– ەكى جىل ىشىندە ءبىز سانامىزدىڭ قالاي جاڭعىرعانىن, ويىمىزدىڭ قالاي توعىسقانىن, ەلىمىزدىڭ وتكەنىنە قانشالىقتى تەرەڭدەي تۇسكەنىمىزدى ەندى سەزىنىپ وتىرمىز, – دەدى بەلگىلى جازۋشى-دراماتۋرگ جابال ەرعاليەۆ, – ەلباسى ءوزىنىڭ ەڭبەگىندە ۇلت تاريحىن زەردەلەۋ, ونى قالىپتاستىرۋ مىندەتتەرىن قويعان بولاتىن. قازاقستاننىڭ كيەلى جەرلەرى گەوگرافياسىنىڭ جاسالۋىنىڭ ءوزى تاريحىمىزدى قۇرمەتتەۋگە باعىتتالعان قادام.
قازاقستاننىڭ كيەلى جەرلەرىنىڭ گەوگرافياسىنا اقمولا وبلىسىنان 10 نىساننىڭ ەنۋى جەرلەستەرىمىز ءۇشىن ۇلكەن ماقتانىش. دەمەك, الاشتىڭ جاقسىسى مەن جايساڭىنىڭ كىندىك قانى تامعان قاسيەتتى توپىراقتا وشپەس ءىزى قالىپ وتىر. ۋاقىت لەبىمەن ءسال كونەرگەن دۇنيەنى جاڭاشا جاسارتىپ, ەلدىڭ رۋحاني يگىلىگىنە جاراتۋ وسى باستامامەن بايلانىستى.
وبلىستىق ىشكى ساياسات باسقارماسىنىڭ ءبولىم باسشىسى كۇنىم جۇماەنوۆا ءوز سوزىندە باعدارلاما اياسىندا اتقارىلعان ءىستى جىپكە تىزگەندەي ەتىپ بايانداپ بەردى. ايماقتا وڭىرلىك-جوبالىق كەڭسە, 44 «رۋحاني جاڭعىرۋ» كابينەتى جۇمىس ىستەيدى. ۇستىمىزدەگى جىلى وبلىستىق دەڭگەيدەگى جوبالاردى ىسكە اسىرۋعا 18,181 ميلليارد تەڭگە قاراجات قاراستىرىلىپ وتىر. كوكشەتاۋ – استانا باعىتىنداعى تاس جولدىڭ بويىندا ۇلت ماقتانىشى – اقان سەرى, ءبىرجان سال, ۇكىلى ىبىراي, كەنەسارى قاسىم ۇلى, بالۋان شولاق ءتارىزدى تاريحي تۇلعالاردىڭ ەسكەرتكىشتەرى ورناتىلماق.
فورۋم بارىسىندا شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ پرورەكتورى اماناي سەيىتقاسىموۆ, فيلولوگيا عىلىمدارىنىڭ دوكتورى بەردىباي شالاباي, تاريحي-مادەني مۇرانى قورعاۋ جانە پايدالانۋ ورتالىعىنىڭ ءبولىم مەڭگەرۋشىسى جاسلان ۇكەەۆ ءسوز سويلەپ, لاتىن گرافيكاسىنا كوشۋ, ءتول تاريحىمىزدى زەردەلەۋ ماسەلەلەرىنە بايلانىستى ءوزىنىڭ ورىندى پىكىرلەرىن ءبىلدىردى.
فورۋمعا قاتىسۋشىلار « ۇلى دالانىڭ جەتى قىرى» تاقىرىبىنداعى كورمەنى, تەاترلاندىرىلعان قويىلىمدى تاماشالادى. اسىرەسە قازاقستان حالقى اقمولا اسسامبلەياسى جانىنداعى انالار كەڭەسى مۇشەلەرىنىڭ مۇباراك قولىنان تۋعان ونەر تۋىندىلارى كوزتارتارلىق. تەاترلاندىرىلعان قويىلىمدى كورگەن كورەرمەن كونە زاماننىڭ كومبەسىن كوكىرەگىنە كوشىرىپ, تۇڭعيىقتان ءنار العانداي.
ءدال سول كۇنى وبلىس ورتالىعىنداعى قالالىق كىتاپحانادا «رۋحاني جاڭعىرۋ» زالى مەن « ۇلى دالانىڭ ۇلى تۇلعالارى» فوتوگالەرەياسى اشىلدى.
اقمولا وبلىسى
