شيرەك فينال شەرۋى كەلدى

بەيسەنبى, 21 ماۋسىم 2012 7:38

سەيسەنبى كۇننىڭ كەشىندە وتكىزىلگەن انگليا-ۋكراينا, شۆەتسيا-فرانتسيا كوماندالارى اراسىنداعى ماتچتارمەن توپتىق راۋند مارەگە جەتتى. بۇل كەزەڭ سونىمەن بىرگە چەمپيوناتقا قاتىسۋشىلاردىڭ تەڭ جارتىسىن جارىس جولىنان شىعارىپ تاستادى.

بەيسەنبى, 21 ماۋسىم 2012 7:38

سەيسەنبى كۇننىڭ كەشىندە وتكىزىلگەن انگليا-ۋكراينا, شۆەتسيا-فرانتسيا كوماندالارى اراسىنداعى ماتچتارمەن توپتىق راۋند مارەگە جەتتى. بۇل كەزەڭ سونىمەن بىرگە چەمپيوناتقا قاتىسۋشىلاردىڭ تەڭ جارتىسىن جارىس جولىنان شىعارىپ تاستادى.

انگليا-ۋكراينا – 1:0. ءبىر نارسە ايقىن, ۋكراينا قۇراماسى بۇل جولى وتكەن تۋردا فرانتسۋزدارعا قارسى ويناعان ويىنىنان ارتىق, ال انگليا شۆەدتەرمەن شايقاسىن­داعىدان كەمدەۋ ونەر كورسەتتى. بۇل, اينالىپ كەلگەندە, كەزدەسۋدىڭ ونە بويىندا ۋكراين فۋتبولشىلارىنىڭ باسىمدىق كورسەتۋىنە اپارىپ جەتكىزدى. بىراق كەزدەسۋدە ناشارلاۋ ويناعاندار جەڭىسكە جەتتى دە, كەرىسىنشە مىقتىراق كورىنگەندەرى جەڭىلىستىڭ اششى ءدا­مىن تاتۋعا ءماجبۇر بولدى. بۇعان مول ءمۇم­كىندىكتەن ءبىر ناتيجە شىعارا الماعان ۋكراين ويىنشىلارىنىڭ وزدەرىن كىنالاۋعا دا بولادى, بار پالەنى ساتسىزدىكتىڭ اياقتان شىرماپ جىبەرمەگەنىنە ارتا سالۋدىڭ دا رەتى كەلەدى. تورەشىلەردىڭ ورالىمسىزدىقتارى تاعى بار.

اعىلشىندار ويىنداعى جالعىز گولدى وزدە­رىنىڭ العاشقى قارسى شابۋىلدارىنىڭ بىرىندە سالىپ كەتتى. ونى وسى ويىنعا قاتى­سا­تىنى ءبىراز جىر بولعان ۋەين رۋني ءوزىنىڭ ەكىنشى مارتە جاساعان تالپىنىسى كەزىندە, ەكىنشى تايمنىڭ ىلكى شاعىندا باسپەن ۇرىپ ءتۇسىردى. ال وعان دەيىن ۋكراين كومانداسى سونداي ءساتتىڭ بىرنەشەۋىن بوسقا جىبەرىپ العان ەدى. ەسەپ اشىلعاننان كەيىن دە ولار قارسى قاقپاعا جويقىن جورىقتارىن توقتات­قان جوق. اقىرىندا ولار ەسەپتى تەڭەستىرۋ ساتىنە دە جەتتى. بىراق قاقپانىڭ ۇستىڭگى ماڭدايشاسىنىڭ استىنان ءتيىپ, اق سىزىقتىڭ ارعى جاعىنا ءتيىپ شىققان دوپتى «گول» دەپ باعالاۋعا ءاربيتردىڭ ورەسى جەتپەدى.

تاعى ءبىر نارسە انىق, جارىس جولىنان ەرتە شىعىپ قالعانىمەن, ۋكراينا كومانداسى دا حورۆاتتار ءتارىزدى بەت-ءجۇزى ۇيالمايتىنداي ونەگەلى ونەر كورسەتتى.

شۆەتسيا-فرانتسيا – 2:0. بۇل ويىندا ارىستان تۇلعالى سكانديناۆيا اۋماعىنىڭ جىگىت­تەرى جارالى جولبارىستىڭ كەيپىن تانىتتى. كەزدەسۋدىڭ باسىنان ويىن تىزگىنىن ءوز قولدا­رى­نا العان ولار قارسى قاقپاعا قاراي جۇل­قىنا شاپقىلاۋدى فينالدىق ىسقىرىق ەستىل­گەنشە توقتاتپادى. شۆەدتەردىڭ بۇل ىنتالى ويىنى ەكىنشى تايمدا عانا گولعا اينالدى. ونى كوماندانىڭ ليدەرى زلاتان يبراگيموۆيچ سالدى. «ترە كرۋنۋر» بۇدان كەيىن دە شابۋىلىن سايابىرسىتپادى. سونىڭ ناتيجە­سىن­دە ەڭ سوڭعى مينۋتتا ەكىنشى دوپتى دا ءتۇسىردى (سەبەستيان لارسسون). ال وسى ماتچتىڭ ەڭ ۇزدىك ويىنشىسى بولىپ فرانتسۋز قاقپاشىسى تانىلۋى دا بەكەر ەمەس.

شۆەدتەر, البەتتە, وسى ويىندا قانداي ءبىر ءىرى ەسەپپەن جەڭىسكە جەتسە دە, شيرەك فينال­دىڭ ماڭايىنا جاقىنداپ بارا المايتىندارىن جاقسى ءبىلدى. سوعان قاراماستان, ولار تۋر­نيردەن كەتەر كەزىندە ەرەكشە مىنەز كورسە­تۋگە بەكەم بەل بايلاعان ەكەن. ونىسى جانە جاقسى شىقتى. دەمەك, الاڭنان ابىرويمەن كەتتى.

ەندى شيرەك فينالدا انگليا مەن يتاليا, فرانتسيا مەن يسپانيا جۇپتاسادى.

بۇگىن – سول پلەي-وففتىڭ ءبىرىنشى ويىنى. ال الاڭعا پورتۋگاليا جانە چەحيا قۇرا­ما­لا­رى شىعادى.

سەرىك ءپىرنازار,

«ەگەمەن قازاقستان».

ماتچ مينياتيۋرالارى

* بۇرناعى كۇنى وتكەن ۋكراينا-انگليا, شۆەتسيا-فرانتسيا اراسىن­داعى ماتچتاردا 3 گول سوعىلدى.

* چەمپيونات باستالعالى بەرى وتكەن 26 ويىندا بارلىعى 60 گول سالىندى. ولاردىڭ ءاربىر ماتچقا كەلەتىن ۇلەس سالماعى – 2,30 دوپ.

* دۇيسەنبى كۇنى ەكى ستاديوندا 111 710 ادامنىڭ باسى قوسىلدى. جالپى, بىرىنشىلىك باسىنان بەرگى كورەرمەن سانى 1 068 864 ادامعا تولدى.

* مەرگەندەر كوشىندە ەشقانداي وزگەرىس جوق. ونىڭ باسىندا 3 گول سوققان شابۋىلشىلار كەلەدى.

* وتكەن 2 ويىندا ويىنشىلارعا 8 ەسكەرتۋ بەرىلدى. سونىڭ ىشىندە اندەرس سۆەنسسون (شۆەتسيا), فيليپ مەكسەس (فرانتسيا), اناتولي تيموششۋك (ۋكراينا) ەكىنشى رەت «سارى قاعاز» الدى. بىرىنشىلىك باستالعالى بەرى 96 فۋتبولشىعا ەسكەرتۋ جاسالدى.

* ەكى ويىندا ۇزدىك ويىنشى اتاعىنا ۋگو لەريس (فرانتسيا) پەن ۋەين رۋني (انگليا) يە بولدى.

* وسى كەزگە دەيىن 3 ويىنشى الاڭنان قۋىلدى, 1 پەنالتي بەل­گى­لەن­دى, 1 اۆتوگول سوعىلدى. سونىمەن بىرگە 1 پەنالتي قاي­تارىلدى.

ۋكراينا قۇراماسىنىڭ  باس جاتتىقتىرۋشىسى ولەگ بلوحين.

ايتپاقشى…

* اعىلشىن فاناتتارى وتانداستارى سوۋل كەمپبەل­ل­دىڭ ءوزى شىعارعان دەرەكتى فيلم­دە انگليا قۇراماسى ۋكرا­ي­­نا­دان تەك تابىتپەن عانا قاي­تا الادى دەگەن ويدى ءبىلدى­ر­گەنى ءۇشىن قاتتى قاپا بولدى. وسىعان قارسىلىق رەتىندە ولار كەشە ۋكراينا-انگليا مات­چى الدىندا دونەتسكىگە جۋر­ناليسكە ارنالعان تابىتتى الا كەلدى. تابىت ەسەبىندە بەينەلەنگەن زاتتى قالانىڭ ورتالىق كوشەلەرىمەن الىپ وتكەن جانكۇيەرلەر اقىرىندا لەنين الاڭىنداعى يرلاند پابىنا (سىراحانا) توقتاپ, ءماجىلىس قۇردى.

* ەۋروپانىڭ قاق ورتاسىندا فۋتبولدان قۇرلىق چەمپيوناتى قىزىپ جاتقان­دا ارمەنيانىڭ استاناسى – ەرەۆان قالاسىندا بەلگىلى فۋتبولشى ەدۋارد ماركا­روۆقا قوشەمەت كورسەتۋ ءرا­سىمى بولىپ ءوتتى. كەزىندە با­كۋدىڭ «نەفتيانيگى» مەن ەرە­ۆان­نىڭ «اراراتى» ساپىندا جا­سىنداي جارقىلداعان فور­­ۆاردتىڭ تۋعانىنا كەشە, ماۋسىمنىڭ 20-سى كۇنى 70 جىل تولدى.

* رەسەي قۇراماسىنىڭ شابۋىلشىسى پاۆەل پوگرەبنياك كۇنى كەشە اعىلشىننىڭ «رەدينگ» كلۋبىمەن 4 جىلعا كە­لىسىم-شارت جاساسىپ ۇلگەردى. بۇل تۋرالى تۆيتتەردە «Sky Sports» اگەنتتىگى حابارلادى. وتكەن ماۋسىمدى 28 جاسار فۋتبولشى انگلياداعى «فۋلحەم» كومانداسىنىڭ ساپىندا وتكىزىپ ەدى. كوماندادا ارەن­دالىق نەگىزدە ويناعان ول بار-جوعى 12 ويىنعا شىعىپ, 6 گول سوقتى. كورسەتكىش جامان ەمەس. سودان بولار, وعان تالاسۋشىلار دا بولدى. پاۆەلدىڭ قالاعان كلۋبى ەندى وعان 500 مىڭ ەۋرو كولەمىندە اقى ءتو­لەيدى ەكەن.

* رەسەيدىڭ ونداعان فۋتبول فاناتتارى ءالى پول­شا­ ءتار­تىپ ساقشىلارىنىڭ قا­راۋ­ىندا وتىر. ولار 12 ماۋسىمدا رەسەي قۇراماسى­نىڭ پولشامەن, 16 ماۋسىمدا گرەكيامەن وتكەن ماتچ­تا­رى­نان كەيىن ق ۇلىپ استىنا ال­ىندى, دەپ حابارلايدى يتار-تاسس. جالپى, وسى ەكى كۇندە رەسەيلىك 27 جان­كۇيەر ۇستالىپتى. قازىر قا­ماۋداعىلاردان بولەك 17 ادام ءتۇرلى جازالار الىپ تا ۇلگەرىپتى: بىرقاتارى ايىپ­پۇلدار تولەۋگە ءماجبۇر ەتىل­سە, تاعى بىرقاتارى بىرنەشە ايعا باس بوستاندىعىنان ايىرىلعان.

* ۋەفا گەرمانيا فۋتبول وداعىنا قارسى تارتىپتىك ءىس اشتى. ول 17 ماۋسىم كۇنى لۆوۆتا گەرمانيا مەن دانيا قۇرامالارى اراسىنداعى ويىندا ورىن العان وقيعالارعا بايلانىستى كوتەرىلدى. گفر فۋتبولى باسشىلارى وسى ەل­دىڭ جانكۇيەرلەرى ماتچ كەزىن­دە وتشاشۋلار جاعىپ, رۇقسات ەتىلمەگەن باننەرلەر مەن نىشانداردى الىپ شىعىپ, وسى­عان مازمۇنداس ۇراندار ايت­قاندارى ءۇشىن جازىقتى بولىپ وتىر. ۋەفا-نىڭ باقى­لاۋ-تارتىپتىك ينستانتسياسى ءىستى 23 ماۋسىمدا قارايدى.

* ۋكراينا قۇراماسىنىڭ جۇلدىزى اندرەي شەۆچەن­كو­­نىڭ انگليامەن ويىنى ونىڭ ويىنشىلىق مانسا­بى­نىڭ قۇراما ساپىنداعى ەڭ سوڭعى رەسمي ماتچى بولدى. «دەگەنمەن, جاقىن ارادا ۋكراينادا وتەتىن جولداس­تىق كەزدەسۋگە شاقىرۋ الاتىن شى­عار­مىن دەپ ويلايمىن», دەيدى 36 جاسار فۋتبولشى.

ويلار, پىكىرلەر, كوزقاراستار

دە روسسي, يتاليا قۇراماسىنىڭ جارتىلاي قورعاۋشىسى:

– يرلانديامەن كەزدەسۋىمىز جاقسى ءوتتى. ماتچتىڭ الدىندا تەك ءوز ويىنىمىز تۋرالى ويلاۋىمىز كەرەكتىگى تالاي ايتىلدى. سەبەبى, يسپاندار­دىڭ جەڭەتىنىنە ەشكىمنىڭ كۇمانى بولمادى. دەگەنمەن, بۇل جەڭىستىڭ ولار ءۇشىن وڭايعا تۇسپەگەنىن ەندى بايقاپ وتىرمىز. ال ير­لاندىقتار تۋرنيرگە وتە جاقسى كوماندا اكەلىپتى. ولار ءوز جان­كۇيەر­لەرىنىڭ قۇرمەتتەۋىنە ابدەن لايىقتى. ال تاپ مۇنداي عاجايىپ فاناتتاردى مەن بۇرىن ەش جەردە كورگەن جوقپىن.

يواحيم لەۆ, گەرمانيا قۇراماسىنىڭ باس جاتتىقتىرۋشىسى:

– كەيبىر جۋرناليستەردىڭ سۇراقتارىنا جاۋاپ بەرەيىن, الدا گرەكيامەن وتەتىن ويىنىمىزدا ساياسات ەشقانداي دا ءرول وينامايدى. راس, قازىر ساياسات تۋرالى كوپ ايتىلىپ جاتىر. سونىڭ ىشىندە ەۋرووداق ەلدەرىنىڭ ءوزارا قارىم-قاتىناسى دا ءسوز بولۋدا. بىراق ونىڭ بىزگە قاتىسى جوق. قۇرامانىڭ انگەلا مەركەلمەن بايلانىسى وتە جاقسى. دەگەنمەن, ءبىز ونىمەن بىلاي كەلىسكەنبىز: كانتسلەر ءبىزدىڭ ىسىمىزگە ارالاسپايدى, ال باس جاتتىقتىرۋشى ساياساتقا باسىن سۇقپايدى. دۇرىسى – وسى. اركىم ءوز ىسىمەن اينالىسۋى كەرەك.

ولەگ بلوحين, ۋكراينا قۇراماسىنىڭ باس جاتتىقتىرۋشىسى:

– بۇل نەعىلعان تورەشىلىك؟ دوپ جارتى مەتر ىشكەرى قاقپاعا كىرىپ كەتەدى, ول مۇنى اڭعارمايدى. وندا بىزگە قاقپانىڭ ارتىندا تۇراتىن بەسىنشى ءاربيتردىڭ نە كەرەگى بار؟ تەرري ءوز ايىپ الاڭىندا قولىمەن وينايدى, تورەشى ۇندەمەيدى, كەررولل ءبىزدىڭ ويىنشىنى شىنتاعىمەن قاعىپ جىبەرەدى, تورەشى تاعى ءۇنسىز. ال مەن مىنا كوماندا ءۇشىن تيتتەي دە ۇيالمايمىن. ول وتە جاقسى وينادى جانە جەڭىلەتىن رەتى بولعان جوق.

قورىتىندى تۋرنير كەستەسى

س توبى