تىنىستى تارىلتقان ءتۇتىن
سەنبى, 15 قىركۇيەك 2012 7:38
وسكەمەننىڭ اسا كۇردەلى ەكولوگياسى جايلى كوپتەن بەرى ايتىلىپ كەلەدى. راس, ءتۇستى مەتاللۋرگيانىڭ كاسىپورىندارى قورشاعان ورتانى قورعاۋدا ءبىرشاما جۇمىستار تىندىرىپ جاتىر. الايدا, «القانىڭ ەكىنشى جاعى بار» دەگەندەي, سوڭعى جىلدارى قاپتاپ كەتكەن اۆتوكولىكتەر دە ۋلى گازدار تاراتىپ, دەنساۋلىققا زيانىن تيگىزۋدە.
سەنبى, 15 قىركۇيەك 2012 7:38
وسكەمەننىڭ اسا كۇردەلى ەكولوگياسى جايلى كوپتەن بەرى ايتىلىپ كەلەدى. راس, ءتۇستى مەتاللۋرگيانىڭ كاسىپورىندارى قورشاعان ورتانى قورعاۋدا ءبىرشاما جۇمىستار تىندىرىپ جاتىر. الايدا, «القانىڭ ەكىنشى جاعى بار» دەگەندەي, سوڭعى جىلدارى قاپتاپ كەتكەن اۆتوكولىكتەر دە ۋلى گازدار تاراتىپ, دەنساۋلىققا زيانىن تيگىزۋدە.
جاقىندا وبلىس اكىمىنىڭ بىرىنشى ورىنباسارى سەرىك ءابدەنوۆتىڭ توراعالىق ەتۋىمەن قالالار مەن اۋدانداردىڭ اۋاسىن لاستاۋشى اۆتوكولىك يەلەرى مەن ونىڭ قوجايىندارىنىڭ قاتىسۋىمەن ۇيلەستىرۋ كەڭەسىنىڭ العاشقى وتىرىسى ءوتتى. جيىندا ەكولوگ ماماندار مەن وسى سالاعا جاۋاپتى باسشىلاردىڭ ەسەبى تىڭدالدى. اۆتوكولىكتەردىڭ ۋلى گازدارى كاسىپورىندار مۇرجالارىنان شىعاتىن تۇتىنگە قاراعاندا قاۋىپتى, تىنىس جولدارىن بىتەپ تاستايدى, دەيدى ەكولوگ مامان گەننادي كورەشكوۆ. كولىك ءتۇتىنى جەرگە جاقىن بولعاندىقتان ازوت ديوكسيدى اۋانى تەز بۇلدىرەدى. سوندىقتان كولىكتەردەن شىعاتىن ۋلى زاتتاردىڭ مولشەرىن ازايتۋ ءۇشىن جانار-جاعارماي ستانسالارىنداعى بەنزيننىڭ ساپاسىن انىقتاپ وتىرعان ورىندى.
وكىنىشكە وراي, قالاداعى اۆتوبۋس پاركتەرىنىڭ دەنى ساپاسى ناشار ارزان جانارمايدى تۇتىنۋعا اۋەس. ەندى ولارعا قارسى قاتاڭ شارا قولدانۋ قاجەت, دەدى ۇيلەستىرۋ كەڭەسىن جۇرگىزىپ وتىرعان سەرىك ابدەنوۆ. دەمەك, ساپاعا كوڭىل ءبولەتىن جانارماي ستانسالارى باسشىلارىمەن اۆتوبۋس پاركتەرى مەموراندۋم جاساسسا ءتيىمدى بولماق.
وبلىستىق جول پوليتسياسى باسقارما باستىعىنىڭ ورىنباسارى پەتر نيكيفوروۆ مىناداي پىكىر ايتتى. بۇگىنگى تاڭدا شىعىستا بەس ارنايى جابدىقتالعان بەكەتتە, سونىمەن بىرگە جىلجىمالى زەرتحانادا كولىكتەردەن شىعاتىن ۋلى گازدارعا تەكسەرۋ جۇرگىزىلەدى. جىل باسىنان بەرى جول پوليتسياسى قىزمەتكەرلەرى 247-باپ بويىنشا قورشاعان ورتاعا زيان كەلتىرگەندەرگە قارسى 867 حاتتاما تولتىرىپتى. الايدا, حاتتاما تولتىرعانمەن كولىكتەردىڭ تەحنيكالىق بايقاۋىن وتكىزگەن فيرمالاردىڭ جۇمىسىن دا انىقتاسا, ارتىق بولماس ەدى. قورىتا ايتقاندا, بۇدان بىلاي ۋلى گازدى كوپ شىعاراتىن كولىك يەلەرى مەن اۆتوبۋس پاركتەرى قوجايىندارى ەندى جانارماي ساپاسىنا نازار اۋدارىپ, قورشاعان ورتانى قورعاۋعا كوڭىل بولمەسە, ءتۇرلى ايىپپۇلدار مەن ەسكەرتۋلەردەن قاشىپ قۇتىلا المايدى.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى.
