قازاق كۇرەسى: جۇلدەنىڭ ءبارى بىزدە
سەيسەنبى, 24 ءساۋىر 2012 6:47
برازيليانىڭ سان پاۋلو قالاسىندا قازاق كۇرەسىنەن جاستار اراسىنداعى الەم چەمپيوناتى اياقتالدى.
بۇل تۇڭعىش رەت اتلانت مۇحيتىنىڭ ار جاعىندا ءتول كۇرەسىمىزدەن وتكەن الەمدىك دودادا قازاقستان قۇراماسى 3 التىن, 2 كۇمىس, 9 قولا جۇلدەگە يە بولدى.
سەيسەنبى, 24 ءساۋىر 2012 6:47
برازيليانىڭ سان پاۋلو قالاسىندا قازاق كۇرەسىنەن جاستار اراسىنداعى الەم چەمپيوناتى اياقتالدى.
بۇل تۇڭعىش رەت اتلانت مۇحيتىنىڭ ار جاعىندا ءتول كۇرەسىمىزدەن وتكەن الەمدىك دودادا قازاقستان قۇراماسى 3 التىن, 2 كۇمىس, 9 قولا جۇلدەگە يە بولدى.
قازاق تاريحىندا ۇندىلەردىڭ اتامەكەنى سانالاتىن امەريكا قۇرلىعىندا ءتول كۇرەسىمىزدەن الەم چەمپيوناتىن وتكىزۋ ەشقاشاندا بولماعان وقيعا. ءبىزدىڭ قۋانىشىمىزعا وراي, بۇگىن ءبىزدىڭ ەلىمىز دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆ باستاعان ازاماتتاردىڭ ارقاسىندا تۇڭعىش رەت ءتول كۇرەسىمىزدەن الەم چەمپيوناتىن وتكىزۋ مۇمكىندىگىنە يە بولدى.
بۇل سىندا 60 كيلو سالماقتا تولەنباي قاسىمحان, 70 كيلودا بەكارىس عاينوللا مەن 90 كيلودان جوعارى سالماقتا ەلامان قويشىباەۆ الەم چەمپيونى اتاندى.
ال بەكبولات ابدىعازيەۆ (70 كگ.) پەن داۋلەت نيەتباي (60 كگ.) ەكىنشى ورىن السا, دانيار تەمىرحانوۆ (70 كگ.), رايىمبەك رانتاەۆ (60 كگ.) پەن جولداسبەك بەكتۇرسىنوۆ (90 كيلودان جوعارى) ءۇشىنشى ورىنعا تابان تىرەدى.
برازيليادا وتكەن الەم چەمپيوناتى كەزىندە 10 امەريكا ەلىندە ءتول كۇرەسىمىزدەن فەدەراتسيالار اشۋ جوسپارلانعانى بەلگىلى. بۇل جاڭالىقتى ءبىز دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆ باستاعان ازاماتتاردىڭ سان-پاۋلودان كەلگەن كەزدە حابارلاسىپ, وقىرمانعا جەتكىزەتىن بولامىز.
جالپى, بيىلعى جىلى قازاق كۇرەسىن دامىتۋعا كوپ جۇمىستاردىڭ ىستەلىنىپ جاتقانىن اتاپ وتۋگە بولادى. ماسەلەن, ءتول كۇرەسىمىز 4-5 ءساۋىر كۇندەرى شۆەيتساريانىڭ ۆەلەي قالاسىندا ءوتكەن حالىقارالىق كۇرەس تۇرلەرى قاۋىمداستىعىنىڭ وتىرىسىندا تۇڭعىش رەت 2013 جىلى ءدۇنيەجۇزىلىك ستۋدەنتتەر ويىندارىنىڭ باعدارلاماسىنا ەنسە, كەلەسى جىلى رەسەيدىڭ سانكت-پەتەربۋرگ قالاسىندا وتەتىن سپورت اككورد جارىستارىنىڭ باعدارلاماسىندا دا بولاتىنى جاريالاندى.
دۇنيەجۇزىلىك ستۋدەنتتەر ويىندارى 70, 80, 90 جانە 90 كيلودا جوعارى سالماق دارەجەسىندە تاتارستاننىڭ قازان قالاسىندا وتەدى. وعان قازاق كۇرەسىنەن ازيا, ەۋروپا, افريكا مەن امەريكا چەمپيوناتتارىندا 1-4 ورىن العان بالۋاندار مەن ءتول كۇرەسىمىزدەن وتەتىن الەم چەمپيوناتىندا 1-8 ورىندى يەلەنگەن سپورتشىلار جانە بونۋس رەتىندە تەگىن جولداما العان بەس ەلدىڭ وكىلدەرى قاتىسادى. سونداي-اق, قازاق كۇرەسىنەن جارىستار بيىل شىلدە ايىندا ليتۆانىڭ شياۋلياي قالاسىندا وتەتىن تافي ويىندارىنىڭ باعدارلاماسىنا ەنىپ وتىر.
داستان كەنجالين.
