«قازاۆتوجول» ۇك» اق باسشىسى ۇلان ءالىپوۆ اياكوز قالاسىندا (شقو) «وسكەمەن – زىريان – ۇلكەن نارىن – كاتون قاراعاي – راحمان قاينارلارى», «تالدىقورعان-قالباتاۋ-وسكەمەن» اۆتوجولدارىنىڭ 287-1073 شاقىرىمىنداعى وسينوۆ اسۋى مەن «قالباتاۋ-مايقاپشاعاي» اۆتوجول ۋچاسكەلەرى بويىنشا كوشپەلى كەڭەس وتكىزدى.
ءبىرىنشى قارالعان نىسان «وسكەمەن – زىريان – ۇلكەن نارىن – كاتون قاراعاي – راحمان قاينارلارى» اۆتوجولدارىنداعى وسينوۆ اسۋى بولدى. مۇنداعى جول-قۇرىلىس ماۋسىمىنا دايىندىق جۇمىستارى بيىل ءساۋىر ايىندا باستالدى. قازىر جول بەلگىلەرى مەن قورشاۋلاردى بۇزۋ, بۇتالاردى كەسۋ جانە جيناۋ, اينالما جولدى, اسفالتبەتوندى جابىندى فرەزەرلەۋ, سۋ وتكىزۋ قۇبىرلارىن ورناتۋ جۇمىستارى جۇرگىزىلۋدە.
بۇدان كەيىن قازاۆتوجول باسشىسى «تالدىقورعان-قالباتاۋ-وسكەمەن» جولدارىن قايتا جاڭعىرتۋ جۇمىستارىنىڭ بارىسىن تەكسەردى. جوبانى قايتا جاڭعىرتۋ اياسىندا 615 شاقىرىمنەن 1073 شاقىرىمعا دەيىنگى قۇرىلىس جۇمىستارى شىعىس قازاقستان وبلىسىنا (ۇزاقتىعى 458 كم) تيەسىلى. مەردىگەر كومپانيالار «ك-دورستروي» اق مەن «TodiniCentralAsia» جشس. جوبادا ەكى جولاقتى جانە II ساناتتاعى اۆتوموبيل جولىنىڭ قۇرىلىسى قاراستىرىلعان.
بيىل شىعىس قازاقستان وبلىسىندا تاسكەسكەن اۋىلىنان جارما اۋىلىنا دەيىن قۇرىلىس جۇمىستارى جۇرگىزىلۋدە. قۇرىلىس ماۋسىمى اياقتالعاننان كەيىن جولشىلار 140-تان استام سۋ وتكىزۋ قۇبىرىن, 160 شاقىرىم اينالما جولدى, جول وتپەلەرىن, جول جيەكتەرىن نىعايتۋدى جوسپارلاپ وتىر. جۇمىسقا 800-گە جۋىق جۇمىسشى مەن 500-دەن استام تەحنيكا جۇمىلدىرىلعان.
قارالعان ەكىنشى نىسان 906-1321 شاقىرىم ارالىعىن قامتيتىن «قالباتاۋ-مايقاپشاعاي» جولىن قايتا جاڭعىرتۋ ۋچاسكەسى بولدى. بۇل ۋچاسكەنىڭ مەردىگەرلەرى سينسين/ كازگەرستروي, كونسورتسيۋم كوشباسشىسى – سينسين قۇرىلىس كونسورتسيۋمى. ۋچاسكەنىڭ جالپى ۇزاقتىعى 415 شاقىرىم. بيىل قالباتاۋ قالاسىنىڭ اينالما جولىن قوسقاندا ۇزاقتىعى 37 شاقىرىم بولاتىن جاڭا جول قوزعالىسىن اشۋ جوسپارلانۋدا.
جاڭا جول ءجۇرۋ ۋاقىتىن ەكى ەسە قىسقارتۋعا جانە وتكىزۋ قابىلەتىن ارتتىرۋعا, سونداي-اق جول-كولىك وقيعالارىن ازايتۋعا سەپ بولادى.
جالپى, «تالدىقورعان-قالباتاۋ-وسكەمەن» اۆتوموبيل قاتىناسى بويىنشا 2019 جىلى 268 شاقىرىم جول قوزعالىسى اشىلادى. مۇنداعى بارلىق جۇمىس كولەمى 2022 جىلى تولىق اياقتالادى, دەپ جوسپارلانىپ وتىر.
