بۇگىن قالا اكىمى استانانىڭ كەزەكتى جالپىقالالىق سەنبىلىككە دايىندىعىن تەكسەرۋ ءۇشىن شاھاردى ارالاپ شىقتى. باقىت سۇلتانوۆقا كوشەلەرگە جانە اۋلالارعا وتىرعىزۋعا ارنالعان كوشەتتەر دايىندالعان الاڭداردى كورسەتتى.
قالادا وسىنداي 300-گە جۋىق ۋچاسكە ۇيىمداستىرىلماق. مۇندا ەمەن, تەرەك, قاراعاي, شىرشا, قايىڭ, ۇيەڭكى, جوكە جانە باسقا دا اعاش تۇرلەرىنىڭ كوشەتتەرى وتىرعىزىلادى دەپ جوسپارلانۋدا.
ەكولوگيالىق ەكى ايلىق كەزىندە قالادا 13 مىڭعا جۋىق اعاش وتىرعىزىلادى, ونىڭ 3 مىڭى 20, 21 ساۋىردە ەگىلمەك. اكتسياعا 100 مىڭنان استام قالا تۇرعىنى قاتىسادى دەپ كۇتىلۋدە.
«سەنبىلىك وتەتىن ورىندار تۇرعىنداردىڭ قالاۋى بويىنشا انىقتالدى. بيىل سەنبىلىككە اتسالىسىپ, اعاش وتىرعىزۋعا نيەتتى ەلوردالىقتاردىڭ قاتارى ارتقان. ادامدار, كاسىپورىندار, شاعىن بيزنەس وكىلدەرى حابارلاسىپ, اتالمىش باستاماعا قولداۋ ءبىلدىرىپ جاتىر», – دەدى نۇر-سۇلتان قالاسى اكىمىنىڭ ورىنباسارى ارمان تۇرلىبەك.
ءوز كەزەگىندە باقىت سۇلتانوۆ اۋدان اكىمدىكتەرىنىڭ قالالىقتاردىڭ تىلەكتەرىنە دەر كەزىندە جاۋاپ بەرۋىن تاپسىردى.
«تۇرعىندار اعاشتاردى وزدەرى وتىرعىزىپ, ولاردى كۇتىپ-باپتاسا, ول اعاشتار مەن كوشەتتەر وتە جاقسى وسەدى. ءبىزدىڭ تۇرعىندار بەلسەندىلىك تانىتىپ, ولارعا قولداۋ كورسەتۋ كەرەك», – دەپ اتاپ ءوتتى سۇلتانوۆ.
بۇل رەتتە اكىم سەنبىلىك – ەرىكتى اكتسيا بولعاندىقتان, وعان ەشكىمدى قاتىسۋعا ماجبۇرلەۋدىڭ قاجەتى جوق ەكەندىگىن ەسكە سالدى.
«ءبىز تازا ەلوردا ءۇشىن» جالپىقالالىق سەنبىلىك 20 ساۋىردە وتەدى. ەكولوگيالىق اكتسيا بارىسىندا اعاش وتىرعىزۋ, كوگالداردى تازالاۋ, اعاشتاردى اكتەۋ, بەلگىلەنبەگەن جەرلەردە قالىپتاسقان قوقىس ورىندارىن جانە لاستانعان ۋچاسكەلەردى جويۋ شارالارى جۇزەگە اسىرىلادى.
جالپى قالالىق سەنبىلىكتى وتكىزۋ كەزىندە قالانىڭ بارلىق اۋداندارىندا اعاش وتىرعىزۋ جوسپارلانعان: ا
لماتى اۋدانىندا: وباعان كوشەسىندە, پرەزيدەنتتىك ساياباقتا (ش. قالداياقوۆ-ي.پانفيلوۆ كوشەلەرىنىڭ قيىلىسى);
بايقوڭىر اۋدانىندا: 69 كوشە;
ەسىل اۋدانىندا: ءا.بوكەيحان كوشەسى بويىنشا كەرەي-جانىبەك حاندارى كوشەسىنەن باستاپ مز كوپىرىنە دەيىنگى ۋچاسكەدە (ارىس), ستەللا ۋچاسكەسىندە, ۇلى دالا داڭعىلى بويىندا اقمەشىت جانە تۇركىستان كوشەلەرى اراسىنداعى «تاۋەلسىزدىكتىڭ 25 جىلدىعى» اۋماعىندا;
سارىارقا اۋدانىندا: ۆ.گەتە, ى.التىنسارين, ءى.ەسەنبەرلين كوشەلەرىندە جانە كوكتال-2 تۇرعىن الابىندا.
