قازاقستان رەسپۋبليكاسىنىڭ سىرتقى ىستەر ءمينيسترى بەيبىت اتامقۇلوۆ وڭتۇستىك كورەيانىڭ پرەزيدەنتى مۋن چجە ءيننىڭ قازاقستانعا جاسايتىن الداعى مەملەكەتتىك ساپارىنا بايلانىستى كورەيا رەسپۋبليكاسىنىڭ قازاقستانداعى ەلشىسى كيم دە سيكتى قابىلدادى.
كەزدەسۋ بارىسىندا مينيستر كورەيا رەسپۋبليكاسى پرەزيدەنتىنىڭ قازاقستانعا مەملەكەتتىك ساپارى ەلدەرىمىزدىڭ اراسىنداعى ستراتەگيالىق سەرىكتەستىكتىڭ ورناۋىنىڭ 10 جىلدىعى قارساڭىنداعى ەكىجاقتى قارىم-قاتىناستاردىڭ ماڭىزدى وقيعاسى بولاتىندىعىن اتاپ ءوتتى.
سونىمەن قاتار, تاراپتار بىرقاتار ماڭىزدى ءىس-شارالاردى, ونىڭ ىشىندە قر تۇڭعىش پرەزيدەنتى - ەلباسى نۇرسۇلتان نازارباەۆ, قازاقستان پرەزيدەنتى قاسىم-جومارت توقاەۆ جانە قر پرەمەر-ءمينيسترى اسقار مامينمەن كەزدەسۋلەردى كوزدەيتىن ساپار باعدارلاماسىنىڭ اۋقىمدىعىن اتاپ ءوتتى.
قازاقستان-كورەيا بيزنەس-فورۋمىن ۇيىمداستىرۋىنا ەرەكشە نازار اۋدارىلىپ, ونىڭ شەڭبەرىندە بىرقاتار ەكى جاقتى كوممەرتسيالىق قۇجاتتارعا قول قويۋ, سونداي-اق ونەركاسىپ, اۋىلشارۋاشىلىق, ينفراقۇرىلىم, مەديتسينا جانە تسيفرلاندىرۋ سالاسىنداعى بىرلەسكەن ينۆەستيتسيالىق جوبالار مەن باستامالاردىڭ كورمەسىن ۇيىمداستىرۋ جوسپارلانىپ وتىر.
سونىمەن قاتار, ەكىجاقتى قارىم-قاتىناستاردىڭ وزەكتى ماسەلەلەرى مەن كورەي تۇبەگىندەگى جاعداي بويىنشا پىكىر الماستى.
قازاقستان مەن كورەيا اراسىنداعى ءداستۇرلى دوستىق قارىم-قاتىناستاردى ودان ءارى نىعايتۋدىڭ ءارتۇرلى اسپەكتىلەرىنە, ونىڭ ىشىندە ءوزارا ءتيىمدى ساۋدا-ەكونوميكالىق جانە مادەني-گۋمانيتارلىق بايلانىستاردى دامىتۋ ماسەلەلەرىنە توقتاپ ءوتتى.
تاراپتار قازاقستان مەن وڭتۇستىك كورەيا اراسىنداعى ەكى جاقتى ساۋدا كولەمىنىڭ وسۋىنە ەرەكشە كوڭىل ءبولدى, اتاپ ايتقاندا تاۋار اينالىمى 2018 جىلى 3,9 ملرد. اقش دوللارىن قۇرادى, ونىڭ ىشىندە قازاقستاننان ەكسپورت 2,9 ملرد. دوللارعا, ال وڭتۇستىك كورەيادان يمپورت 922 ملن. دوللارعا جەتتى.
2005 جىلدان 2018 جىلعا دەيىنگى كەزەڭدە وڭتۇستىك كورەيادان قازاقستان ەكونوميكاسىنا تىكەلەي شەتەلدىك ينۆەستيتسيالاردىڭ جالپى اعىنى 5 ملرد. اقش دوللارىن قۇرادى. بۇگىنگى كۇنى قازاقستاندا وڭتۇستىك كورەيا كاپيتالى بار 500-گە جۋىق كومپانيا جۇمىس ىستەيدى. سوڭعى جىلدارى Hyundai, LG, Samsung, Lotte Confectionery, SK, Dongil Highvill سياقتى كومپانيالار قازاقستاندا تابىستى جۇمىس اتقارۋدا.
