ءتورتىنشى رەت وتكەلى وتىرعان «Eurasian Book Fair-2019» ەۋرازيالىق حالىقارالىق كىتاپ جارمەڭكەسىنە قاتىسۋشىلار سانى جىل سايىن ارتىپ كەلەدى. بيىل قازاقستان, رەسەي, پولشا, ازەربايجان, تۇركيا, لاتۆيا, قىتاي, بەلگيا, ۋكراينا, يران, وزبەكستان ەلدەرىنىڭ كىتاپ باسپالارى قاتىسادى.
«بۇل كىتاپ جارمەڭكەسى– 13 مەملەكەتتىڭ باسپالارى مەن كىتاپ نارىعىنىڭ وكىلدەرىنىڭ باسىن قوسىپ, قازاقستاندىق وقىرماندارمەن جۇزدەستىرگەن ۇلى جيىن. جىل سايىن بۇل شارانىڭ مازمۇنى مەن اۋقىمى ءوسىپ, حالىقتىڭ قىزىعۋشىلىعى ارتىپ جاتقانى قۋانتادى, - دەدى «فوليانت» باسپاسىنىڭ ديرەكتورى يسابەكوۆ نۇرلان.
كورمە اياسىندا كەشەندى مادەني-ىسكەرلىك باعدارلاما جۇزەگە اسادى. اتاپ ايتساق, ءتۇرلى تانىستىرىلىمدار, دوڭگەلەك ۇستەلدەر, فورۋمدار, ءتۇرلى بايقاۋلار, سونداي-اق, تانىمال مادەنيەت قايراتكەرلەرى: اقىن-جازۋشىلارمەن كەزدەسۋلەر ۇيىمداستىرىلادى. قازاقستاندىق جانە شەتەلدىك قوناقتاردىڭ قاتىسۋىمەن مادەني-ىسكەرلىك شارالار وتەدى. ەتنو-مادەني بىرلەستىكتەر ونەر كورسەتەدى.
«كىتاپ باسپالارى مەن وقىرمانداردىڭ وسىلاي بەتپە-بەت, جۇزبە-ءجۇز كەزدەسۋلەرىنىڭ ماڭىزى زور, پايداسى مول. ۇلتتىق ءارى الەمدىك ادەبيەتكە بەت تۇزەۋ, رۋحاني ازىق الۋ, كىتاپ وقۋ مادەنيەتىن ناسيحاتتاۋ, جاڭا يدەيا يەلەرىمەن تىلدەسۋ, كىتاپ اۆتورلارىمەن جۇزدەسۋ- وسى فورۋمنىڭ باستى ماقساتى. مۇنداي جيىنعا جاس وقىرمانداردىڭ, اسىرەسە وقۋشىلاردىڭ قاتىسقانى ماڭىزدى. ويتكەنى بۇل - ەلىمىزدىڭ نەگىزگى كاپيتالى سانالاتىن جاستاردىڭ بىلىمىنە, رۋحاني دامۋىنا قۇيىلعان ينۆەستيتسيا. سەبەبى بۇگىنگى قوعامدا بالالاردى كىتاپقا قۇمارتۋ, قىزىقشىلىعىن وياتۋ-وزەكتى ماسەلە», - دەپ اتاپ ءوتتى «فوليانت» باسپاسىنىڭ ديرەكتورى ورتالىق كوممۋنيكاتسيالار قىزمەتىندە.
سونىمەن قاتار, «Eurasian Book Fair – 2019» كىتاپ كورمەسى اياسىندا باسپالار اراسىندا «ۇزدىك ولكەتانۋ سالاسىنداعى باسىلىم», «بالالار مەن جاسوسىپىرىمدەر باسىلىمى», «مادەنيت جانە ونەر», «عىلىم جانە يننوۆاتسيا», «باس جۇلدە», وسىنداي 6 اتالىم بويىنشا بايقاۋ ۇزدىكتەرى جاريالانادى. جەڭىمپازدار مەن نومينانتتار ارنايى ديپلومدارمەن ماراپاتتالادى.
ايتا كەتسەك, ءتورتىنشى «Eurasian Book Fair - 2019» ەۋرازيالىق حالىقارالىق كىتاپ كورمە-جارمەڭكەسى 2019 جىلى 24-27 ءساۋىر ارالىعىندا نۇر-سۇلتان قالاسىندا «كورمە» ورتالىعىندا وتەدى.
