ءىس-شاراعا وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكروم پاراحاتوۆيچ نيازحودجاەۆ, قر پارلامەنتى ءماجىلىسىنىڭ دەپۋتاتى ساۋىتبەك ءابدىراحمانوۆ, ناۋايتانۋشى, بەلگىلى جازۋشى جانە اقىن, وزبەكستان جازۋشىلار وداعىنىڭ مۇشەسى, قوعام قايراتكەرى, فيلوسوفيا عىلىمىنىڭ دوكتورى, پروفەسسور مۇحامەدالي ءالي احمەدوۆ, الىشەر ناۋاي شىعارمالارىن قازاق تىلىنە اۋدارعان مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, بەلگىلى اقىن جانە جازۋشى نەسىپبەك ايت ۇلى, «شىعىس جۇلدىزى – ناۋاي» مانەرلەپ وقۋ بايقاۋىنىڭ قاتىسۋشىلارى جانە باسقالار قاتىستى.
قحا توراعاسىنىڭ ورىنباسارى – قازاقستان رەسپۋبليكاسى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى جانسەيىت تۇيمەباەۆ ءوز سوزىندە شىعىستان شىققان بىرەگەي تۇلعالاردى ايتقاندا حافيز, فيردوۋسي, رۋداكي, نيزامي, ومار حايام, ساعدي, جالالاددين رۋمي, ناسير حۋسراۋ, جاميمەن قاتار ناۋايدىڭ ەسىمى دە ماقتانىشپەن ەسكە الىناتىنىنا توقتالدى. سونداي-اق, حاكىم اباي بىرەگەي تۇلعانىڭ شىعارماشىلىق زەرتحاناسىنا تەرەڭ ۇڭىلسە, مۇحتار اۋەزوۆ, ەسماعامبەت ىسمايىلوۆ, راحمانقۇل بەردىباەۆ سياقتى ۇلكەن عالىمدار مول مۇراسىنىڭ كەڭ تانىلۋىنا ەلەۋلى ۇلەس قوسقانىن اتاپ ءوتتى. اقىن نەسىپبەك ايت ۇلى الىشەر ناۋايدىڭ عازالدارىن قازاق تىلىنە ءتارجىمالاپ, جەكە جيناق شىعارعانىن, قازۇۋ شىعىستانۋ فاكۋلتەتىندە قىزمەت ەتكەن جىلدارى پروفەسسور وتەگەن كۇمىسباەۆ ناۋاي عازالدارى مەن اباي شىعارماشىلىعىنىڭ ساباقتاستىعىن زەرتتەپ, بىرنەشە عىلىمي ەڭبەكتەر جازعانىن ەسكە سالدى. ال الماتىداعى ەڭ اسەم كوشەلەردىڭ بىرىنە ءناۋايدىڭ ەسىمى بەرىلۋى كورشىلەس جاتقان ەكى ەل قارىم-قاتىناسىن جاقىنداتاتىن جايلاردىڭ كوپتىگىن كورسەتەتىنىن جەتكىزدى.
– قازاقستان مەن وزبەكستاندى باعزى زامانداردان بەرگى دوستىق قاتىناستار بايلانىستىرادى. ءبىز – تاريحىمىز ورتاق, ءتىلىمىز تۋىس, تاتۋ كورشىلىك سالتىن ۇستانعان باۋىرلاس ەلدەرمىز. وسى ەرەكشەلىكتەرىمىزدى نەگىزگە الا وتىرىپ, ەكى مەملەكەت باسشىلارى 2018 جىلى قازاقستانداعى وزبەكستان جىلىن جانە 2019 جىلى وزبەكستانداعى قازاقستان جىلىن وتكىزۋ تۋرالى شەشىم قابىلداعان بولاتىن.
وتكەن جىلى – وزبەكستاننىڭ قازاقستانداعى جىلى اياسىندا قازاقستان حالقى اسسامبلەياسى تاراپىنان 200-دەن استام ءىس-شارا وتكىزىلگەنىن اتاپ ايتقىم كەلەدى. ولاردىڭ ەكى حالىقتى بۇرىنعىدان بەتەر جاقىنداتا تۇسكەنى, ەكى ەل اراسىنداعى مادەني-گۋمانيتارلىق قاتىناستاردى دامىتۋدىڭ ماڭىزدى فاكتورىنا اينالعانى اقيقات, – دەدى جانسەيىت قانسەيىت ۇلى.
الىشەر ناۋاي XIV عاسىردىڭ ورتاسى مەن XV عاسىردىڭ باسىندا ءومىر سۇرگەن تۇركى حالىقتارىنا ورتاق ۇلى اقىن, ويشىل, مەملەكەتتىك قايراتكەر. ونىڭ شىعارمالارى 15 عاسىردىڭ وزىندە ماۋەرەنناھر مەن حوراساندا عانا ەمەس, يران, ءازىربايجان, شىعىس تۇركىستان, ءۇندىستان, مىسىر, تۇركى ەلدەرىنە, كەيىننەن ەۋروپا مەن امەريكا كىتاپحانالارىنا تارادى.
كەش بارىسىندا الىشەر ءناۋايدىڭ ءومىرى تۋرالى بەينەروليك كورسەتىلىپ, قوناقتار «انالار اماناتى» قولونەر شەبەرلەرى ورتالىعىنىڭ كورمەسىن تاماشالادى. سونداي-اق, دوستىق ءۇيىنىڭ اكت زالىندا شىعارماشىلىق ۇجىمداردىڭ كونتسەرتتىك باعدارلاماسى ۇيىمداستىرىلدى.
