اۋىر اتلەتتەر ازياعا بارادى
بەيسەنبى, 12 ءساۋىر 2012 7:09
24 ءساۋىر مەن 1 مامىر ارالىعىندا وڭتۇستىك كورەيانىڭ پحەنتحەك قالاسىندا اۋىر اتلەتيكادان ازيا چەمپيوناتى وتەدى.
بۇل سىنعا قازاقستان قۇراماسىنىڭ باپكەرلەرى جاس زىلتەمىرشىلەرگە ۇلكەن سەنىم ارتىپ وتىر. سەبەبى, نەگىزگى قۇرامداعى تولاعايلار مامىر ايىندا تالدىقورعاندا وتەتىن قازاقستان چەمپيوناتىنا دايىندالۋ ۇستىندە. ال ەل بىرىنشىلىگىنەن سوڭ, وليمپيا ويىندارىنا كىمنىڭ باراتىنى تۇبەگەيلى بەلگىلى بولماق, دەپ حابارلادى قازاقستان اۋىر اتلەتيكا فەدەراتسياسى.
بەيسەنبى, 12 ءساۋىر 2012 7:09
24 ءساۋىر مەن 1 مامىر ارالىعىندا وڭتۇستىك كورەيانىڭ پحەنتحەك قالاسىندا اۋىر اتلەتيكادان ازيا چەمپيوناتى وتەدى.
بۇل سىنعا قازاقستان قۇراماسىنىڭ باپكەرلەرى جاس زىلتەمىرشىلەرگە ۇلكەن سەنىم ارتىپ وتىر. سەبەبى, نەگىزگى قۇرامداعى تولاعايلار مامىر ايىندا تالدىقورعاندا وتەتىن قازاقستان چەمپيوناتىنا دايىندالۋ ۇستىندە. ال ەل بىرىنشىلىگىنەن سوڭ, وليمپيا ويىندارىنا كىمنىڭ باراتىنى تۇبەگەيلى بەلگىلى بولماق, دەپ حابارلادى قازاقستان اۋىر اتلەتيكا فەدەراتسياسى.
قازاقستان قۇراماسى لوندونداعى تورتجىلدىقتىڭ باستى دوداسىندا 8 سالماقتا سىنعا تۇسەتىنى بەلگىلى. ونىڭ ىشىندە ءتورت سالماقتا ايەلدەر, تاعى دا وسىنشاما سالماقتا ەرلەر جارىسقا شىعادى.
اۋىر اتلەتيكا فەدەراتسياسىنىڭ حابارلاۋىنشا, قازىرگى كەزدە قازاقستاننىڭ ۇلتتىق قۇراما كومانداسى وزدەرىنىڭ وقۋ-جاتتىعۋ جيىنىن وتكىزۋدە. ولار ەندى الماتىدا بىرەر كۇن ايالدايدى دا, ودان كەيىن تالدىقورعان جانە تەكەلى قالالارىنا قاراي تارتادى. نەگىزگى دايارلىقتارىن سول جاقتا پىسىقتايدى. ال مامىر ايىنىڭ سوڭىندا الماتى وبلىسىنىڭ ورتالىعىندا قازاقستان چەمپيوناتى وتەدى. سول جارىستىڭ قورىتىندىسى بويىنشا بيىلعى جىلدىڭ 27 شىلدەسى مەن 12 تامىزىندا ۇلىبريتانيا استاناسىندا الاۋى تۇتاناتىن وليمپيا ويىندارىندا ناقتى كىمدەردىڭ ونەر كورسەتەتىنى انىقتالادى. ەلىمىزدىڭ بەتكەۇستار زىلتەمىرشىلەرىنىڭ بارلىعى دا نەگىزگى كۇشىن سول جارىسقا ساقتاۋدا. سەبەبى, ءتورت جىلدا ءبىر مارتە عانا جالاۋى جەلبىرەيتىن ءدۇبىرلى دوداعا ساناۋلى سپورتشىلار عانا قاتىسادى. ال ءۇمىتكەرلەر قاتارى وتە قالىڭ. ءسوز ورايى كەلگەندە, قازاقستان قۇراماسى وليمپيا ويىندارىنىڭ سەگىز جولداماسىنا يەلىك ەتكەنىن ايتا كەتەيىك. لوندوندا ءبىزدىڭ ەرلەر مەن ايەلدەر ءتورت-ءتورت سالماق دارەجەلەرى بويىنشا ونەر كورسەتەدى.
– كوماندامىزدىڭ دەنى جاستار ەكەنى راس. الايدا, ءبىز وڭتۇستىك كورەياعا تەك جاي سەرۋەندەپ قايتۋ ءۇشىن بارا جاتقان جوقپىز. بۇگىنگى تاڭدا اۋىر اتلەتتەرگە مەملەكەت تاراپىنان كوپ كومەك كورسەتىلۋدە. دەنە شىنىقتىرۋ جانە سپورت ىستەرى اگەنتتىگى مەن باس دەمەۋشىمىز – «سامۇرىق-قازىنا» ۇلتتىق ءال-اۋقات قورىنىڭ دا قامقورلىعىن ۇنەمى سەزىنۋدەمىز. سوندىقتان دا اۋىر اتلەتتەرگە اركەز ۇلكەن جاۋاپكەرشىلىك جۇكتەلۋدە. سەنىم ۇدەسىنەن شىعۋ ءۇشىن شاكىرتتەرىمىز ەش ايانىپ قالمايدى. وسى ازيا چەمپيوناتىندا دا بارىنشا ءناتيجەلى ونەر كورسەتۋگە تىرىسامىز, – دەيدى قازاقستان قۇراماسىنىڭ مەملەكەتتىك جاتتىقتىرۋشىسى مەڭدىحان ءتاپسىر ۇلى.
ازيادا اۋىر اتلەتيكا دەڭگەيىنىڭ وتە جوعارى ەكەنىن جانكۇيەرلەر جاقسى بىلەدى. سوڭعى وليمپيادا مەن الەم چەمپيوناتتارىنىڭ ناتيجەلەرىنە زەر سالساق, سوعان انىق كوز جەتكىزەمىز. اتالمىش جارىستاردا ازيا اپايتوستەرى وزگە قۇرلىق وكىلدەرىنەن ۇنەمى وزىپ ءجۇر. ولاي بولسا, وڭتۇستىك كورەيا تورىندەگى جارىستا وتاندىق زىلتەمىرشىلەر جەرگە قاراتپايدى دەپ سەنەمىز.
ازيا چەمپيوناتىنا اتتاناتىن ەرلەردىڭ ءتىزىمى:
ەربولات جولامانوۆ (62 كگ)
ادىلبەك بالقاەۆ (69 كگ)
الەكساندر كيم (69 كگ)
مەدەت جۇندىباەۆ (77 كگ)
نۇرسۇلتان راحاتوۆ (77 كگ)
ەرمەك ءومىرتاي (85 كگ)
ەربول مەيىرمانوۆ (85 كگ)
يگور ۆاشانوۆ (94 كگ)
ستانيسلاۆ كوپىتوۆ (105 كگ)
دميتري كاپلين (+105 كگ)
ازيا چەمپيوناتىنا باراتىن قىزداردىڭ ءتىزىمى:
گالينا مامونتوۆا (48 كگ)
گۇلسارا تولەگەنوۆا (53 كگ)
ساۋلە سادۋاقاسوۆا (63 كگ)
فاينا سىبانباەۆا (63 كگ)
اناستاسيا شۆاباۋەر (69 كگ)
گۇلناز ناۋرىزوۆا (75 كگ)
الەكساندرا ابورنەۆا (+75 كگ)
ارعى جاقتان ءبىر جاڭالىق
اشىلۋ سالتاناتى كەش باستالادى. وليمپيادانىڭ اشىلۋ جانە جابىلۋ سالتاناتىن وتكىزۋ بريتانيالىق كينورەجيسسەر دەنني بويلعا سەنىپ تاپسىرىلعانى بەلگىلى. قازىر ول باسقاراتىن شىعارماشىلىق توپ جارىستىڭ رەسمي تۇردە اشىلۋ راسىمىنە دايىندىق جۇمىستارىن جۇرگىزىپ جاتىر.
جاقىندا دەنني بويل وليمپيادانىڭ 27 شىلدەدەگى اشىلۋ سالتاناتى باستاپقىدا كەلىسىلگەندەي 19:30-دا ەمەس, ءسال كەيىنىرەك, 20:55-تە باستالسا دەگەن ۇسىنىسىن ايتتى. ونىڭ ايتۋىنشا, حالىققا ءىڭىر قاراڭعىسىنداعى وتشاشۋلاردىڭ اسەرى ونشا بولمايدى. ال اشىلۋ سالتاناتى ءسال كەيىنىرەك باستالىپ, قاراڭعىلىق ورناعان كەزدەگى وتشاشۋلاردىڭ ءجونى ءبولەك, ولار ادامدى ەرەكشە ءبىر اسەرگە بولەپ, ايرىقشا مەرەكەلىك كوڭىل-كۇي سىيلايدى. ازىرشە وليمپيادانى ۇيىمداستىرۋ كوميتەتى رەجيسسەردىڭ بۇل ۇسىنىسىنا ناقتى جاۋاپ قايتارعان جوق. ەگەر ونىڭ ۇسىنىسى قابىلدانسا, وندا ۇيىمداستىرۋ كوميتەتىنە بيلەتتەن باستاپ, جارنامالاردىڭ بروشيۋرالارىن, قوعامدىق كولىكتىڭ جۇمىس كەستەسىن قايتا تۇزەۋگە تۋرا كەلەدى.
داستان كەنجالين.
