وتكەلدەن وتەشوۆ تە ءوتتى
سەيسەنبى, 12 ماۋسىم 2012 7:03
تالدىقورعاندا اۋىر اتلەتيكادان ەرلەر جانە قىزدار اراسىندا قازاقستان چەمپيوناتى اياقتالدى. لوندون وليمپياداسىنا ەلىمىزدىڭ اتىنان بايراق كوتەرىپ باراتىن تاڭداۋلى سەگىزدى انىقتايتىن سىنعا سپورت جانە دەنە ءتاربيەسى اگەنتتىگىنىڭ توراعاسى تالعات ەرمەگياەۆتىڭ ءوزى ارنايى كەلدى.
ولاردىڭ اراسىندا فرانتسيادا وتكەن الەم چەمپيوناتىندا ءۇشىنشى رەت التىن ءتاجدى كيىپ تۇرىپ: “لوندون وليمپياداسىنىڭ التىنى مەنىكى. باسقالارىڭنىڭ يەكتەرىڭ قىشىماي-اق قويسىن”, دەپ جاھانعا جار سالىپ كەتكەن ءبىزدىڭ جالى كۇدىرەيگەن ارىستان يليا يلين بار.
سەيسەنبى, 12 ماۋسىم 2012 7:03
تالدىقورعاندا اۋىر اتلەتيكادان ەرلەر جانە قىزدار اراسىندا قازاقستان چەمپيوناتى اياقتالدى. لوندون وليمپياداسىنا ەلىمىزدىڭ اتىنان بايراق كوتەرىپ باراتىن تاڭداۋلى سەگىزدى انىقتايتىن سىنعا سپورت جانە دەنە ءتاربيەسى اگەنتتىگىنىڭ توراعاسى تالعات ەرمەگياەۆتىڭ ءوزى ارنايى كەلدى.
ولاردىڭ اراسىندا فرانتسيادا وتكەن الەم چەمپيوناتىندا ءۇشىنشى رەت التىن ءتاجدى كيىپ تۇرىپ: “لوندون وليمپياداسىنىڭ التىنى مەنىكى. باسقالارىڭنىڭ يەكتەرىڭ قىشىماي-اق قويسىن”, دەپ جاھانعا جار سالىپ كەتكەن ءبىزدىڭ جالى كۇدىرەيگەن ارىستان يليا يلين بار.
وسى يلين بەيجىڭ وليمپياداسىنا بارار تۇستا دا “التىن مەنىكى» دەپ قارسىلاستارىنىڭ جۇرەگىن الىپ قويعان. ازيا ويىندارىندا دا تۋى جىعىلىپ كورگەن ەمەس. وعان كوكورىم شاعىندا-اق الەم چەمپيوناتىنىڭ التىنىن العان ءزۇلفيا چينشانلونى, الەم چەمپيوناتىنىڭ التىندارىن قوس-قوستان العان مايا مانەزا مەن سۆەتلانا پودوبەدوۆانى, قازاق قۇراماسىنىڭ ازىرگە سىرت كوزدەن ساقتاپ, جابۋلاپ وتىرعان قوس جۇلدىزى – وڭتۇستىكقازاقستاندىق ارلي چونتەيدى, اقتوبەلىك فارحاد حاركيدى قوسىڭىز. سەگىز جولدامانىڭ ەكەۋىن ەسەپتەمەگەندە, وسى ايدارلى التاۋدىڭ قاي-قايسىسى دا التىن مەدال ءۇشىن باسەكەلەسۋگە ابدەن لايىق.
سولاي بولدى دا. ءزۇلفيا چينشانلو جۇلقي جانە سەرپە كوتەرۋدە التى كەزەگىندە ءمۇلت كەتكەن جوق. ول قوسسايىس قورىتىندىسى بويىنشا الەم رەكوردىن جاڭارتۋعا ابدەن دايىن, جۇيكەسى تەمىردەي. وتە سابىرلى.
ال مايا مانەزا ساسقالاقتاپ قالدى. وعان بەيجىڭ وليمپياداسىنىڭ كۇمىس جۇلدەگەرى, سپورتقا ەڭبەك سىڭىرگەن شەبەر يرينا نەكراسوۆا ايتارلىقتاي قارسىلىق كورسەتتى. مايا جۇلقي كوتەرۋدە 107 كەلىگە تاپسىرىس بەرگەندە, يرينا 112 كەلى سۇرادى. مايا 115 كەلىمەن توقتادى. يرينا 121 كەلى كوتەرىپ كەتتى. باقانداي 6 كەلى ارتىق. مانەزا سەرپە كوتەرۋدە مىقتى دەگەنىڭىزبەن, يرينا ورتاشا سالماقتى الىپ جاتسا, قۇراما باپكەرىنىڭ ەكىۇداي كۇي كەشەتىندىگى انىق. باسىنان اسا سەكىرۋگە يرينانىڭ تاۋەكەلى جەتپەدى. سەرپە كوتەرۋدە ول 136 كەلى, مايا مانەزا 140 كەلى سۇرادى. ءارى قاراي بەلگىلى, مايا 145 كەلى كوتەرگەندە يرينا 142 كەلىنى ەكى كەزەگىندە دە كوتەرە الماي, سالى سۋعا كەتتى. قوسسايىس قورىتىندىسى بويىنشا مايا مانەزا ۇزدىك شىقتى.
سۆەتلانا پودوبەدوۆاعا دا وڭاي بولعان جوق. جۇلقي كوتەرۋدە 125 كەلى سۇراپ, كەۋدەگە قوندىرار تۇستا تاستاپ جىبەردى. بۇل پسيحولوگيالىق تۇرعىدان وتە قيىن. سپورتشىنىڭ تاۋى شاعىلىپ قالادى. ەكىنشى كەزەگىندە 125 كەلى كوتەرگەنىمەن, سۆەتا 130 كەلىنى باعىندىرا المادى. ەسەسىنە سەرپە كوتەرۋدە ءوزىن سۋداعى بالىقتاي ەركىن سەزىنەتىن قىزىمىز 165 كەلى كوتەرىپ, الەم رەكوردىن جاڭارتتى.
قىزدار اراسىنداعى ءتورتىنشى جولداما يەسى 120 كەلى تارتاتىن ماريا گرابوۆەتسكايا مەن سالماعى 72 كەلى اننا نۇرماحامەدوۆانىڭ سايىسىندا انىقتالدى. ماريا ءوزىن كورسەتە المادى, ءارى الەمدىك رەيتينگ بويىنشا دا اننادان كوش تومەن. ەندى نۇرماحامەدوۆاعا ءوزىن ءوزى قامشىلاۋعا ۋاقىت بارشىلىق.
ەرلەر اراسىندا ءوزىن ەركىن كورسەتكەن وڭتۇستىكقازاقستاندىق ارلي چونتەي بولدى. بويى الاسا, بىراق, قورعاسىنداي مىعىم ارلي التى كەزەگىندە ءمۇلت كەتكەن جوق. ال فارحاد حاركيگە پسيحولوگيالىق جاعىنان ءالى دە كومەك كەرەك سەكىلدى. كۇش بار, تەحنيكا بار, ءسال اسىعىڭقىراپ كەتەدى ەكەن. الەم چەمپيوناتىنىڭ قولا ءجۇلدەگەرى, شىعىسقازاقستاندىق ۆلاديمير كۋزنەتسوۆ بابىندا ەمەس.
96 كەلى سالماقتا قوس جولداما ساراپقا سالىناتىندىقتان, ءتورت جىگىت اقىرىنا دەيىن قارجىستى. يليا 180 كەلى كوتەرگەنىمەن, 187 كەلىنى باعىندىرا المادى. ءۇشىنشى كەزەگىندە 188 كەلىنى العانىمەن, اياعىنان نىق تۇرا الماعان. تورەشىلەر ەسەپتەگەن جوق.
الماس وتەشوۆ 180 كەلىنى ەكى كەزەك الا الماي, ۇشىنشىسىندە كوتەرىپ كەتتى. يليا مەن الماستىڭ قىزىلوردالىق جەرلەسى الەكساندر زايچيكوۆ 181 كەلىمەن توقتادى. الەم چەمپيونى, الماتى وبلىسىنىڭ ۇكىلى ءۇمىتى ۆلاديمير سەدوۆ جۇلقي كوتەرۋدە ايدى اسپانعا شىعاردى. 187 كەلى كوتەردى. يليادان 7 كەلى ارتىق. بىراق, بۇل ءجىگىتىڭىز دە جۇيكە جاعىنان ماقتانا المايدى ەكەن. سپورتشىلاردىڭ تىلىمەن ايتقاندا, “جانىپ كەتتى”. 217 كەلىگە تاپسىرىس بەرىپ, ءۇش كەزەگىندە دە باسى سالبىراپ كەتكەن سەدوۆ وليمپيادا جولداماسىنان وسىلايشا كۇدەر ءۇزدى. يليا 225 كەلىدەن كەيىن 230 كەلىنى ەركىن تولعاپ, جولدامانى جان قالتاسىنا باستى.
سەرپە كوتەرۋدە پولياك سيمون كولەتسكيدىڭ الەمدىك رەكوردى 232 كەلى. يليانىڭ كۇشى ەركىن جەتىپ تۇرعانىمەن, ارتىق تاۋەكەلگە بارمادى. ونىسى دا دۇرىس-اۋ.
ەندى سوڭعى جولداما الەكساندر زايچيكوۆ پەن الماس وتەشوۆتىڭ اراسىندا ساراپقا ءتۇستى. الەكساندر 220 كەلى كوتەرگەندە الماستىڭ قورجىنى بوس كەتكەن. ەكىنشى كەزەگىندە الدى. الەكساندر 224 كەلىنى ەكى تولعاعاندا الا الماي, بولدىرىپ توقتاعاندا الماس 225 كەلى كوتەرىپ كەتتى. ءبىزدىڭ بۇل باۋىرىمىزدا كۇش دەگەنىڭىز جەتەدى. از-كەم جەتپەي جاتقانى جانكەشتى جاتتىعۋ مەن تەمىردەي جۇيكە. ايتپەسە, 225 كەلىنى ەركىن ەڭسەرگەن بۇلا جىگىتتىڭ العاشقى كەزەگىندە 220 كەلىنى كوتەرە الماۋىن قالاي تۇسىندىرەسىڭ.
سونىمەن, چەمپيونات اياقتالدى. سپورت جانە دەنە تاربيەسى اگەنتتىگىنىڭ توراعاسى تالعات ەرمەگياەۆتى اڭگىمەگە تارتتىق. تالعات امانگەلدى ۇلى لوندوندا كەمى ءۇش التىن باستاعان ون ءۇش مەدال كۇتىپ وتىرعاندارىن ايتتى. اۋىر اتلەتتەردىڭ بابىندا ەكەندىگىنە كوڭىلى توعايعان.
باقتيار تايجان,
“ەگەمەن قازاقستان”.
تالدىقورعان.
