بار ەكەن. ءبىر قۋانىپ, ءبىر وكىندىك. قۋانعانىمىز, جوق ىزدەگەن جولاۋشىنىڭ دىلگىر بولعان زاتىنا كەزىككەنى, ال, وكىنىش قاسقالداقتىڭ قانىنداي تاپشى بولىپ كەتكەن الگى زاتتىڭ وزگەنىڭ سورەسىندە جاتقاندىعىندا. كۇن قاققان قوڭىرقاي ءوڭدى, ايىر قالپاقتى قىرعىز اعايىن ەر توقىمنىڭ نەشە اتاسىن كورسەتتى. ات ارقاسىنا قۇيىپ قويعانداي بولىپ جاتاتىن جالپاعى, سانگە, سالتاناتقا ءمىنەتىن ۇيرەكباستى, جازىلعان الاقاندايى دا بار ەكەن. قولعا قوندىرعان قاۋىرسىنداي جەپ-جەڭىل, بايگەگە قوسقان جۇيرىك اتقا سالاتىنى دا جاتىر. الاتاۋدىڭ ارعى جاعىندا ەر شابۋعا لايىقتى اعاش از با, قۇراندى ەردىڭ سۇيەگىن ءبىرنەشە بولىكتەن قيۋلاستىرىپ, جەلىمدەپ جاساعان ەكەن. قايىڭنىڭ بەزى بولسا كەرەك, قۇيىلعان قورعاسىنداي ءبىرتۇتاس بولىپ جاتىر. وسىنىسى جاقسى, قايىڭ بەزى وتە بەرىك, كۇن استىندا كۇيگەنىمەن, قاڭسىمايدى. ەر سۇيەگىن شاباردا اعاشتى تۇزدى سۋعا سالىپ ءپىسىرۋ كەرەك. سوندا ەش ۋاقىتتا جارىلمايدى.
قىرعىز اعايىننىڭ كاسىبىنە قىزىققانىمىز-اي, قامشىنىڭ دا نەشە ءتۇرى بار. قىزعىلت رەڭدى سارىالا قامشى. ءۇش ءورىم دەيسىز بە, التى ءورىم دەيسىز بە, ءتۇر-ءتۇرىمەن. كيىزدەن سىرىلىپ, اينالا جيەگىن شۇعامەن كومكەرگەن توقىم دا, قىز جاساۋىنا جارايتىن ادەمى, بەرىك نوقتا دا بار ەكەن.
