قازاقستان رەسپۋبليكاسى پارلامەنتى سەناتىنىڭ توراعاسى داريعا نازارباەۆا باستاعان قازاقستاندىق پارلامەنتشىلەر سانكت-پەتەربۋرگتەگى تمد پارلامەنتارالىق اسسامبلەياسىنىڭ شارالارىنا قاتىسۋدا.
حالىقارالىق تەرروريزمگە قارسى ءىس-قيمىل جونىندەگى كونفەرەنتسيادا ءسوز العان سەنات باسشىسى حالىقارالىق تەرروريزم قازىرگى زامانداعى ەڭ وتكىر ماسەلەلەردىڭ ءبىرى ەكەنىن اتاپ ءوتتى.
«تەرروريزم جويقىن اپاتقا ۇشىراتادى, ەكونوميكالىق جانە الەۋمەتتىك ءومىردىڭ قۇلدىراۋىنا الىپ كەلەدى. بۇل اپاتقا بالالار مەن ايەلدەر جانە قارتتار الدىمەن دۋشار بولادى. ادامدار كەدەيلىك پەن سوعىستان قاشۋعا ءماجبۇر بولادى – جاھاندىق قاۋىپسىزدىككە تونەتىن قاتەر نازاردان تىس قالاتىن كوشى-قون تۋعىزادى. بۇل ءوز كەزەگىندە, بۇعان دەيىن تۇراقتى ءارى قورعالعان بولىپ كورىنەتىن دامىعان ەلدەردە جاڭا پروبلەمالار تۋعىزادى», - دەدى د.نازارباەۆا.
سەنات باسشىسى لاڭكەستىككە قارسى كۇرەس – بۇل جەكەلەگەن مەملەكەتتەردىڭ نەمەسە ولاردىڭ توپتارىنىڭ ەمەس, بۇكىل الەم قوعامداستىعىنىڭ ءىسى ەكەنىنە نازار اۋداردى. ءتۇرلى قاراما-قايشىلىقتارعا قاراماستان الەمدىك جانە وڭىرلىك الىپ مەملەكەتتەر تاياۋ شىعىستا يگيل-گە قارسى كۇرەستە ءىس-قيمىلدى ۇيلەستىرۋدى قولعا الدى. دەگەنمەن, تەرروريزم وشاعى تولىقتاي جويىلعان جوق.
سەنات توراعاسى قازاقستان تەرروريزمگە قارسى ءىس-قيمىلدا بىرىككەن ۇلتتار ۇيىمىنىڭ ورتالىق ۇيلەستىرۋشى رولىنە قولداۋ بىلدىرەدى. 2017-2018 جىلداردا بۇۇ قاۋىپسىزدىك كەڭەسىنە مۇشە بولعان كەزدەگى ءبىزدىڭ ەلىمىزدىڭ جەتى باسىمدىعىنىڭ ءبىرى وسى ماسەلە بولعان ەدى. بۇۇ اياسىنداعى مەملەكەتتەردىڭ جاھاندىق تەررورعا قارسى كواليتسياسىن قۇرۋ جونىندەگى نۇرسۇلتان نازارباەۆتىڭ باستاماسى الەمدىك قاۋىمداستىعىنىڭ كەڭ قولداۋىنا يە بولدى.
جوعارعى پالاتانىڭ باسشىسى 2018 جىلدىڭ قىركۇيەك ايىندا بۇۇ باس اسسامبلەياسىنىڭ سەسسياسى اياسىندا لاڭكەستىكتەن ازات الەمگە قول جەتكىزۋ جونىندەگى داعدى كودەكسىنە قول قويىلعانىن حاباردار ەتتى. بۇل قۇجاتقا 70-تەن استام مەملەكەت قوسىلدى.
«ءبىز الەم قوعامداستىعى تەرروريزم مەن ءدىني ەكسترەميزمدى جوياتىن جاڭا تاسىلدەر مەن شەشىمدەر ازىرلەۋدى قاجەت ەتەتىنىنە سەنىمدىمىز. بەيبىتشىلىك پەن قاۋىپسىزدىك جولىنداعى كۇرەستە بىرلىككە قول جەتكىزۋدىڭ بالاماسىز جولى رەتىندە اۋقىمدى ۇنقاتىسۋ قاعيداتتارى ولاردىڭ نەگىزىندە جاتۋعا ءتيىس», - دەدى د.نازارباەۆا.
سەنات باسشىسى كونفەرەنتسياعا قاتىسۋشىلارعا ارناعان سوزىندە جاڭا سىن-قاتەرلەر ۇلتتىق پارلامەنتتەر مەن پارلامەنتارالىق ۇيىمدار دەڭگەيىندە ءوزارا بەلسەندى ءىس-قيمىلدى تالاپ ەتەتىنىن اتاپ ءوتتى. تەرروريزمگە قارسى ءىس-قيمىلدا ۇلتتىق زاڭنامالاردى ۇيلەستىرۋ تابىستىڭ ماڭىزدى فاكتورى بولىپ تابىلادى.
«تمد پارلامەنتارالىق اسسامبلەياسى اۋقىمدى جۇمىستار اتقارىپ جاتقانى بىزگە بەلگىلى. بىرلەسكەن كۇش-جىگەردىڭ ناتيجەسىندە قاۋىپسىزدىك ماسەلەلەرىن رەتتەيتىن ۇلگى زاڭنامانىڭ ساپالى بازاسىن قۇرۋ مۇمكىن بولدى. بۇل جۇمىستار ءتيىمدى پارلامەنتارالىق ىنتىماقتاستىقتىڭ ايقىن مىسالى بولىپ تابىلادى», - دەدى سەنات توراعاسى.
وسى ماسەلەگە ورتاق كوزقاراستى قالىپتاستىرۋ ءۇشىن كۇش-جىگەردى بىرىكتىرۋدى ماقسات ەتكەن كونفەرەنتسيادا تەرروريزمگە قارسى ءىس-قيمىلداعى حالىقارالىق ينستيتۋتتاردىڭ ءرولى, ەكسترەميستىك يدەيالاردى تاراتۋدا جەلىلىك تەحنولوگيالاردى پايدالانۋدى بولدىرماۋ, لاڭكەستەردى قۋدالاۋ جانە تەرروريزمدى قارجىلاندىرۋدىڭ جولىن كەسۋ ماقساتىندا زاڭنامانى جەتىلدىرۋ ماسەلەلەرى تالقىلاندى.
