كورمەدە جاس اۆتورلاردىڭ قاتىسۋىمەن «اشىق اڭگىمە» اقىندىق مارافون, كىتاپتىق اڭگىمەلەسۋ (book talks), ادەبيەت كلۋبىنىڭ وتىرىسى, «كىتاپتى قالاي ءتيىمدى وقۋ كەرەك؟» تاقىرىبىنا ارنالعان شەبەرلىك سىنىپتارى, تانىمال اقىن-جازۋشىلارمەن اۆتوگراف-سەسسيا ۇيىمداستىرىلادى. ولاردىڭ ىشىندە بالالار كىتابى بۇكىلرەسەيلىك فەستيۆالىنىڭ ديرەكتورى جانە جازۋشى يۋري نەچيپورەنكو, «كيت پلىۆيوت نا سەۆەر», «سوۆينىي ۆولك» كىتاپتارىنىڭ اۆتورى اناستاسيا ستروكينا بار. سونداي-اق, تانىمال بالالار جازۋشىسى اننا گونچاروۆامەن ينتەراكتيۆتى جانە شىعارماشىلىق كەزدەسۋ بولادى.
«قويشىعارا سالعارا ۇلىنىڭ «ۇيقاسقا تۇسكەن ويلار», ورحان پامۋكتىڭ «سەزىم مۋزەيى», «مەنىڭ اتىم قىرمىزى» جانە اكىم ءتارازيدىڭ 80 جىلدىعىنا وراي «تۇلپاردىڭ ءىزى: ستسەناريدەن فيلمگە دەيىن» كينوتانۋشى نازيرا راحمانوۆانانىڭ كىتاپتارى, تۇرىك جازۋشىسى جانە دراماتۋرگ ريشاتا گۋنتەكينانىڭ «ۇزىلگەن جاپىراقتار» اتتى كىتابىنىڭ تۇساۋكەسەرى وتەدى», - دەدى قازاقستان رەسپۋبليكاسىنىڭ ۇلتتىق اكادەميالىق كىتاپحاناسىنىڭ ديرەكتورى ءۇمىتحان مۇڭالباەۆا.
بۇل شارانىڭ اياسىندا تانىمال مادەنيەت قايراتكەرلەرى, جازۋشىلار جانە اقىندارمەن كەزدەسۋلەر دە ۇيىمداستىرىلادى. ولاردىڭ اراسىندا جاس اقىن مەرگەن توقسانباي مەن مەملەكەتتىك پرەميا يەسى, قازاقستان رەسپۋبليكاسىنىڭ جازۋشىلار وداعىنىڭ توراعاسى, اقىن ۇلىقبەك ەسداۋلەت, سونداي-اق تاريح عىلىمدارىنىڭ دوكتورى, پروفەسسور, قازاقستان رەسپۋبليكاسىنىڭ ۇلتتىق عىلىم اكادەمياسىنىڭ اكادەميگى, ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ تا بار.
سونىمەن قاتار, جاس قوناقتارعا قىزىقتى ويىن-ساۋىقتىق باعدارلاما دا ازىرلەنگەن. اتاپ ايتقاندا, بالالاردىڭ شىعارماشىلىق دامۋىنا سەپ بولاتىن "ميميوريا" شەبەرلىك ساعاتى, رادۋگا مەن يسكوركا اتتى مۋلتفيلم كەيىپكەرلەرى جانە ليۋيس كەروللدىڭ "اليسا عاجايىپتار الەمىندە" كىتابىنىڭ جەلىسىنە نەگىزدەلگەن ينتەراكتيۆتى كۆەست ويىندارى مەن بالالالار جازۋشىلارىمەن كەزدەسۋ, ۆوكالدىق سايىستار جانە كونتسەرتتىك باعدارلامالار.
كورمە بارىسىندا «ۇزدىك وقۋلىق», «ۇزدىك ولكەتانۋ باسىلىمى», «بالالارعا ارنالعان كىتاپ», «مادەنيەت پەن ونەر», «عىلىم مەن يننوۆاتسيالار», «گران-پري» 6 نوميناتسيا بويىنشا ۇزدىك كىتاپتار انىقتالادى.
