ۇستاز ەسىمى ۇمىتىلمايدى
جۇما, 19 قازان 2012 8:01
سانالى عۇمىرىن زاڭگەرلىكتىڭ قىر-سىرىن تەرەڭ زەرتتەۋگە ارناپ, قۇقىق سالاسىنىڭ, زاڭ عىلىمدارىنىڭ دامۋىنا وراسان زور ۇلەس قوسقان عالىم, اكادەميك سالىق زيمانوۆتىڭ پانيدەن باقيعا وزعانداردىڭ ۇلى كەرۋەنىمەن وزگە دۇنيە ەسىگىن اشقانىنا دا جىل تولىپتى. سالىق اعاسىز وتكەن ءبىر جىل سىناپتاي سىرعىپ وتە شىققانىمەن, وتاندىق زاڭ عىلىمىنىڭ نەگىزىن قالاۋشى, تاۋەلسىز قازاقستاننىڭ اياعىنان تىك تۇرۋىنا ولشەۋسىز ۇلەس قوسقان ۇستازدىڭ ورنى ورتايىپ-اق تۇر…
جۇما, 19 قازان 2012 8:01
سانالى عۇمىرىن زاڭگەرلىكتىڭ قىر-سىرىن تەرەڭ زەرتتەۋگە ارناپ, قۇقىق سالاسىنىڭ, زاڭ عىلىمدارىنىڭ دامۋىنا وراسان زور ۇلەس قوسقان عالىم, اكادەميك سالىق زيمانوۆتىڭ پانيدەن باقيعا وزعانداردىڭ ۇلى كەرۋەنىمەن وزگە دۇنيە ەسىگىن اشقانىنا دا جىل تولىپتى. سالىق اعاسىز وتكەن ءبىر جىل سىناپتاي سىرعىپ وتە شىققانىمەن, وتاندىق زاڭ عىلىمىنىڭ نەگىزىن قالاۋشى, تاۋەلسىز قازاقستاننىڭ اياعىنان تىك تۇرۋىنا ولشەۋسىز ۇلەس قوسقان ۇستازدىڭ ورنى ورتايىپ-اق تۇر…
سالىق زيمان ۇلى اتا زاڭنىڭ ءاربىر بابىن ايقىنداۋ ماقساتىندا ولشەۋسىز ەڭبەك ەتىپ, تاۋەلسىزدىكتىڭ العاشقى جىلدارىندا ەلىمىزدىڭ دەموكراتيالىق جولدى تاڭداۋىنا زور ىقپال ەتتى. قۇقىقتىق جۇيەنىڭ تەورياسى مەن تاريحىنىڭ, سونداي-اق كونستيتۋتسيالىق قۇقىقتىڭ بىلگىر مامانى رەتىندە تاۋەلسىز مەملەكەتىمىزدىڭ قۇقىقتىق نەگىزىن قالاۋعا جانە وتاندىق زاڭنامانى جەتiلدiرۋگە باعىتتالعان رەفورمالاردىڭ باستاۋىندا تۇردى.
وتاندىق زاڭ عىلىمىنىڭ اتاسى اتانعان مەملەكەت پەن قۇقىق زەرتتەۋشىسى, قوعامدىق-ساياسي وي تاريحىنىڭ شەجىرەشىسى, جوعارى ءبىلىم ءىسىنىڭ ۇيىمداستىرۋشىسى اكادەميك سالىق زيمان ۇلىنا كەزىندە اكادەميك قانىش ساتباەۆتىڭ «سالىق زيمانوۆ – قازاق-ستاندا زاڭ عىلىمدارىنىڭ نەگiزiن قالاۋشى», دەگەن جوعارى باعا بەرۋى قايتالانباس تۇلعانىڭ قاجىرلى ەڭبەگىن شىنايى باعالاۋى ەدى.
دۇنيە جالعان تۋرالى «الدىڭعى تولقىن اعالار, كەيىنگى تولقىن ىنىلەر, كەزەكپەنەن ولىنەر, باياعىداي كورىنەر» دەگەن فيلوسوفيالىق تولعامدى ايتقان ۇلى ابايدىڭ سۋديا رەتىندەگى بەينەسىن اشقان دا, وتكەن عاسىردىڭ ساياسي اقتاڭداقتاردان ارىلا قويماعان 60-شى جىلدارى, جالپى ۇلى دالانىڭ بيلەر سوتى تۋرالى العاش عىلىمي تۇرعىدان دالەلدەگەن دە سالىق زيمان ۇلى بولاتىن.
وسى تۇستا ۇلى تۇلعانىڭ ءبۇكىل ومىرىنە ولشەم بولاتىن مىنا ءبىر پاراللەل ونىڭ بار بولمىسىن اشا تۇسەتىندەي.
…الەمدى سوعىس ءورتى شارپىعان وتتى جىلداردا جاس وفيتسەر سالىق زيمان ۇلى كاۆكازدى, ۋكراينا مەن بەلارۋستى ازات ەتۋگە قاتىسىپ, مينومەتتى پولك كومانديرىنىڭ ورىنباسارى, مەحانيكالاندىرىلعان ارتيللەريالىق بريگادانىڭ كومانديرى قىزمەتتەرىن اتقارىپ جۇرگەندە جاۋ قورشاۋىندا قالادى. جاۋ قۇرساۋعا الىپ, ءولىم مەن ءومىر ايقاسقا ءتۇسكەن سىن ساتتە ول جاۋىنگەرلەرىن جاۋ قولىنا بەرمەي, ءوز ارتيللەريامىزعا وزىنە قاراي وق جاۋدىرۋىن سۇرايدى. بۇل تۋرالى وتاندىق باسىلىمدار كەيىن «ون ۆىزۆال وگون نا سەبيا» دەپ جازدى. سوعىس بىتكەننەن كەيىنگى بەيبىت ومىردە وزگە مۇددەنى كوزدەگەن كەيبىر ساياساتشىلار قازاقتىڭ جەكە مەملەكەتتىلىگىنە كۇمان كەلتىرە باستايدى. ءبىر اۋىز ءسوز ءۇشىن يىقتان باس كەتەتىن زاماندا سالىق زيمان ۇلى قازاقتىڭ ەجەلگى مەملەكەتتىگى تۋرالى ەگجەي-تەگجەيلى زەرتتەۋلەرىمەن عىلىمي تۇردە دالەلدەپ شىققان. ءسويتىپ, ول قازاق ەلىنىڭ دۇشپاندارىنىڭ ەلگە كوزدەگەن بۇكىر مىلتىعىنىڭ قاراۋىلىن وزىنە اۋدارىپ, ەل ابىرويىن, تاريح شىندىعىن قورعاپ قالدى.
ول بۇل اقيقاتتى قورعاپ قانا قويعان جوق, ونى عىلىمي ەڭبەگىنە نەگىز ەتىپ, زەرتتەۋلەرىن تاريح قويناۋىنا تەرەڭدەتە ءتۇستى. عالىمنىڭ تىكەلەي جەتەكشىلىگىمەن جيناقتالعان, بۇگىنگى كۇندە عىلىمي قۇندىلىعى ەرەكشە بولىپ سانالاتىن سالت-داستۇرلەر مەن ادەت-عۇرىپ نورمالارىن, حاندار زاڭناماسى مەن حالىق اراسىندا جوعارى بەدەلگە يە بولعان بي-قازىلاردىڭ سوت تورەلىكتەرىن, قازاقتىڭ ورتاعاسىرلىق «جارعى» قۇقىقتار جۇيەسىن زەرتتەگەن «قازاقتىڭ اتا زاڭدارى» اتتى جيناعى وسىنىڭ دالەلى.
ۇلاعاتتى ۇستازدىڭ زاڭگەرلىك سالاداعى تەرەڭ تەوريالىق ءبىلىمى مەن مول تاجىريبەسىن ۇيرەتۋدەن تالماعان, شاكىرتى رەتىندە مەنى عىلىمي ىزدەنىستەرگە جەتەلەگەن اعالىق قامقورلىعى قاشاندا جادىمدا. عۇلاما عالىمنىڭ الدىنان ءدارىس العان, ونىڭ كىشىپەيىلدىلىك پەن پاراساتتىلىققا تۇنعان ءومىر جولىن ونەگە تۇتقان ءىزباسارلارى مەن شاكىرتتەرى ۇستاز ەسىمىن ەشقاشان ۇمىتپايدى. ءويتكەنى, كورنەكتى قوعام قايراتكەرى, زاڭ عىلىمدارىنىڭ پاتريارحى سالىق اعا زيمانوۆتىڭ ەرەن ەڭبەگىن شىنايى ىقىلاسىمەن قۇرمەت تۇتاتىن حالقى بار.
قايرات ءمامي,
قازاقستان رەسپۋبليكاسى
پارلامەنتى سەناتىنىڭ
توراعاسى.
