تيمەڭدەر «ءبيشى قايىڭعا»!
جۇما, 8 ماۋسىم 2012 7:20
اقپاراتتار اعىنىنا قۇلاق تۇرسەك, بۋرابايداعى «ءبيشى قايىڭدى» بىرەۋلەر حالىقتىڭ قارسىلىعىنا قاراماستان قىرقىپ-وتاپ, ورنىنا ءۇي, مەكەن-جاي سالۋدى ويلاستىرىپ جاتقان كورىنەدى. بۇل حابار مەنى دە بەيجاي قالدىرمادى.
جۇما, 8 ماۋسىم 2012 7:20
اقپاراتتار اعىنىنا قۇلاق تۇرسەك, بۋرابايداعى «ءبيشى قايىڭدى» بىرەۋلەر حالىقتىڭ قارسىلىعىنا قاراماستان قىرقىپ-وتاپ, ورنىنا ءۇي, مەكەن-جاي سالۋدى ويلاستىرىپ جاتقان كورىنەدى. بۇل حابار مەنى دە بەيجاي قالدىرمادى.
اۆتور.
__________________________
تىڭداعىن استامسىعان الپاۋىتتار,
سەندەردىڭ سوزدەرىڭدە ءسال قاۋىپ بار…
تەگىندە «ءبيشى قايىڭ» امان تۇرسا,
كوگىندە كوكشەتاۋدىڭ ءان قالىقتار.
كەتكەندە سۇلۋلىقتىڭ كوزى ىرىڭدەپ,
باپتاۋدىڭ,
ايالاۋدىڭ ءوزى مىندەت.
اينالىپ بۇكىل دۇنيە
اققايىڭعا,
تۇرعانداي تابيعاتتىڭ ءوزى بيلەپ.
بيلەيدى ءبىر ورىندا,
جۇرمەيدى ولار.
جۇلساڭ دا جاپىراعىن گۇلدەيدى ولار.
اياماي
اق قايىڭدى قۇلاتقاندار.
اققۋدى
اتقانمەنەن بىردەي بولار.
كۇندە اتىپ,
اڭنىڭ ءوزىن,
قۇستىڭ ءوزىن,
سۋىماي بەتىڭدەگى سۇستى كەزىڭ.
قورقاۋداي دۇنيەنى قۇرتىپ بولىپ,
ەندى –
«ءبيشى قايىڭعا» ءتۇستى كوزىڭ!
ورماندا –
وڭاشادا سۇيىسكەندەر,
ءشارباتىن ماحابباتتىڭ ءجيى ىشكەندەر.
«ءبيشى قايىڭ» –
سۇيەدى ايالاۋدى,
«ءبيشى قايىڭ» –
كيەلى, تيىسپەڭدەر!
بۇل بۋراباي –
وتەمى اتا داڭقتىڭ,
ءبيشى قايىڭ –
مەكەنى ماحابباتتىڭ.
جوعالتىپ,
جەر بەتىنەن سۇلۋلىقتى.
وت جاعىپ ورتاسىنان
وتاماق كىم؟!
بۇل دالا –
بەرىلمەيدى ۋايىم-زارعا.
بىراق تا,
بيشىكەشتە تويىم بار ما؟!
اتاقتى
ابىلاي حان زامانىندا.
بيلەگەن,
ادام تۇگىل,
قايىڭدار دا!
بولسا دا,
ءوزى باتىر,
ءوزى مەرگەن.
ەشكىمنىڭ ەمەس ولار سوزىنە ەرگەن.
ەجەلگى ەل مەكەنى,
ەرتەگىدەي –
كەشەگى كەنەسارى كوزى كورگەن.
تاپتىڭ با,
جەمقورلىقتىڭ ءبىر تولەمىن.
ايتساڭشى,
قايدا بارىپ گۇل تەرەمىن…
باياعى قۇلاگەردى قۇلاتقانداي,
بالتاڭدى سۇلۋلىققا سىلتەگەنىڭ!
تىيىلىپ,
تىزگىنىڭدى تىم ىرىكپەي,
كوكتەمنىڭ
كۇيگە تولى كۇنى بىتپەي…
بالتاڭدى قولىڭا ۇستاپ,
قارايسىڭ سەن,
بەتىنە سۇلۋلىقتىڭ شىمىرىكپەي.
قورلاساڭ سۇلۋلىقتى اقىن عارىپ,
جۇرەگىڭ داۋالاماي,
جاقىن بارىپ…
تابيعات سىيعا تارتقان
سۇلۋلىقتى –
قياسىڭ قالاي عانا ءداتىڭ بارىپ!
سەرىك تۇرعىنبەك ۇلى.
