتەتىنىن ايتتى.
